Dual Panel1Sane yé nut subot men yerasul do, men anato tepsu Kristus bi pakwerut sor. Yefun Allah bes men wa men mu ki subot An bi sukdu-i. An grem An bi sukdu-i su men. Suga nyim tuya Yefun Allah bi sukdu ne yo bor wa yé mwa jam nde, wo su ré men ki sukdu ne rer wa yé mwa jam it.
2Ye bes yetu ge dik yo gum wa ben suk yo, ye ne bere jammo ye gato bes an ne sor, an yo brek kadit wokgan yo dom nde.
3Sane kapre nin si yepasye ki ji gum ibit mo suk gato ji ben ne, ji yo jammo nin bi sukdu-i nde. Suk gato ji ben ne do ibit bado, ndo bado, ji dakai ndobot ji dakai mone dom nde.
4Wo ji nut do, ji yo ben kwa yo gato siri mo nde. Sarewo kapre ji nut sane, tepsu ji gum ndo mone nde tó, bere ji bi Yekwesu Yefun Yesus gato bes ji, An dakai ndobot ji sor. Bere Yefun Yesus dakai anato ki ji gum ndo, bado ji gum ibit bado mo suk gato ji ben ne sor.
5Sane su ré yo, men ki ye yi gum ibit mo suk yo daret nde. Kam gato men ki ye yi gum ibit anare nde tó, wo men eswa men bi Yekwesu Yefun Yesus ma mo bur ré, ete Yefun dakai kibot men yetu mwa ne. Bere Yefun Yesus rek suk mwa gato men gurik mo pe gato ndendu kadit yu ne bor wa yé mwa jam. Bere Yefun Yesus rek yé mwa ne sino bi sukjimnut-i ne bor wa yé mwa jam dom. Sane, sugane Yefun Allah un men yé gato ben sukndo mo suk gato men ben ne.
6Sane men bi nji, men bi nyanggon, ji si Apolos yo ki ye yi gum ibit mo nde, wo men ka we nai sukjimnut sa gado ji ki ne, bere Yefun Yesus ma ete kibot men yetu sor. Men ka we nai sukjimnut ne subere kadum os ndo wa nin. Nin waii nai sukjimnut saga men dom et, subere nin jambot sukdu kwa yo gato duwe do, "Men ben men bi suk-i tepsu Yefun Allah bi sukdu et, men wai kadit Yefun bi sukdu wokgan yo dom nde." Sane bere nin yo bes yetu ge dik yo gum kok wai kadit ye yi nde.
7Sane ji ndobot nin kadik-kadik sare do, je u anato bes nan gum kok wai kadit ye yi ne? Te suk mwa gato nan ku ne, nan dakai ben suk anato nan ku suk ne bado? Sane nde! Suk mwa gato nan ku ne, sangge Yefun Allah anato syo nai nan. Sane nan bes nan gum mo suk gato nan ku ne kok wai kadit ye yi wa suma ne?
8Mban! Nin nut do, nin sa, ku suk mwa gato nin mit mone. Yo mo nde re. Nin nut do, nin sa, ku suk mwa wai o re. Yo mo nde re. Nin nut do, nin sa, tepsu yepasye it. Yo mo nde re. Nin nut do, nin sa, ku gum yepasye, wo men gum yepasye tepsu nin nde bado? Sane nde. Nin do gum yepasye gato jowa nje mo bur dik yo su sangge sa, men dom iwa men si nin jowa nje mone sino. Wo suk yo mo nde.
9Ji dakai bi sukjimnut-i do, men yé gato Yefun Yesus bes gum yerasul ne, Yefun Allah ben ye yi nut mo men do, men gum wok mo bur sor re. Yetu nut do, men yeibit. Yetu si malaikat mwa ne sino sokwa ye ben sukibit nai men ket kwayo-kwayo, ye syokom ye gu men deyo kwop. Yetu si malaikat mwa ne mit iwa sokwa men ku sukye sane sor.
10Men ben Kristus bi suk-i anato yé ki do, men jimgon, wo nin nut do, nin sa, jam suk mwa, we nin onyar kem mo Kristus bado? Sane nde. Nin nut do, men yo nggi nde, wo nin sa, nggi bado? Yo mo nde re. Yé ki men gum ibit re, wo nin sa, yé bes nin gum kok o re.
11Kadit nyim kom more, men on de, men yewa sugit, men yewa syur. Men bi san syik mo men da. Yé ben sukye nai men. Men yo ku nu wa men kem pe mo nde.
12Men ben suk, men kamba wa men meret suk gato men yewa ne. Yé dufo mo men it yo, men ki suk gato ndo satu nai án sor. Yé do ben sukye nai men it yo, men misyar sor.
13Yé do ki men gum ibit ket kwayo-kwayo it yo, men ki men bi sukdu-i njep nai yé ne satu. Kom mo kam ré, yé nut mo men do, men tepsu sukkwik mo bur ré sor, yé mwa ne bariwa men o re.
14Ji krom sukdu ré, ji yo iwa ji ben nin damen nde, wo ji nut mo nin do, nin tepsu ji bi pa, sane ji duno nin.
15Ji anato tepsu nin bi ai, we ji ma ki sukdu subot os ndo gato Yesus Kristus kak wa men yetu nai nin su futmo ne. Or o kapre yetu ge ribu musyu dik yo o waii duno nin su Yefun bi sukduno wari ne, ji anato duno nin su futmo ne, sane ji tepsu nin bi ai ne sor re.
16Sane ji kiwa nin ben nin bi suk-i tepsu os gato ji kadum wa nin ne sor.
17Sane ji syogat Timotius ba ku nin mone subere an duno nin subot suk gato ji ben ne. Timotius anato tepsu ji bi pa gato ji jimnotku. Pa ne ben bi suk-i ri tepsu Kristus mit. Bere Timotius duno nin satu o subere nin napawa suk gato ji ben tepsu ye gato onyar kem mo Yesus Kristus ne. Ji dom duno nje mo nu ari mwa mo pe mwa ne sino gato ji mu mone, subere án waii benbot suk gato ji ben ne.
18Nin yé bok yo mone mit at, ete bes nggwa kok, we yé bok ne nut do, ji yo ba ku nin o nde.
19Sarewo Yefun do imo yo, yo nam nde ge, ji ba ku nin mone re. Su kam ne bere ji dakai ku ye gato mit at, ete bes nggwa kok ne. Sane bere ji jam ket suk gato yé bok ne ki su án syokwet sor nde, wo bere ji me suk gato án ben ne dom et.
20We sare, Yefun Allah do jowa yetu ge dik yo it yo, ye ne yo ki subot Yefun bi sukdu-i su an syokwet sor nde, wo bere an benbot dom et.
21Sane nin iwa ji ba ku nin ete duno nin sa u ne? Ji duno nin sisu ji ot is nin, bado, ji jimnotku nin, ete ji duno nin sisu njep, e?