Alkitab Mobile SABDA
[VER] : [TORAJA]     [PL]  [PB] 
 <<  Yesaya 60 >> 

Kamala’biranna Sion

1Ke’de’ko, ammu diarrangi, belanna saemo tu arrangmu, sia iatu kamala’biranNa PUANG kendekmo unnarrangiko.

2Belanna iatu kamalillinan la ussamboi lino sia la pittuk tu mintu’ bangsa, apa bu’tu tu kamasianganNa PUANG dio kalemu sia kamala’biranna la parrang lako kalemu.

3Mintu’ bangsa la umpengkara’pai arrangmu sia mintu’ datu umpengkara’pai kamarorrongan bu’tu dio kalemu.

4Bangunanni tu matammu, tiroi tiku lao: la ma’balole’ tu tau iato mai sirampun lako kalemu; iatu mai anakmu muane la sae dio mai padang mambela sia iatu mai anakmu baine la sae duka dikepak.

5Attu iato la mutirro sia la dukku-dukku tu rupammu situang kaparannuan, iatu penaammu la tiakka’ parannu kapua, belanna iatu kasugiranna tasik ma’palulakomo kalemu sia iatu iananna mintu’ bangsa la rampo duka lako kalemu.

6La nasamboi unta ma’baanan tu mai padangmu, iamotu unta mangura dio mai Midian sia Efa; la sae tu tau sola nasang dio mai Syeba umbaa bulaan sia kemenyan sia la umpa’peissanan penggauranNa PUANG tu sipatu dipudi.

7Mintu’ dombana Kedar la dipopa’misa lako kalemu sia mintu’ domba lakinna Nebayot la dirambangko ammu poapai; la dipalangngan inan pemalarangKu, anna dipemalaran napopaiman penaangKu sia iatu banua mala’bi’Ku la Kupamala’bi’.

8Mindara tu mettia’ sae susi salebu’ sia ten to bu’ku’ mettia’ lako tobanna?

9Belanna Aku la napeagi tu to ma’biring tasik; na iatu mai kappala’ dio mai Tarsis iamo bunga’na sae umbaa mintu’ anakmu muane dio mai padang mambela; la nabaa duka tu mai salakana sia bulaanna, la umpangke’ sanganNa PUANG, Kapenombammu, To maserona Israel, belanna Napakala’bi’ko.

10Iatu to sae la umbangun pole tembo’mu sia iatu mai datunna tau iato mai la umposara’ko, belanna diona kare’dekangKu angKu pa’dikkimoko, apa diona kamasorokangKu angKu katuru-turuimoko.

11Iatu babanganmu la tibungka’ bang, la keallo la kebongi tae’ nala titutu’ len, anna bangko tau tama tu iananna mintu’ bangsa sia iatu mai datunna nabumbun boko’na tama.

12Belanna iatu bangsa sia kadatuan noka mengkanorong lako kalemu, la sabu’ sia iatu bangsa iato manassa la dimangsanni.

13Iatu kamala’biranna Libanon la rampo lako kalemu, iatu kayu sanoba’ sia darda’ sia buangin pada-padai la umbeloi to’ inan maindanKu sia la Kupamala’bi’ tu inan pelleseangKu.

14Iatu anak to umpandasako dolona la sae mengkanorong lako kalemu sia iatu mintu’ to mangka umbelle’ko la tukku menomba diong to’ lentekmu, anna gente’ko: Kotana PUANG, iamotu Sion To maserona to Israel.

15Iatommu disitampei pirambongi’ sia disayu pallan, naurunganni tae’mo tau unnolaiko. Akumo tu la umpamala’bi’ko sae lakona sia Kupadadiko kasendean disituran-turananni.

16Sia la muiru’ tu bumbunganna mintu’ bangsa sia la mususu tu susunna datu baine, ammu issanni, kumua Akumo, tu PUANG, To pakarimmanammu, sia Pela’bakmu, To makuasanna Yakub.

17Bulaan Kubangko sondana tambaga sia salaka sondana bassi sia tambaga sondana kayu, sia bassi sondana batu; sia kamarampasan Kupadadi to ma’parentamu sia kamaloloan Kupadadi to umpayo-payoiko.

18Tae’mo dirangi len tu kama’parukuan lan tondokmu, ba’tu kasanggangan sia kamasolangan lan lili’mu, sangadinna iatu benteng tembo’mu la mugente’ kasalamaran sia iatu babangammu Kama’pudian.

19Iatu allo tae’mo mupoarrangi ke allo sia iatu bulan tae’mo nala umpadukkuangko arrangna; sangadinna PUANG la mupoarrang matontongan sia Kapenombammu mupomala’bi’.

20Tae’mo nala lambun tu allomu sia tae’mo nala pu’pu’ tu bulanmu, belanna PUANGmo tu mupoarrang matontongan sia rampo randannamo tu mintu’ allo kamasussammu.

21Iatu taummu la malambu’ sola nasang sia la umpomana’i te padang iate sae lakona; iamotu misa’ taruk tu Kutanan kalena, misa’ pengkarang limangKu, dikua anna pakala’bi’Na’.

22Iatu bittikna la memba’ka’, naurunganni mendadi misa’ pa’rapuan sia iatu madiongna la mendadi misa’ bangsa kapua; Akumo, tu PUANG la umpogau’i madomi’, ke attunnami.



 <<  Yesaya 60 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel