Kasirarian dio Gibeon. Yosua untalo tondok Kanaan lo’na lu
1Narangimi Adoni-Zedek, datu Yerusalem kumua natalomo sia nasabu’i Yosua tu Ai butung pepayu – susitu napogau’ lako Yerikho sola datunna, susi dukamoto napogau’ lako Ai sia datunna – sia mintu’ to Gibeon sikaelomo to Israel natorromo dio lu tu tau iato mai.
2Mataku’ tonganmi tu tau iato, belanna iatu Gibeon kota kapua, susi misa’ kota kadatuan, mandu kapua ia na Ai, sia mintu’ taunna muane lalong nasang.
3Iamoto mesuami tu Adoni-Zedek, datu Yerusalem, lako Hoham, datu Hebron, sia lako Piream, datu Yarmut, sia lako Yafia, datu Lakhis sia lako Debir, datu Eglon, nakua:
4Ke’de’komi mai ammi tunduina’, anta taloi tu Gibeon, belanna sikaelomo Yosua sia mintu’ to Israel.
5Iamoto sirampunmi te lima datu to Amori anna ke’de’, iamo tu datu Yerusalem, datu Hebron, datu Yarmut, datu Lakhis sia datu Eglon sola mintu’ surodadunna, napatama limbui tu Gibeon sia nararii.
6Pakalan mesuami to Gibeon lako Yosua dio to’ tenda dio Gilgal, nakua: Da misa’biangangkan te kami taummi, sangadinna la rampokomi madomi’ ullendokangkan sia untunduikan, belanna iatu mintu’ datu to Amori tu torro dao lu buntu, sirampunmo la ullaoikan.
7Ke’de’mi tu Yosua dio mai Gilgal, la ia sia mintu’ surodadu nasolan, mintu’i to barani lalong.
8Ma’kadami PUANG lako Yosua, Nakua: Da mukataku’i tu tau iato mai, belanna la Kusorong tama kuasammu, moi misa’ tu tau iato tang nasara bendan dio tingayomu.
9Tang dikapang-kapang tu Yosua nalaoi tu tau iato mai, belanna situ’turan bongi lumingka dio mai Gilgal.
10Napatangma’rundunammi PUANG tu tau iato dio tingayona to Israel, naurungan napissanni natalo tu tau iato dio Gibeon sia naula’ ma’palulako tanete mellombokna dio Bet-Horon sia natalo sae lako Azeka sia Makeda.
11Iatonna mallaimo tu tau iato mai dio mai tingayona to Israel sia umpolalanmo mennaa’na Bet-Horon, Naurannimi PUANG batu kapua dao mai langi’ sae lako Azeka, namate tu tau iato; iatu to mate narua batu mandu buda na iatu to napatei pa’dang to Israel.
12Attu iato ma’kadami Yosua lako PUANG to allo Nanii PUANG ussorong mintu’ to Amori lako to Israel sia ma’kada dio tingayona to Israel, nakua: E! matanna allo, tadangko dio Gibeon, sia iko e! bulan, diong lombok Ayalon!
13Tadangmi tu mata allo sia iatu bulan torromo sae lako mangkanna tu to buda umpabala’i tu mai ualinna. Tang disura’raka te apa iate lan sura’na to Bulo Sanglampa? Tadangmi tu mata allo lan tangngana langi’ sia tae’ namadomi’ lambun.
14Tae’ bangpa ia allo susito la dolona la undinna, tu Nanii PUANG umpalaloi tu palakunna misa’ to lino, belanna PUANG untundui tu to Israel parari.
15Sulemi tu Yosua sia mintu’ to Israel nasolan lako to’ tenda dio Gilgal.
16Apa iatu datu sola limai mallai umpembunian kalena tama lo’ko’ dio Makeda.
17Naparampomi tau lako Yosua, nakua: Diapparammo tu datu lima membuni lan lo’ko’ dio Makeda.
18Ma’kadami tu Yosua, nakua: Lolinni tu batu kapua lako to’ baba lo’ko’ sia suai tu tau dio babana ungkampai.
19Apa iate kamu da mimasalio, sangadinna ula’i tu ualimmi, sia laoi tu to dio boko’na: da mipopa’elo’nai tama tondokna, belanna Nasorong PUANG, Kapenombammi, tu tau iato tama limammi.
20Iatu Yosua sola mintu’ to Israel napissanni untaloi tu tau iato mai, naurungan mangsan nasang, apa den duka sia tu ba’tu pira-pira tilendok namale tama kota ditambakuku.
21Sule marampa’mi tu mintu’ to buda lako to’ tenda, tu nanii Yosua dio Makeda; moi misa’ tau tae’ duka umbellu’i tu mintu’ to Israel.
22Ma’kadami tu Yosua, nakua: Bungka’i tu tutu’ lo’ko’, patassu’i tu datu lima lan mai lo’ko’, ammi solanni lako kaleku.
23Napogau’mi tau susito, napatassu’i tu datu lima lan mai lo’ko’, nasolanni lako kalena, iamo tu datu Yerusalem, datu Hebron, datu Yarmut, datu Lakhis na datu Eglon.
24Iatonna solammi tau tassu’ tu datu iato lako Yosua, natambaimi Yosua tu mintu’ muane to Israel, anna ma’kada lako mintu’ pangulu surodadu, tu nasisolan male, nakua: Malekomi mai, patoppo’i lentekmi tu sokkongna te mintu’ datu. Mengkareke’mi tu tau iato, napatoppo’i tu lentekna dao sokkongna datu iato.
25Ma’kadami tu Yosua lako, nakua: Da mimataku’, da mimasussa, sangadinna la batta’komi sia lalong, belanna susimoto tu penggauranNa PUANG lako mintu’ te uali mirarii.
26Mangkato napateimi pa’dang Yosua, nasulai dao lentong lima, namanda’ bang tisula sae lako makaroenna.
27Iatonna la lambunmo allo, mesuami Yosua umpopengkalaoi tu batang rabukna datu iato dao mai lentong, napembuanganni tau tama lo’ko’, tu nanii membuni; napanniimi ba’tu pira-pira batu kapua tu baba lo’ko’, tu dio siapa sae lako allo iate.
28Allo ia dukato nataloi Yosua tu kota Makeda, napatei pa’dang tu mintu’ tau lan sia ia duka tu datunna; nasabu’i tu mintu’ issinna sia mintu’ kepenaanna lan butung pepayu, moi misa’ tae’ nalussuran sia nagau’ tu datu Makeda susitu penggauranna lako datu Yerikho.
29Mangkato tarru’ liumi male tu Yosua sia mintu’ to Israel nasolan dio mai Makeda lako Libna, anna sirari Libna.
30Nasorong dukami PUANG tu kota iato sia datunna tama limanna to Israel. Napatei pa’dang tu mintu’ issinna sia mintu’ kepenaanna lan; moi misa’ tae’ nalussuran sia nagau’ tu datunna susitu penggauranna lako datu Yerikho.
31Mangkato tarru’ liumi male tu Yosua dio mai Libna lako Lakhis, sia mintu’ to Israel nasolan, anna patama limbui sia nararii.
32Nasorongmi PUANG tu Lakhis tama kuasanna to Israel; natalomi tonna allo ma’penduan sia napatei pa’dang tu mintu’ issinna, iamotu mintu’ kepenaanna lan, susitu mintu’na mangka napogau’ lako Libna.
33Attu iato ke’de’mi tu Horam, datu Gezer la sae untundui Lakhis, apa natalo Yosua sola mintu’ taunna, naurungan moi misa’ tau tae’ bang nalussuran.
34Mangkato tarru’ liumi male tu Yosua sia mintu’ to Israel nasolan dio mai Lakhis lako Eglon, anna patama limbui sia nararii tu tau iato mai.
35Natalomi tonna allo ia bangsiamoto sia napatei pa’dang tu mintu’ issinna; iatu mintu’ kepenaanna lan nasabu’i butung pepayu tonna allo iato, susitu mintu’na mangka napogau’ lako Lakhis.
36Mangkato ke’de’mi tu Yosua sia mintu’ to Israel nasolan, dio mai Eglon lako Hebron, anna rarii.
37Natalomi sia napatei pa’dang tu mintu’ issinna, susi duka tu datunna sia mintu’ kotana sia mintu’ kepenaanna lan; moi misa’ tae’ nadilussuran, susitu mintu’na mangka napogau’ lako Eglon; nasabu’i nasang tu mintu’ issinna sia mintu’ kepenaanna lan butung pepayu.
38Mangkato tibalikmi tu Yosua dio mai sia mintu’ to Israel nasolan, ma’palulako Debir, anna rarii.
39Natalomi sola datunna sia mintu’ kotana, napatei pa’dang tu mintu’ issinna; mintu’ kepenaanna lan nasabu’i butung pepayu, moi misa’ tae’ nalussuran; susitu mintu’na mangka napogau’ lako Hebron, susi dukato tu penggauranna lako Debir sia lako datunna, susi duka tu mangka napogau’ lako Libna sia datunna.
40Susimo kanataloanna Yosua to tu mintu’ tondok, iamotu tondok dao lu buntu sia Padang Rampe sau’na sia iatu Padang Merrantena sia iatu mennaa’na sia mintu’ datunna; moi misa’ tae’ bang nalussuran, sangadinna nasabu’i nasang tu mintu’ kepenaanna butung pepayu, situru’ tu pepasanNa PUANG, Kapenombanna to Israel.
41Natalomi Yosua tu tau iato mai randuk dio mai Kadesh-Barnea sae lako Gaza, sia mintu’ tondok Gosyen sae lako Gibeon.
42Mintu’ datu iate sia tondokna pissanri natalo Yosua, belanna PUANG, Kapenombanna to Israel, untundui to Israel parari.
43Mangkato sulemi tu Yosua sia mintu’ to Israel nasolan lako to’ tenda dio Gilgal.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel