Alkitab Mobile SABDA
[VER] : [YALI]     [PL]  [PB] 
 <<  Wahyu 9 >> 

1Malaikat fuwabon inowen waruk teltukmu anden yet harukmen suhal misig poholman kinangma wambik waharukmu yet harikik. Turuhun elma war atuk ambeg husuruk angge inggikmu og utusa.

2Turuhun ele ino husurukmen indok hubu muhul elma inowen wilip atuk lit mo men pohol men indok hubu inowen hililip tirisimu hik atisi.

3Hubu ino famen herenangge anggolo hik heheg wilip atuk lit it arimano kirimbul onolokon ayeg hag toho welatusa.

4Herenangge arimano fam hiyag isaruk lit hoholangge men inggilangge kinangma wilip atuk angge men e inggila men na fug, we ap Allahn tohon enehangge inilahe ik umaho elehon eneg fato eneptuk lamuhup.

5Fato eneptuk lamuhup ulug hiyag isaruk lit pinggi unusuk fug angge enehap selma eneg fato enebil larukmen eneg pikalem fuwaben aruhu. Fato eneptukmu ouk hahup ane kirimbulen ap fato eneptukmu ouk turuk hag toho ouk eneptuk laruhu.

6Ari turuk lamuhupmu ap arimanowen enehap ouk-ouk war ala peruk lit war atuk ane yami ruhup angge famen hiyahakup fug, eleg ala puhup angge famen eleg amuhup fug.

7Herenangge arimano aben tog abuk oho lit wam kuda emberimu laruk hag toho wereg lit ununggul hobog ili ruruk angge hobog teg lit onorohole ap onorohole hag latusa.

8Onoruk hiyap onoruk yaron hag tegman eneyeg olomene ayeg hag tegma

9enemig sing wan teg hag latusa. Eneherabul aplohok tog abuk oho lit wam kudan kou lisulug larukmu uyug aplohok turuk hag latusa.

10Eneheye kirimbul olombik hin morog teg hag toho teg latusa. Onolombik atog ine fam ap unusil larukmen eneg pikalem fuwaben atuk.

11Malaikat turuhun ele forohowon ino it inikni wereg. Malaikat ino unuk Ibrani enele fam Abadon suwalegma Yunani enele fam Apolion (nit nenele roho fu eneptuk angge) suwaleg.

12Fong watuk ane atamon teko larisimu pirenehon men hinahanehon men fong watuk ane teko lahu.

13Malaikat falfalikon inowen waruk teltukmu anden hol harukmen andimbuk uhan hubu lahaptuk ambeg ili rurukon Allah aluke fil werehon fam wilibihon ino feneyen ele urukmu holtikik.

14Hol harukmen malaikat falfalikon waruk senehon ino fam uruk lit, "Ik suwon Efrat ayegma malaikat uhan hele wareg lit werehon itano lol enebin," urukmu holtikik.

15Ari irisimu malaikat uhan itano mo ari fam pikalem ari fam hup sakan ari fam ap kinangmon minggiroho pinggi unusuhup ulug sali winako foroho latuson itano lol enebik larisi.

16Lol eneptisiyon itano sehen seneg inap wam kuda emberimu heriyegma teng-teng angge mondeg angge waharuk latusa. Teng-teng angge (dua ratus juta) wereg ulug winaharukon holtikik.

17Anden fulu roho yet harukmen wam kuda emberimu ap anggolo heriyegma enesing wan teg latuson arimano sing il indok ambulpul hahon men piyanu paleg lit hubu mik-mik angge turuk hahon men puhulik palehon men wan teg angge waharukmu yer isarikik. Wam kuda ununggul arimano olomene olokon hag tegman enembilik ele keyen indok ambulpul men hubu men kinang ahe amben siyahon hag toho wilip atuk latisi.

18Wam kuda enembilik ele keyen wilip atuk latisiyon arimano indok men hubu men ahe amben siyahon men wilip atuk lit tohen hag toho ap minggiroho arimano waroho lin isaruk latisi.

19Wam kuda arimano enembilik men eneheye men inine anggolo reg latisi. Eneheye arimano pisanggo hag teg lit ununggul weregma eneyeg arimanowen ap anggolo siyahap eneptuk latusa.

20Siyahap eneptuk latusa angge famen ap winon war atusa fuhon arimanowen ininggik fam siyag ane turuk latuson arimano embeserusa fug. Mungguwat siyahon fam usa ane turuk lit ili ruruk lit umbagpag turuk angge iren laltuson arimano fam usa ane turuk lit posiyemanggen men e men helep men laltuson inilen yet ha fug tohon inisanggowen holuk fug tohon unuwag la fug tohon wereg angge famen ninikni uruk latusa.

21Iren ari turuk lit ap pinggi watuk ane men pamongge unusuruk ane men pabi ruruk ane men yoholiyangge waruk ane men obog toho embeseruk latusa fug.



 <<  Wahyu 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel