PUANG manna tu umpa sae uran
1Palakui tu uran dio mai PUANG, ke attunnai uran tampak, PUANG umpadadii tu kila’ mellepa’ sia la Napasaean uran kamban tu tau iato mai, sia Nakamasean mintu’ tau tu tananan maluna dio pa’lakna.
2Belanna iatu balo’ tau umpokada apa tae’ bua’na, iatu to pakita-kita untiro patiro mendeata kamorang-morang, unnulelean ba’tu pira-pira tindo ma’pakena, sia umpokada pa’pakatana tae’ gai’na. Iamoto nasalamba-salao lu lako lu dio bang mai tu tau iato mai susito tuntunan domba, tu lan kapussakan, belanna tae’ to mangkambi’na.
Diona kapataloan sia kasuleanna to Israel
3Dukkumi tu kasengkeangKu lako mintu’ to mangkambi’, sia la Kuukung tu mintu’ domba laki, apa PUANGna mintu’ ma’dandan maritik ungkaritutui tu domba ma’baananNa, iamotu to Yehuda, sia umpadadii susi darang malinta’ lan kasirarian.
4Dio mai tau iato mai la nanii bu’tu tu batu petau, dio mai tau iato mai la nanii bu’tu tu tana’ tenda, dio mai tau iato mai la nanii bu’tu tu pana dipake lan kapararian, sia dio mai tau iato mai la nanii pada bu’tu tu mintu’ to paa.
5Sia iatu tau iato mai butung to lalong, tu ullese so’mak dio lu lalan lan kasirarian; ondongpi parari tu tau iatu mai, belanna Narondong PUANG, apa iatu mai to ussakei darang la kasirisan.
6Tenmoto la Kupamatoto’ tu to Yehuda sia urrampanan to Yusuf, ondongpi, la Kupasulei tu tau iato mai, belanna Kukamasei, sia iatu a’ganna la susi tonna tae’pa Kutibei. Belanna Akumo tu PUANG, Kapenombanna, sia la Kuperangii tu tau iato mai.
7Attu iato iatu tau iato mai la susito lalong lu dio mai Efraim, sia la parannu tu penaanna susito napobua’ uai anggoro’; sia ia duka tu mintu’ anakna muane la untiroi, anna parannu sia sende paiman tu penaanna diona PUANG.
8La Kuongli’ tu tau iato mai sia la Kupasirampun, belanna la Kurampanan tu tau iato mai, sia la memba’ka’ susi dolona.
9Moi angKu patisambo’i tu tau iato mai dio lu mintu’ bangsa, apa dio lu tondok mambela manassa la nakilalaiNa’, iamoto la tuo tu tau iato mai sola mintu’ anakna sia la sule.
10Ondongpi la Kusolan sule tu tau iato mai lan mai tondok Mesir sia la Kurampun dio mai Asyur, angKu solanni lako padang Gilead sia lako Libanon; apa tang la ganna’mo lako tau iato mai.
11Attu iato iatu tau iato mai la ullamban tasik lan kapussakan sia la ussambakki bombang tu tau iato mai lan lu tasik; sia mintu’ malikunna Nil la marangke. La susimoto tu mintu’ apa napomatampo Asyur la songka, sia iatu tekken kapayunganna Mesir la pa’de.
12La Kupabatta’ tu tau iato mai tete dio PUANG, anna lolang tete dio sanganNa, kadanNa PUANG.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel