1Belanna Nakaturu-turui PUANG tu Yakub sia la tontong Natonno’ tu Israel sia la Napatorro lan tondokna; anna iatu to salian lembang la menturu’ lako to Israel sia la mareke’ lako rapunna Yakub.
2Iatu to Israel la nasolan ba’tu pira-pira bangsa, nasolan lako inanna, anna potaui to Israel tu tau iato mai dio padangna PUANG, la napokaunan la muane la baine anna rampai tu to mangka urrampai dolona sia anna posua-suanni tu to mangka ussua-suai.
3La ten dako’ ke Nabenmoko kamatanan PUANG diona kamapa’dirammu sia katigiangammu sia pengkarangan magasammu tu napapassanangko to umpokaunanko,
4attu iato mupopenani te parumbasan diona datu Babel, kumua: Tumba ia melona, belanna toremo tu to mesua-sua, iatu kadipakario-rioan toremo.
5Iatu pebamba to tang mekaaluk Narebong PUANG, tu tekken kapayunganna to dipekapuangi.
6Tu sengke umbamba tang sore-sore tu mintu’ to sangpetayanan sia tu arasan ullullu’ sia umpakario-rio mintu’ bangsa situang katangmamasean.
7Iatu mintu’ issinna lino la marampa’ sia manaman; tau iato mai unnarrak parannu.
8Sia naposendeko mintu’ kayu sanoba’, susi dukato tu kayu arasi’ dao Libanon, nakua: Tempommu sumpandan dio, tae’ bangmo misa’ tau kendek mai la ullellengkan.
9Iatu lino to mate diong marongka belanna iko, la morai ussitiroangko, ke saeko; belanna tete dio iko napamillikki tu mai bombo to mate, iamotu mai bembe’ laki lan lino, mintu’ datunna bangsa napake’de’ dio mai to’ isungan kapayunganna.
10Tau iato mai ma’kada sola nasang mati’ nakua: Tang pa’kulle dukamoko susi kami, dipapada dukamoki’.
11Mintu’ kamala’birammu dipembuangammo tama lino to mate situang oni dandi, kalinting mupoampa’ sia ulli’ mupoparramba’.
12Lendu’ iatu karonnosammu dao mai langi’, e sulo bai, e anak dannari lambe’! Dilellengmoko tibambang tama lino, e iko to umpatunduk mintu’ bangsa.
13Mukua lan penaammu susite: La kendekna’ langngan langi’, la umpalayukna’ isungangku dao mintu’ bintoenNa Puang Matua, kutongkon unnisung dao buntu pa’kombongan daa tiparitikna mata uai.
14La kendekna’ untongloi saliu’ sia la umpapadana’ kaleku Patodoranna.
15Apa tipembuangoroko tama lino to mate, rokko garuang mandalan.
16Iatu to untiroko napatontongiko mata sia namanta-mantako anna ma’kada nakua: Iamoraka te tu umpamarukka issinna lino pirangbongi’ sia umpatigega’ mintu’ parenta?
17Tu umpopempadang aak lino sia ussanggang mintu’ tondokna, tae’ anna rampananni tu to dirampa sule lako banuanna.
18Mintu’ datunna bangsa matindo situang kamala’biranna lan lu patanena.
19Apa ditibeangko sikambela liang butung to misa’ lolo disayu pallan; nasii’pinniko to mate nakande bassi, tu kabu’ rokko garonggong batu, butung to batang rabuk disisodo-sodoi.
20Tae’ duka ammu dipasipeliang tau iato mai, belanna musanggang nasangmo tu tondokmu sia mupatei nasangmo tu to budammu, iatu bati’na to umpogau’ kakadakean tae’ anna la disa’bu’ len tontong sae lakona.
21Parandananni inan pangreresan tu mai anakna, natumang mintu’ kakadakeanna ambe’na, da anna bangun tu tau iato mai umpatunduk lino sia umpasitutu’i tondok te lino.
22La ke’de’Na’ unneai tu tau iato mai, kadanNa PUANGna mintu’ ma’dandan maritik, sia iatu Babel la Kupa’dei, la sanganna, la tinampenapa sia lanto mimi’na, kadanNa PUANG.
23Sia la Kupopendurukanna kayo sia la Kupopendadi buka sia la Kusarrinni pesarrin kasanggangan, kadanNa PUANGna mintu’ ma’dandan maritik.
Pa’nubua’ diona Asyur
24Mangkamo umpalao sumpa tu PUANGna mintu’ ma’dandan maritik Nakua: Manassa susitu Kutangnga’namo, susi dukato tu la dadi, sia susitu Kulampaknamo, ten dukamoto tu la lalo.
25Akumo tu ussanggang Asyur lan padangKu sia Kulullu’ dao buntungKu, naurunganni tilendok tu ayokana dio mai tau iato sia tilendok tu pamaanna dao mai palempengna.
26Iamote tu mangka dilampak lako mintu’ lino sia iamote tu lima tie’te’ lako mintu’ bangsa.
27Iatu mintu’ apa mangka Nalampak PUANGna mintu’ ma’dandan maritik, mindara la undampai, iatu limanNa tie’te’mo, mindara la umpodoranni?
Pa’nubua’ diona tondok Filistea
28Iatonna taun namatean datu Ahas, rampomi te kada Napa’petanggungan Puang Matua, Nakua:
29Da misende paiman, e mintu’ pa’tondokan Filistea, belanna iatu pebambana to umbambakomi le’tomo, belanna la bu’tu dio mai ula’ tu misa’ ula’ rame, na iatu buanna iamo misa’ naga mettia’.
30Attu iato mintu’ anak pa’bunga’na to bitti’ la mamata utan nakalette’ sia mintu’ to bongko manaman mamma’na; apa sae lako uaka’mu la Kupatei katangdiaran, sia iatu torromupa la nasabu’i.
31Sitangirangko, e babangan, la siurrukangko, e kota, ma’parondokomi e mintu’ pa’tondokan Filistea belanna saemo daa mai tu rambu sia moi misa’ tae’ su’pik lan mai kaponanna.
32Apara la nabalianni tau tu sumbungan pudukna bangsa iato? Napabantangmo PUANG tu Sion, kumua anna mintu’ taunNa tu dipandasa, male mentilindung tama.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel