Diona Yerusalem natalo to Kasdim
1Iatu Zedekia duangpulo mmisa taunna tonna diangka’ datu, anna ma’parenta dio Yerusalem sangpulo misa taunna. Iatu indo’na disanga Hamutal, anakna Yeremia dio mai Libna.
2Napogau’ tu apa kadake dio pentiroNa PUANG, susi mintu’ penggauranna Yoyakim.
3Belanna kasengkeanNa PUANG, anna susi maromoto tu Yerusalem sola Yehuda. Nasualei dio mai oloNa. Pabali-balimi Zedekia lako datu Babel.
4Iatonna taun ma’pengkasera kadatuanna, bulan ma’pessangpulo sia allo ma’pessangpulo bulan iato, saemi Nebukadnezar, datu Babel, sola mintu’ surodadunna ullaoi Yerusalem sia napabendan tu tendana tiku lao, nagaragai tu benteng la nanii ullaoi.
5Susimo kadipatama-limbuanna tu tondok iato sae lako taun ma’pessangpulo misa kadatuanna Zedekia.
6Iatonna bulan ma’penna’pa’, allo ma’pengkasera bulan iato, lendu’ ia ma’irrikna karorian lan kota, naurungan tae’mo rotinna tu mai to buda lan tondok.
7Iatu mai tambakuku kota ditossomo, anna mallai tu mai surodadu lan mai kota tonna bongi unnola babangan naparitangnga da’dua benteng tembo’ sirondong pa’lakna datu – na iatu to Kasdim umpatama limbu kota iato, apa moi susito unnola bang lalan lu lako Araba-Yordan.
8Apa iatu datu naula’ surodadu to Kasdim, anna lambi’i tu Zedekia dio padang marantena Yerikho, naurungan dipasisarak-sarak tu mai surodadunna tu nasolan.
9Natingkanni tu datu, nasolammi lako datu Babel dio Ribla, lili’na Hamat, nara’ta’mi datu Babel tu ukunganna.
10Napateimi datu Babel tu mintu’ anakna muane Zedekia dio tingayona sia iatu mai arungna Yehuda napatei duka dio Ribla.
11Sia napopebutai patomali tu matanna Zedekia, anna pungoi da’dua rante tambaga; anna solanni datu Babel lako Babel sia napatama pa’tarungkuan sae lako matena.
12Iatonna bulan ma’pellima, allo ma’pessangpulo bulan iato, iamotu taun ma’pessangpulo kaseranna kadatuanna Nebukadnezar, datu Babel, saemi lako Yerusalem tu Nebuzaradan, pangulu to ma’kampa, tu mareke’na datu Babel.
13Nasumpunmi tu banuanNa PUANG sia tongkonan layukna datu, sia iatu mai banua dio Yerusalem, iamotu mintu’ banuanna to kapua, pura nasumpun.
14Iatu rinding tembo’ Yerusalem tiku lao natuan nasangmo mintu’ surodadu to Kasdim tu nasolan pangulu to ma’kampa.
15Iatu to makario-riona bangsa iato sia iatu to tinampenapa lan kota sia iatu mai to menta’pa tu malemo lako datu Babel, sia iatu mai to buda tu tinampepa napali’mo Nebuzaradan, pangulu to ma’kampa.
16Apa iatu ba’tu pira-pira to makario-rio dio tondok iato natampepa Nebuzaradan, pangulu to ma’kampa, la ma’pa’lak anggoro’ sia ma’pa’lak.
17Iatu lentong tambaga, tu dio banuanNa PUANG sia mintu’ tangdan pembasean sia tasik tambaga tu lan banuanNa PUANG puramo natesse to Kasdim anna baai tu mintu’ tambaga iato lako Babel.
18Sia ia duka tu kurin sia pesodok sia piso sia pindan pa’pi’pikan sia dolong-dolong sia mintu’ pareanan tambaga tu dipake menomba, nabaa nasang.
19Sia piring sia pa’peruayan sia pindan pa’pi’pikan sia kurin sia tongkonan palita sia dolong-dolong sia balubu, iatu mintu’ pareanan bulaan sia salaka nabaa nasang pangulu to ma’kampa iato.
20Sia iatu lentong da’dua sia iatu tasik tambaga misa’ sia iatu tangdan pembasean tu nagaragan datu Salomo banuanNa PUANG tang dibela ditimbang tu tambagana mintu’ pareanan iato.
21Iatu lentong iato da’dua sangpulo karua siku langka’na, ke misa’oi, sia sangpulo dua siku tu ulang pelebu’na sia kambanna patang taruno anna lo’bang lanna lu.
22Daona lentong iato nanii misa’ parande tambaga sia iatu misa’ parande limang siku langka’na, sia daona pole’ lu tu parande tikunna male den dalla’ tambaga massang sola bua dalima. Susi dukato tu bua dalima dio lentong misa’na.
23Iatu mintu’ bua dalima iato den kasera pulona nannan tu payan; mintu’ bua dalima iato den saratu’ dio dalla’ iato tiku lao.
24Natingkanmi pangulu to ma’kampa tu Seraya, tominaa kapua, sia Zefanya, tominaa ma’penduanna, sia iatu tallu to ma’kampa ba’ba.
25Sia lan mai kota iato natingkan tu misa’ to mase’ponna datu, tu ungkampai surodadu, sia pitui dio mai tau iato, tu la tontong mennolo lako datu, tu diapparan lan kota iato, sia to massura’na kamandang lompo, tu urrampun mintu’ tau lan tondok la lao parari, sia annan pulona tau dio mai kampung tu diapparan lan kota.
26Natingkanmi Nebuzaradan, pangulu to ma’kampa tu mintu’ tau iato mai, nabaai mennolo lako datu Babel, dio Ribla.
27Napesuammi datu Babel umpatei tu tau iato mai dio Ribla lan lili’na Hamat. Susimoto tu kadipaliranna to Yehuda lan mai tondokna.
28Inde sia tu mintu’ to napali’ Nebuzaradan; iamo tonna taun ma’pempitu, tallungsa’bu duangpulo ntallu to Yehuda;
29sia iatonna taun ma’pessangpulo karua kadatuanna Nebukadnezar tassu’mi lan mai Yerusalem tu tau karua ratu’na tallungpulo ndua tau.
30Iatonna taun ma’penduangpulo ntallu kadatuanna Nebukadnezar, napali’mi Nebuzaradan, pangulu to ma’kampa tu to Yehuda pituratu’ patangpulo llima. Mintu’i tu tau iato mai patangsa’bu annan ratu’.
Yoyakhin dikaturu-turui
31Iatonna taun ma’pentallungpulo mpitu kadipaliranna Yoyakhin, datu Yehuda bulan ma’pessangpulo dua, allo ma’penduangpulo llima bulan iato, iatu Yoyakhin, datu Yehuda, nakaturu-turui Ewil-Merodakh, datu Babel, sia natassu’i lan mai pa’tarungkuan, lan taun dinii unnangka’i datu.
32Ma’kada malamma’mi tu datu lako kalena sia napamadao tu kao’koranna na iatu kao’koranna mintu’ datu, tu nasolan dio Babel.
33Naelorammi datu Babel ussondai tu pakean pa’tarungkuanna, sia kumande dio medana datu lan mintu’ katuoanna.
34Tontong nabalantai datu Babel pada tu silasanna napake kiallo-kiallo lan mintu’ katuoanna sae lako kamateanna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel