1Iake la mengkatoba’ko e Israel, kadanNa PUANG, ma’dinko sule lako Kaleku sia ia ke mutibei tu apa megallian dio mai pentiroKu, manassa tae’mo mula mallai,
2sia la umpalaoko sumpa mukua: La lelukraka tuoNa PUANG situang kamanapparan, katonganan sia kamaloloan, anna mintu’ bangsa sipalakuan kamasakkean sia massattuan tete dio sanganNa PUANG.
3Belanna susite tu kadanNa PUANG lako mintu’ to Yehuda sia to Yerusalem, Nakua: Bungka’komi pa’lak ba’ru, da mimangambo’ lan lu to’ duri.
4Sunna’i tu kalemi lako PUANG sia tibei tu salepe’ kasirisan penaammi, e kamu to Yehuda sia pa’tondokan Yerusalem, da nama’lana-lana susi api tu kare’dekangKu sia ma’pamampu’, naurunganni tang dibela dipa’dei, belanna penggauran kadakemi.
Kasanggangan lu daa mai ulunna salu
5Patale’i te lan Yehuda, pa’perangianni lan lu Yerusalem sia pokadai kumua: Pannonii tu napiri tanduk lan lu tondok, sia pemandui metamba kumua: La sirampunkomi anta tama kota ditambakuku!
6Pabendanni tu tanda kumua: lu lakokomi Sion! Da mitorro bendan, sangadinna ma’dondokomi ammi mentirerung! Belanna la umpasaeNa’ kamandasan sia kasanggangan kapua lu daa mai ulunna salu.
7Iatu singa bendanmo lan mai to’ pangala’-ala’na, iatu to pasanggangna mintu’ bangsa ke’de’mo, tassu’mo lan mai inanna, la umpopempadang lo’bangi tu padangmu; mintu’ tondokmu la disabu’i, naurunganni tae’mo misa’ tau torro lan.
8Iamoto la membungku’ karungkomi sia umbating sia unnurruk-urruk, belanna iatu katorrong-torronganna PUANG tae’pa natoyang dio mai kaleki:
9Allo iato iatu datu sia mintu’ arung la pa’de deata, kadanNa PUANG, napussak penaanna tu mintu’ to minaa sia tiramban tu mintu’ nabi,
10sia ma’kada nakua: O Puangta PUANG, Kamumo mandu umpapusai te bangsa iate sia iatu pa’tondokan Yerusalem, tomMi ma’kada lako kumua: La marampa’komi, anna iatu pa’dang tibua’mo la ungka’tu sunga’.
11Attu iato dipokada tu diona bangsa iate sia to lan Yerusalem, kumua: Den angin ma’pamalayu mangiri’ lu dao mai mintu’ tanete lan lu padang pangallaran lu lako anak dara bangsaKu; tangia angin ma’ta’pii ba’tu la ma’pamurru’i.
12La sae tu angin bara’ kapua Kusua; totemo Aku kalena la umpokadai tu ukungan urrua tau iato mai.
13Tiromi, kendekmo susi gaun tikembong; sia iatu mintu’ karetana butung angin bara’, na iatu mintu’ darangna mandu matira’ anna langkan maega: upu’ allota belanna sanggangmoki’.
14Seroi tu penaaammu, e Yerusalem, ammu makarimman; sangapapara tu tangnga’ sala tonang lan penaammu?
15Belanna saemo tu karebanna dio mai Dan sia dipa’peissanammo tu kareba kasanggangan dio mai buntu Efraim.
16Pokadanni mintu’ bangsa, ondongpi pa’peissananni lako Yerusalem, kumua: Ba’tu pira-pira to ma’patama limbu sae dio mai padang mambela, sia unnarrak-arrak la ullaoi mintu’ tondok Yehuda.
17Susito ma’kampa pa’lak ma’talimbungan untikui, belanna pabalibalimo lako Kaleku, kadanNa PUANG.
18Iatu kedomu sia penggaurammu umparampoi te mintu’na apa iate lako kalemu, napobua’ mintu’ kakadakeammu; mapai’ tongan to sia nari’ta’ ko sae tama penaammu.
19A’a mapa’di’ ba’tengku, mapa’di’ ba’tengku! Mangunterona’ sia bonnong tu penaangku, ma’dube-dube tu ara’ku, tae’mo kurapa’, belanna urrangi oni napiri tanduk sia arrak kasirarian.
20Dennoi kasanggangan napetambanoi tau, ondongpi mintu’ padang mangsanmo; tae’ nadikapang anna disanggang tu mintu’ tendaku, sia lan sangpekkappidian matari tu sambo tendaku.
21Sangapapara’ la untiroi tu tanda iato sia urrangi oni napiri tanduk?
22Belanna tang paissan tu taungKu sia tae’ natandaiNa’; iatu tau iato mai susito pia baga sia tang keinaa; manarang umpogau’ kadake, apa tae’ naissanni umpogau’ melo.
23Iatongku tiroi te lino tang tibori’mo sia tae’ bangmo apa-apa lan; iatongku mentingara langngan langi’ pa’demo tu arrangna.
24Iatongku mentingara langngan mintu’ buntu, tiseno nasangmo sia mintu’ tanete tigega’mo.
25Umba-umba kunii mentiro, tae’mo tau, sia mintu’ manuk-manuk dao langi’ male nasangmo mettia’.
26Iatu padang maelo kutiro dadimo padang pangallaran, sia mintu’ tondokna ro’pokmo dio oloNa PUANG, napobua’ katorrong-torronganNa.
27Belanna nakua kadanNa PUANG, Nakua: Mintu’ padang iate la Kupopempadang lo’bang, apa tae’ Kupisanni.
28Iamoto, la rosso tu lino sia iatu langi’ dao la ma’pote dibolong, belanna mangkamo Kupokada sia Kura’ta’ tu iannato, sia tae’mo Kupenassanni sia Kuboko’imo.
29Belanna diona arrak pakkanarang sia to ma’pana, anna mallai tu mintu’ to lan tondok; iatu tau iato mai malemo tama pangala’-ala’ anna kendek langngan buntu batu; iatu mintu’ kota ditampe sia tae’mo misa’ tau torro lan.
30Iamoto apa la mupogau’, e iko tu sanggangmo, moi ammu ma’pakean lango-lango, moi ammu beloi ma’rupa-rupa bulaan tu kalemu, moi ammu ba’da’i malotongi tu matammu? Tae’ gai’na mubeloi tu kalemu susito, mintu’ pa’pangngan buni ussayuko sia morai ungka’tu sunga’mu.
31Belanna kurangi tu misa’ sarro, susi sarrona baine mangurria’ sia sarro sume’den-me’den susi sarrona baine kianak pa’bunga’, iamotu sarrona anak dara Sion; seka-seka tongan sia umpopempala’ limanna, nakua: Upu’alloku, belanna la ka’tumo tu sunga’ku napobua’ to papatean.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel