1Nakua kadanNa PUANG: Solo’ko rokko tongkonan layukna datu Yehuda, pokadai dio te kada iate,
2pokadanni kumua: Perangii tu kadanNa PUANG, e datu Yehuda, tu unnisungi isungan kapayunganna Daud, la kamu la to mase’ponmi la iatu mai baanammi, tu tama babangan iate.
3Inde sia tu kadanNa PUANG, Nakua: Paolai salunna sia karitutui tu kamalamburan, sia rampananni tu to dirampa apanna lan mai limanna to ma’pakario-rio, da miparugii sia da mipandasai tu to sae ba’tu pia biung ba’tu baine balu; sia da mipatibollo rarana to tang kasalan dao inan iate.
4Belanna iake mipangu’kui umpogau’i te, manassa dio mai babangan tongkonan layuk iate la nanii tama tu mintu’ datu la unnisung dao isungan kapayunganna Daud, tu ma’kareta sia ma’darang, la ia la mintu’ to mase’ponna sia baananna.
5Apa iake tae’i miperangii te kada iate, mangkaMo’ umpalao sumpa tete dio Kaleku, kadanNa PUANG, kumua iate tongkonan layuk iate la daun lauanmo.
6Belanna nakua kadanNa PUANG tu diona tongkonan layukna datu Yehuda: Susiko Gilead sia sangtintiko botto Libanon lako Kaleku – ke tae’i Kupopempadang pangallarangko, tu tang natorroi tau.
7Aku la umpatumayai tu to ma’kasanggang la ullaoiko, pantanni pa’bunona; iamo la ullellengi tu mintu’ arasi’ pa’tonno’mu anna pembuanganni tama api.
8Attu iato buda bangsa la ullendu’i te kota iate sia sipa’kada-kada nakua: Ma’apai Napasusii PUANG to te kota kapua iate?
9Anna mebali nakua: Belanna naboko’imo tau iato mai tu basseNa PUANG, Kapenombanna, sia tukku umpenombai sia umpengkaolai deata senga’.
Diona Salum
10Da mitangi’i tu to mate sia da mibatingi, sangadinna iari tu to malemo tu la mitangi’i, belanna tae’mo nala sule la untiroi tu tondok kadadianna.
11Belanna inde sia tu kadanNa PUANG diona Salum, anakna Yosia, datu Yehuda, tu dadi datu ussonda Yosia, ambe’na sia tu tassu’ lan mai tondok iate, nakua: tae’mo nala sule pole’o tama,
12sangadinna inan umba tu nanii tau umpali’i, inde to dio la nanii mate sia tae’mo nala untiro pole’i te padang iate.
Diona Yoyakim
13Upu’ allona tu to umbangun banuanna situang katangmaloloan, sia tu unggaragai bilik tiangka’ langnganna situang katangmalamburan; sia ussua-sua bang padanna tolino mengkarang tang nagadi sia tae’ nasaroi.
14Tu ma’kada nakua: La umbangunanna’ kaleku misa’ banua kapua sia bilik malona’ tiangka’ langnganna; sia nagaragan pentiroanna tu banua iato sia nalapik kayu arasi’, anna paradai parada mararang.
15Datukomiraka, ammi sipatomporanra kayu arasi’? Iatu ambe’mi tang kumanderaka sia mangiru’ sia umpogau’ salunna sia kamalamburan? Iatonna iato manaman ia.
16Nasanda tonganni tu diona to makario-rio sia to bongko, attu iato manaman ia. Tang susiraka to tu unnakuNa’? kadanNa PUANG.
17Apa tae’ mikemata sia kepenaa dio kalemi, sangadinna ungkamoraikomi saro bu’tu kadake sia umpatibollo rarana to tang kasalan sia umpandasa sia umpakario-rio tau.
18Iamoto nakua kadanNa PUANG tu diona Yoyakim, anakna Yosia, datu Yehuda: Tae’ nala umbatingi tau susite: Oo dikka’ siulu’ku muane! ba’tu: Oo dikka’ siulu’ku baine!; sia tae’ duka nala umbatingi tau susite: Oo dikka’ puang! ba’tu: Oo dikka’ to kabarre-alloan!
19Sangadinna la nalamun tau susito ullamun keledai mate, iamotu diriu’ sia ditibe dio lu salian babangan Yerusalem.
Diona Konya
20Kendekko langngan Libanon, ammu ma’urrukan dao, sia unnangle-angleko dao Basan, sia ma’urrukangko dao mai Abarim, belanna mintu’ muane pa’kaboro’mu sanggangmo.
21Iatommu marampa’ siapa, ma’kadaNa’ lako kalemu; apa mukua: Manokana’ umperangii! Susimo lalanmu to, randuk dio mai mangurammu, belanna tae’ len muperangii tu gamarangKu.
22Mintu’ to mangkambi’mu la nakambi’ angin sia mintu’ muane pa’kaboro’mu la dirampa. Belanna attu iato la kasirisangko sia la ditatta diona mintu’ kakadakeammu.
23E iko to unno’ko’ dao Libanon sia messerang lan lu kayu arasi’, lendu’ ia sarromu, ke narampoiko tu mintu’ pa’di’, susito baine mangurria’.
24Tonganna la lelukraka tuoKu, kadanNa PUANG, moronganna tu Konya, anakna Yoyakim, datu to Yehuda, susito misa’ sissin peca’ dio lima kananKu, manassa la Kusintakki duka lan mai,
25sia la Kusorongko tama limanna to la ungka’tu sunga’mu sia mukataku’, iamotu tama limanna Nebukadnezar, datu Babel sia to Kasdim.
26Sia la Kupellebarangko sola indo’mu, tu mangka undadiangko lako misa’ tondok senga’, tu tangia tondok kadadiammi, naindeto dio la minii mate.
27Iatu tondok nakamali’ tongan la nanii sule tama, inang tae’mo ia nala sule tama.
28Misa’raka kurin tesse tu nasayu tau te tau iate, iamotu Konya, ba’tu misa’ kandean litak tae’ gai’na? Ma’apai anna dipembassanan, la ia sia mintu’ repokna sia ditibe lako misa’ tondok tu tae’ natandai?
29E tondok, e tondok, e tondok! perangii tu kadanNa PUANG.
30Nakua kadanNa PUANG: Sura’i te tau iate susito tamanang sia misa’ to tang maupa’ lan mintu’ allo katuoanna, belanna dio mai mintu’ ampo bati’na moi misa’ tae’ la maupa’ sia la unnisung dao isungan kapayunganna Daud sia undatuipa tondok Yehuda.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel