1Sali atamon emberuk lit sembahyang uruk ane fahet, o sembahyang uruk ibam ap ininggik fam witukon fahet alem haloho imbibag.
2O sabo fanowon ino hili ambol fil witfahon ino fam iral hunduko emberuk angge men suburu usa inap narukon fahet emberuk ambeg e pila tuwaloho wirig latfag. Hili ambol fil werehon unuk te "Fanoma" suwaleg latfag.
3Sok pirenon latuk asum aluke fil hili misig wirig latfahon unuk te "Usama" suwaleg latfag.
4Hili ino fam indok munggaltuk angge ili rurukon men Allahn sali ibahon haharoho werehon kilaptuk angge peti ino ili ruruk angge fam hililip toho wiroho foroho latfag. Peti ino undama suburu "Mana" kubag ili rurukon fam pilabehon men hun Harun uwanggun tomuk asimit wilibihon men helep wene numen hahatfahon itano men wereg latfag.
5Peti emberimu malaikat piren umbagpag turukon Allah tuma wereg pukag ulug enehangge imbibag. Malaikat ununuk kerub itano eneherabulen Allahn siyag ane turukon elehap turuk ambeg fanoma ino hondo reg latfag. Alem ari fahet niren ketiya tuma tindiloho ul fug.
6Fanoma men Usama men ari roho welamag ulug alem haloho imbibag. Imam inap arimanowen Allah fahet turuk ane tul ulug likiya hupmu hili ambol filon ino fam eneg kuruk latfag.
7Hili eke alukemon fam ino we imam onowe suwon amu eneg mo ilig am wirig am turukmu misig fam we misihim sambil eneg kuruk latfag. Allah fahet esetuk ambohom amep ino fam inggareg fahet eke, otsiyen siyag ane hirahoman turuk latuson fahet eke inggik fam seneko eneg kuk teg latfag.
8Ari turuk latfahon fahet Allah hime fanowon inowen hiyag nisaruk lit, "O hili ambol filon weregma o usama ino kurukon fahet uwan sok husig eleg," ulug selehap nisaruk.
9Ari nit ketiya welaheyon fahet wirimangge wereg. Ari hag toho aben Allah fahet wam esetuk lit hubu lahaptuk angge famen it inindimu siyag angge werehon let toho fanowap enebuk fug teg.
10Suburu ik naruk angge fahet na fug urukon men enebe mun angge man angge umako werehon men obog toho alem haloho imbibahon arimano kinangmonen turuk ane fahet haloho imbibag. Allahn mun angge man angge alem kerap tirisi angge re alem tam haloho imbibahon ari eleg atisi.
11Kristus watfahon ino fobik fano-fano angge inam aruhuwon fahet imam suwon aruhuk ulug watfag. O sabo suwon mondabi fanowon ap ininggiken witfag fuhon ino fam kibareg watfag. Ihi ane ari mun angge man angge wal tibag angge tuma werehon fam wirig eleg.
12At ino hili usama ino kuruk lit wam domba men sapi men enemep wibareg kibag fug, we Inggareg amu amep wibareg nit hundig-hundig fano roho welamuhubon ino fahet misihim kibareg siyahon inggikmuwen mondabi fano welamuhup ulug windar nenepfag.
13Wam domba men sapi men yuhambukon enemep hinanggoho ap siyag ane turukon fanowap enebul ulug ketne isaruk lit sapi indok yaltukmu ul atukon ino enebene hilil isarukmu enehap sel ke eneg puhun atuk latfag.
14Wam amep fam fano amul ulug turuk latfag angge famen Kristus amep men ambi reg eleg. At ino Hime fanowon mondabi werehon Ubam weregma Nebe fanowon eneg Allah fahet embemin ulug imbibag. Niren siyag-siyag ane turuk lit saplangge turuk ane At amep inowen elehap turuk lit ninindi anggen pulmuwon ho roho fanowap nenebuhu fug ano? Fanowap nenebuhumu Allah mondabi Oluk werehon Amingmingangge welamuhuk.
15Allah ele sali keron ino imbibagma ap wol eneptukon arimano fanowon og isahuk ibahon ngi roho welamag ulug Kristus pulmu wereg lit ler eneptuk. Allahn ele sali atamon imbibahon pisan isaruk latfahon arimano fanowap enebuhuk ulug At ino war atfag.
16Aben lin isaruk angge fahet hulul ulug enele sahaltuk ambeg ino ap anggengge lin isalug war atukon wereg.
17Ap ekeyen nanggengge ap winon amag ulug suwesingga haharoho embelug war atuk halug eneg ap oluk werehonen anggengge hila reg, ebe oluk weregma aren angge hila fug teg.
18Ari hag toho Allahn ele sali atamon imbibahon ino mep wamburukon fam eneg teko la reg.
19Musa inowen Allahn alem obog toho ari komo heneptuk ulug ap obog toho hiyag isibareg wam sapi men domba yuhambukon enemep men ik men mangno roho wibareg domba oruk huluwon men musan inggila men wibareg suwesingga ino fene oho ap obog toho enebene oho mep ino ketne enebil laruk latfag.
20Ketne enebil laruk lit, "Allahn ele sali hit hunubam emberukon mep aru fam wereg," uruk lit
21o sabo ino men mun angge man angge undama werehon sembahyang fahet foroho latfahon arimano obog toho fene ketne enebil laruk latfag.
22Musa wene fam alem haloho imbibahon hikit toho mun angge man angge mep fam eneg fanowap turuk. Ap unubam mep hililtuk elehon iren siyag ane turukon eleg am fug angge wereg.
23Mun angge man angge alem poholma weregma wirimangge kinangma werehon arimano mep fam eneg fanowap eneptuk latfag. Alem poholma wereg angge arimano fano amag peruk halug hubu lahaptuk angge mondabi palimu werehon ari fam eneg fano atuk.
24Kristus ino o sabo fanowon ino fam kuruk lit o ebe poholma weregma wirimangge ap ininggiken witfahon ino kibag fug, nit ninibil atuk lit Allah alukema lamin ulug poholma pikit kibag.
25Mo ilig am wirig am turukon fam hundig-hundig imam suwon o sabo fanowon ino fam kuruk lit inggareg amep walug kuk fug angge amu angge amep eneg walug kuruk latfag. Ari hag toho Kristus ino Ninggareg nebe embemin ulug kuruk lit iren hundig-hundig kuruk latfag hag toho kibag fug.
26At ino ari hag toho kelepma hahen pohol kinang wal tibag sambil ino ak tebelepteg aben Kristus ino witil-watil laruk lalep. Ari telep angge famen ketiya obog aruhu li welahe ulug we misihim eneg inam atfag. Ninggareg nebe embeminon ari fam aben siyag ane turukon elehap timin ulug watfag.
27Ap kinangmon we misihim war amuhupmu Allahn alem unubam werehon kong tuhu.
28Ari hag toho Kristus ino ap kinangmon anggolowen siyag ane turukon Anden ha ruhuk ulug Inggareg ebe emberuk lit misihim war atfag. Fobik inggik pireneg angge waruhu sambil ino siyag ane turukon nin eke ha rimin puk fug angge ap An yet Nasug lit werehon mondabi fanowon ino it og isamin ulug waruhu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel