Pa’pangada’na Yeremia lan Banua Kabusungan
1Iamote tu kadanNa PUANG rampo lako Yeremia, nakua:
2Maleko ammu bendan dio ba’ba banuanNa PUANG, sia pangadaranni dio te kada iate, kumua: Perangiimi tu kadanNa PUANG, e mintu’ to Yehuda tu tama ba’ba iate la menomba lako PUANG.
3Inde sia tu kadanNa PUANGna mintu’ madandan maritik, Kapenombanna to Israel, Nakua: Pemeloi tu mintu’ lalanmi sia penggaurammi, angku paunnisung marampa’komi lan tondok iate.
4Da mipatonganni tu kada pa’pakena, tu nakua: Iamote tu banuanNa PUANG, banuanNa PUANG, banuanNa PUANG!
5Tae’ natongan to, apa iake mipemeloi tonganni tu lalanmi sia penggaurammi, sia iake malambu’komi umpaolai salunna tu tau anna solana,
6iake tae’i ammi pakario-rio to sae tang sia pia biung sia baine balu sia tang umpatibollo rarana to tang kasalan dio inan iate sia iake tae’i mipengkaolai tu kapenomban senga’, tu la umpabu’tuangkomi kamandasan,
7manassa la Kupaunnisung marampa’komi misituran-turananni lan tondok iate, iamotu padang Kukamasean nene’ to dolomi.
8Apa mipatongan tu kada pa’pakena tu tang kebattuan.
9Umba nakua? Bokomokomi sia papatean sia pasandak salu lako rampanan kapa’ sia umpalao sumpa tang tongan sia memala’komi lako Baal sia mengkaola lako kapenomban, tu tang mitandas-
10ammi mane sae umpennoloiNa’ lan banua iate, tu dinii unggente’ sangangKu, mikua: Tilendokmokan! kumua ammi pogau’i te mintu megallianna?
11Iate banua iate, tu diniimo unggente’ sangangKu, misangaraka lo’ko’ pa’gora’? Iatu Aku, Kutiro nasangmo, kadanNa PUANG.
12Belanna ma’dinkomi male lako to’ inanKu dio Silo, tu pamulanna Kunii umpaunnisung sangangKu; tiromi tu apa mangka Kuparampoanni, natumang mintu’ kakadakeanna taungKu Israel.
13Totemo, belanna mipogau’ te mintu’ penggauran iate, kadanNa PUANG, sia Kupa’kadaikomi, ke makale’ sia ke karoen, apa tang miperangii sia Kukambaroangkomi, apa tae’ bang mimebali.
14Iamoto nabanua iate, tu mangkamo dinii unggente’ sangangKu sia tu miposande’, sia inan iate tu Kukamaseangkomi sia nene’ to dolomi, la kuparampoi kasanggangan susitu mangka Kuparampo lako Silo dolona,
15sia la Kusualekomi dio mai oloKu, susitu mintu’ siulu’mi Kusuale, iamotu mai bati’na Efraim.
Kapemalaran lako datu baine dao ba’tangna langi’
16Iatu iko, da mupassambayanganni te bangsa iate, da mumeongli’ umpengkamoyanni sia umpalakuanni sia da muparukuNa’, belanna manokaNa’ umperangii tu passambayangmu.
17Tae’raka mutiroi tu apa napogau’ tau iato mai lan lu mintu’ tondok Yehuda sia dio lu mintu’ batatta Yerusalem?
18Iatu mai anakna urruruk kayu sia iatu ambe’na umpadukku api na iatu bainena ma’gerok ta’pung la nagaragai pa’ranggina dipenomban lako datu baine dao langi’ sia untedok pemala’ pantedok lako kapenomban senga’ la umparosso penaangKu.
19Apa Akuraka tu naparosso, kadanNa PUANG? Tang kalenaraka tu naparosso, naurunganni kasirisan tongan?
20Iamoto, kadanNa Puangta PUANG, iatu kasengkeangKu sia kare’dekanna ara’Ku la tibarrak indete inan iate, lako tolino sia lako mintu’ olo’-olo’, lako mintu’ garonto’ kayu dio lu padang sia lako mintu’ bura padang; iamoto tu la dukku tang pa’de-pa’de.
Kapengkaolan lako PUANG ondong ia na kapemalaran
21Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Pasisolai tu pemala’ ditunu pu’pu’mi na pemala’ pangrere’mi, mikandei tu duku’na,
22belanna iatongKu solanni tassu’ lan mai tondok Mesir tu nene’ to dolomi, tae’ angKu ma’kada ba’tu mepasan lako tau iato mai tu diona pemala’ ditunu pu’pu’ ba’tu pemala’ pangrere’,
23sangadinna pepasan iate Kupokadan tau iato mai, kumua: La miperangii te kadangKu, iake susito iate Aku te KapenombammiNa’ na kamu taungKukomi; la mituru’ tu mintu’ lalan Kupasanangkomi, ammi makarimman.
24Apa tang ma’perangi tu tau iato mai, sia tae’ napalidanni talinga, sangadinna makarra’ bang unturu’ lalan penaa kadakena; iatu tau iato mai sorong boko’, tae’ namennolo,
25randuk tonna tassu’ tu nene’ to dolomi dio mai tondok Mesir sae lako allo iate. Sia kusua lako kalemi tu mai taungKu, iamotu mintu’ nabi, ke makale’ sia ke karoen.
26Apa tang naperangiiNa’ tu tau iato mai sia tae’ napalidanni talinga, sangadinna umpamakarra’ bang penaanna losong pole’ na iatu nene’ to dolona.
27Mupokada tu mintu’ kada iate lako tau iato mai, apa tang naperangiiko sia mukambaroan, apa tang napebaliiko.
28Iamoto la mupokada tu diona a’ganna, kumua: Iamote tu misa’ bangsa, tu tang umperangii kadanNa PUANG, Kapenombanna sia untumpu peada’; iatu kabulo-lollongan sisayurammo sia kada tang tongan mannamo dio pudukna.
Lombok Pura tau
29Ku’ku’i tu beluakmu ammu tibei, sia unnurrukko umbating dao lu tanete karing, kumua: Nasualemo PUANG sia Natampemo te pa’rapuan iate tu narampoi kasengkeanNa.
30Belanna iatu bati’na Yehuda umpogau’ kadake dio pentiroKu, kadanNa PUANG; iatu apa megallian napalanmo banua, tu mangka dinii unggente’ sangangKu, anna ruttakki.
31Nagaragaimi tu mintu’ inan pemalaran dao buttu-buttu Tofet diong lombok Ben-Hinom, la untunui tu mai anakna muane sia baine, iamotu apa inang tae’ len Kupepasananni sia inang tae’ len bu’tu lan penaangKu.
32Iamoto, kadanNa PUANG, la sae tu allona, anna tang disangaimo Tofet ba’tu lombok Ben-Hinom, sangadinna lombok Pura tau: napanglamunni bangmi tau tu Tofet, belanna tae’mo tu inan.
33Ondongpi mintu’ batang rabukna bangsa iate napopendurukan manuk-manuk dao langi’ sia napokande mintu’ olo’-olo’ dao kapadanganna, na moi misa’ tau tae’ unnula’i.
34Dio lu mintu’ kota Yehuda sia dio lu mintu’ batatta Yerusalem la Kupa’dei tu arrak kaparannuan sia kamaruasan sia gamara to ma’rampanan kapa’, belanna tondok iate la sanggangmo.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel