Bunga’na pa’nubua’ diona kadilendokanna Yerusalem
1Iatonna rangimi datu Hizkia tu iannato, naserek-serekmi tu tamangkalena anna ma’pakean karoro’, male tama banuanNa PUANG.
2Nasuami datu tu Elyakim, sandan uainna datu, sia Sebna pangulu to massura’, sia mintu’ to matua-tuanna to minaa ma’pote dibolong male umpellambi’i nabi Yesaya, anakna Amos.
3Ma’kadami tu tau iato mai lako, nakua: Susite tu kadanna datu Hizkia: Allo iate allo kapussakan, sia ukungan sia kadibelleran, belanna la sunmo tu pia, apa tang matoto’ tu indo’na la kianak.
4Naperangii sia manii PUANG, Kapenombangki tu mintu’ kadanna kolonel, tu nasua puangna, datu Asyur, uparampoangki’, kumua anna be’sei tu Puang Matua matontongan, anNa ukungi Puang tu belanna kada iato Narangimo PUANG, Kapenombammi; melo ke mipassambayanganni tu to torro siapa, tu denna siapa.
5Pakalan rampomi tu taunna datu Hizkia lako Yesaya.
6Ma’kadami Yesaya lako nakua: Inde sia tu kada la miparampoan puangmi, kumua: Iamote tu kadanNa PUANG Nakua: Da mukataku’i tu mintu’ kada, tu mangka murangi, tu napokada taunna datu Asyur umpa’kada solangiNa’.
7Akumo la umpaombo’i lan penaanna, naurunganni, ke urrangimi misa’ kareba, manassa la sule lako tondokna, anna lan tondokna Kunii umbambanganni nakande pa’dang.
Ma’penduanna Sanherib unnaran datu Hizkia la ussorong Yerusalem
8Iatonna sulemo tu kolonel narampoimi tu datu Asyur marassan sirari Libna, belanna denmo kareba narangi umpokadai, kumua ke’de’mo dio mai Lakhis.
9Narangimi tu kadanna tau diona Tirhaka, datu Etiopia, kumua: tassu’mo la sirari puangku. Iatonna rangimi tu kada iato, nasuami tu sumbungan puduk lako Hizkia, umpokadai nakua:
10Iate kada iate la miparampoan Hizkia, datu Yehuda, kumua: Da napakenakomi Kapenombammi, tu mirannuan, ammi kua: Iatu Yerusalem, tae’ nala disorongan datu Asyur.
11Mirangi nasangmo tu mintu’ apa napogau’ datu Asyur lako mintu’ tondok, umba nakua ummangsanni; umbao nakua ammi la dilendokan?
12Nakulleraka tu deatanna mintu’ bangsa, tu nasabu’i nene’ to doloku, ullendokanni tu tau iato mai: iamotu Gozan sia Haran sia Rezef sia to umpa’tondokki Eden lan Telasar?
13Umbamira tu datu Hamat sia datu Arpad, sia datu kota Sefarwaim sia Hena sia Iwa?
Passambayangna Hizkia
14Natarimami Hizkia tu sura’ iato dio mai tu sumbungan puduk, na iatonna mangkamo umbasai, malemi langngan banuanNa PUANG, anna balla’i tu sura’ iato dio oloNa PUANG.
15Massambayangmi tu Hizkia dio oloNa PUANG, nakua:
16O PUANGna mintu’ ma’dandan maritik, o Kapenombanna to Israel, tu unnisung dao karubion! Kamu, Kamu mannari Puang Matua, pekapuanganna mintu’ kadatuan lan lino; Kamu duka tu mangka ungkombong langi’ sola lino.
17O PUANG, tananni talinga amMi ma’perangi, o PUANG pamillikki tu matamMi amMi tiroi sia perangii tu mintu’ kadanna Sanherib, tu mesua umparampoi, la umbe’se Puang Matua matontongan.
18O PUANG tonganna nasanggangimo ba’tu pira-pira datu Asyur tu mintu’ tondok sola mintu’ lili’na.
19Na iatu deatanna napembuangan tama api, belanna tangia deata, sangadinna panggaraga tolino bangsia, kayu sia batu nagaraga, iamoto anna sanggangi.
20Iamoto, o PUANG, Kapenombangki, lendokangkan dio mai limanna, anna issanni mintu’ kadatuan lan te lino, kumua Kamu mannari, o PUANG, misa-misa tu Puang Matua.
Ma’penduanna pa’nubua’ diona Kadilendokanna Yerusalem
21Attu iato mesuami Yesaya, anakna Amos, umpokadanni Hizkia kumua: Nakua kadanNa PUANG, Kapenombanna to Israel: Belanna passambayangmu lako Kaleku tu diona Sanherib, datu Asyur –,
22iamote tu kada Napokada PUANG diona datu iato, nakua: Iatu simbolong manik, iamo anak dara Sion, untapa’ko sia untelle-telleko; iatu anak dara Yerusalem unniling-iling dio boko’mu.
23Mindara tu mube’se sia mupa’kada solangi, sia mindara mupekapuan gamarammu sia mupasolo’i matammu? Lako To maserona Israel!
24Tete dio pudukna kalena taummu ammu be’sei tu PUANG, mukua: Kabudanna karetaku angku kendekki tu buntu malangka’ sae langngan bottona Libanon sia kulelleng tu mintu’ garonto’ arasi’ kalandona, sia mintu’ sanoba’ mellongna; sia la rampona’ langngan botto malangka’na sia tama pangala’ tamman makampunna.
25Ia angku mambo’bok la unniru’na’ uai; sia mintu’ messarakna salu Nil lan Mesir kurangkei pala’ lentekku.
26Tae’ lenparaka murangi, kumua mintu’na te Kulampakmo tempon dio mai sia randuk dio mai tipamulanna inang Kubori’mo? Totemo Kuparampo randannamo; manassa la musanggang tu mintu’ tambakuku matoto’, anna daun lauan nasang.
27Iamo bannangna to na iatu to umpa’tondokki tang pakullemo unnea sia magiang sia kasirisan; tau iato mai susito merriunna dio lu padang, susito lolo mangura, susi riu dao papa, susi pa’lak gandung mane tuo.
28Apa Kutandai tu diona kao’korammu sia lu tama lu lanmu mai sia kapabali-balian masarrangmu lako Kaleku.
29Belanna kapabali-balian masarrangmu lako Kaleku sia kamatampoammu, tu rampomo tama pa’perangingKu, manassa Aku la umpalakoi kale’ke’Ku tu illongmu sia sanga’Ku tu sadangmu, angKu pasuleko lako tu lalan muola sae.
30Iamote tu tanda lako kalemu, kumua: Lan taun iate la mukande tu apa tuo kalena, na taun ma’penduan iatu apa tuo poleo, apa lan taun ma’pentallun la mangambo’komi ammi megandung sia untanan garonto’ anggoro’ ammi kandei tu buanna.
31Sia iatu bati’na Yehuda tu tilendokna sia tinampena la mennuaka’ pole diong sia membua dao.
32Belanna dio mai Yerusalem la nanii tassu’ tu tinampenapa sia dao mai buntu Sion tu tilendoknapa; kamakaritutuanNa PUANGna mintu’ ma’dandan maritik la umpadenni.
33Iamoto nakua kadanNa PUANG diona datu Asyur, kumua: Inang tae’ anna la tama kota iate sia tae’ anna la umpassumpiran misa’ tinaran tama, sia tae’ anna la unnangkaran balulang ke palaoanni sia tae’ nala umpabendan tambakuku la urrukka’i.
34La sulemo lako tu lalan naola sae, apa tae’ nala tama kota iate, kadanNa PUANG.
35Sia la Kurinding pala’ te kota iate, angKu lendokanni, belanna sangangKu sia belanna Daud, taungKu.
Iatu pa’nubua’na Yesaya diona katilendokan, lalomo
36Attu iato tassu’mi tu Malaeka’Na PUANG, Napateimi tu surodadunna to Asyur saratu’ karua pulona llima sa’bunna. Iatonna millik tu tau melambi’, natiroi tu mintu’nato, batang rabuk mannamo.
37Sangtiangkarammi sule tu Sanherib, datu Asyur, anna torro dio Niniwe.
38Den pissan tonna menomba lan banuanna Nisrokh tu napodeatanna, napakandeimi bassi mataran anakna, disanga Adramelekh sia Sarezer; anna mallai lussu’ sola duai lako padang Ararat, anna Esarhadon, anakna, dadi datu ussondai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel