Yeremia sisola Gedalya
1Inde sia tu kadanNa PUANG, tu sae lako Yeremia, tonna mangka ussuai Nebuzaradan, pangulu to ma’kampa, ke’de’ dio mai Rama, iamo tonna mangka umpesuanni unnalai, tonna dirantepa dio lu mintu’ to Yerusalem sia to Yehuda dirampa, tu la dipalele lako Babel.
2Attu iato napesuammi pangulu to ma’kampa tu Yeremia, anna kuanni kumua: PUANG, Kapenombammimo, mangka umpokadai tu diona mintu’ kamandasan la urrampoi tondok iate,
3sia Naparampomo PUANG sia Napogau’mo tu mintu’nato susitu Napokada, belanna kasalangkomi lako PUANG sia tae’ mituru’i tu kadanNa. Iamoto narampoikomi te ianna te.
4Tiromi totemo, kuko’ka’imo tu rante lan mai limammi: iake misangai melo ke maleki’ sola lako Babel, turu’mo’, manassa kupatiroangkomi kameloan; apa iake misangai kadake, ke maleki’ sola lako Babel, da’imito; mintu’na padang iate tae’ nadipesangkai, umba-umba misanga melo sia tongan, male bangmokomi lako.
5Sulemokomi lako Gedalya, anakna Ahikam, anakna Safan, tu naangka’ datu Babel umparenta tondok Yehuda, sia torrokomi sola dio lu to buda, ba’tu malekomi lako umba tu misanganna melo. Nabenmi pangulu to ma’kampa tu kinallo sia misa’ pamengan namane unneloranni male.
6Susimoto tu kasaeanna Yeremia lako Gedalya, anakna Ahikam, dio Mizpa, anna torro sola dio lu to buda, tu torrona siapa dio padang iato.
Kadipateianna Gedalya
7Iatonna rangimi mintu’ kamandang surodadu tu dio lu padang sisola surodadunna, kumua naangka’mo datu Babel tu Gedalya, anakna Ahikam, umparenta tondok sia nasorongan lako tu mintu’ muane sia baine sia pia, iamotu mintu’ to makario-rio, tu tae’ nadirampa lako Babel,
8saemi tu tau iato mai lako Gedalya dio Mizpa, iamotu Ismael anakna Netanya sia Yohanan sia Yonatan, anakna Kareah sia Seraya, anakna Tanhumet sia anakna Efai, to Netofa sia Yezanya, anakna to Maakha sisola surodadunna.
9Umpalaomi sumpa tu Gedalya, anakna Ahikam, anakna Safan, lako tau iato mai sia mintu’ surodadunna, nakua: Da mimataku’ mengkaola lako to Kasdim; torro bangmokomi lan tondok iate sia mengkaolakomi lako datu Babel, ammi makarimman.
10Na iatu aku, manassa la torrona’ dio Mizpa, susito maraa dio tingayona to Kasdim, tu sae lako kaleta; apa iate kamu, mebua anggoro’komi sia mebua-buakomi sia urrampunkomi minna’ sia patamai pa’paniammi, ammi torro lan lu mintu’ kotami, tu la minii tontong torro.
11Iatonna rangimi mintu’ to Yehuda, tu dio lu tondok Moab sia dio lu to Amon sia dio Edom sia lan lu mintu’ tondok senga’, kumua iatu datu Babel untampemo ba’tu pira-pira tau dio Yehuda sia naangka’mo tu Gedalya, anakna Ahikam, anakna Safan, la umparentai tu tau iato mai,
12sulemi tu mintu’ to Yehuda dio mai mintu’ tondok, tu dinii umpatisambo’i male, tama tondok Yehuda lako Gedalya dio Mizpa; urrampunmi tarru’ buda uai anggoro’ sia bua-bua tau iato mai.
13Attu iato saemi tu Yohanan, anakna Kareah sia mintu’ kamandang lompo, tu torro dio lu padang tonnanu, lako Gedalya dio Mizpa,
14sia ma’kada lako nakua: Miissan siaraka, kumua iatu Baalis, datu to Amon, ussuamo Ismael, anakna Netanya, la umpateikomi? Apa tae’ napatonganni Gedalya, anakna Ahikam.
15Mangkato ma’kada bunimi tu Yohanan, anakna Kareah, lako Gedalya dio Mizpa, nakua: Da’ito kumale umpatei tu Ismael, anakna Netanya, na moi misa’ tau tae’ unnissanni; ma’apai anna la umpateikomi, sisarak-sarak manii tu mintu’ to Yehuda, tu mangka sirampun lako kalemi, anna sanggang tu mintu’ to torro dio mai to Yehuda?
16Apa ma’kada tu Gedalya, anakna Ahikam lako Yohanan, anakna Kareah, nakua: Da mupogau’i to, belanna tang tongan tu mupokada diona Ismael.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel