Alkitab Mobile SABDA
[VER] : [ABUN]     [PL]  [PB] 
 <<  Efesus 6 >> 

1Pa wokgan jammo sukdu gato ji krom ré et: pa ben suk gato tep, pa jammo pa bi ai si pa bi im et.

2Yefun Allah syaugat nin pa wokgan do, "Pa jammo pa bi ai si pa bi im." Sukdu gare tepsu kwa ketke gato Yefun Allah tom suk yo su, sare do,

3"Subere suk mwa ne kas sisu ndo, bere pa kem nam mo bur ré."

4Nin, yenggras gato bi pa ne, nin ben suk gato ben pa maskwa mo koirut daret nde, wo kadit pa ne wok kom mo pa ne sye ne, nin duno nin bi pá-i su men bi Yekwesu Yesus Kristus bi sukduno ne, ete nin ki subot sukduno ne tepsu suknapa wa nin bi pa jam pe sor.

5Pakwerut, nin jammo nin bi yenggras mo bur ré et. Nin ben suk gato nin bi yenggras syogat nin ben ne yo, nin nyuwa nin bi yenggras sor. Nin ben suk wa nin bi yenggras su nin mit dik si nin onyar dik tepsu nin ben suk wa Kristus et.

6Pakwerut, nin bi yenggras sokwa nin ete nin ben suk mone, wo nin bi yenggras yo sokwa nin nde ete nin yo ben suk o nde, bere siri re. Nin ben suk subere nin bi yenggras sokme ete un nin mone sor nde, wo nin anato tepsu Yesus Kristus bi pakwerut-i, sane nin ben suk wa nin bi yenggras su nin mit dik si nin onyar dik petok sor. Yefun Allah mit iwa nin ben nin bi suk-i sane.

7Nin ben suk yo, nin ben su nin mit dik si nin onyar dik et. Nin nut do, suk gato nin ben ne, nin ben wa yetu nde, wo nin nut do, nin ben suk ne wa men bi Yekwesu Yesus Kristus dakai.

8Nin ben sane, we nin jam do, kapre nin gum kwerut e, nin gum kwerut nde e ne, bere nin yé mwa ne sino ku sukndo kadit men bi Yekwesu Yesus Kristus mo sukndo gato nin ben ne.

9Nin yenggras gato bi pakwerut, nin ben sukndo su nin bi pakwerut ne tepsu pe gato Kristus imo ne dom et. Nin ki sukot su nin bi pakwerut ket kwayo-kwayo nde. Nin napawa do, nin si nin bi pakwerut ne sino bi Yekwesu ka dik mo gu sor. Men bi Yekwesu ne ben bi suk-i su men sino tepsu yu, An bes ge yo gum kok wai kadit ge yo nde, An ben suk su yepasye e, pakwerut e, ye yi e ne, tepsu yu sor.

10Ji bi sukdu ré yo syu o nde, men ti nggi mo suktinggi gato ma kadit men bi Yekwesu Yesus Kristus ne et. Men si An tepsu dik subere An bi suktinggi gato nggi wai ne bor mo men mo suk mwa gato men ben ne sor.

11Men mewa men nggwa kadit biris bi yekwesu gato meret os mwa wa ben kidar men, subere men brek kadit Yefun bi os-i. Men fro men nggwa su suk sato yesukmise fro nggwa su ne wa futmu gu yeko. Men it san gato kewa men kaim, men mu su et. Men gwat men bi sukmise mwa ne sino gato Yefun Allah syo nai men, subere men nggi wai kadit os ibit gato biris bi yekwesu werwa ben kidar men su ne.

12Yeko gato ma wa gu men ne, án yetu nde, wo yeko ne anato suk gato i-mok mó gato werwa jom yetu mo bur ré sato: yerom e, aboksye e, malaikat ibit gato bi suktinggi mo gu nim ne si bur ré e ne. Biris mwa ne sino iwa meret os wa ben men brek wé kadit Kristus bi os-i.

13Sane, su ré men it yesukmise bi suk mwa ne sino gato Yefun Allah fro wa men gu yeko gane su ne, subere biris mwa gato werwa ben kidar men, gato tepsu yeko gato futma wa gu men do ma it yo, men nggiwa syun yeko ne titi wé kadit men. Men it yesukmise bi suk ne subere men ti nggi wa men syun yeko ne sor kom mo pe gato or mó, ete mone men jom Kristus bi sukduno-i ne krat tó.

14Men fro men nggwa pe sor. Men ben men bi suk-i sisu ri-roi petok sor, tepsu men far suk yo mo men on ke anane. Sane dom, men ben men bi suk-i ndo tepsu Yefun Allah mit petok sor, tepsu men it san besi kewa men tunap anane.

15Sane o, men mu kibot os ndo gato Yefun Yesus kak wa men yetu subere ye gato jammo sukdu ne si Yefun Allah kem ndo su yu. Men mu ki subot sukdu ne sor, tepsu men it sepatu anane.

16Sane o, men onyar kem mo Yefun Yesus petok sor, tepsu men jom kweda sye anane. Men jom kweda sye ne subere biris bi yekwesu do werwa kunus men su kunus gato bot ru mó yo, men jom kweda ne yawa kunus su bot ne mu nden wé kadit men kaim.

17Sane o, men jom sukdu subot os ndo gato Yefun Yesus kak wa men kem gesyos ne krat sor, tepsu men bom topi krat gato kewa men su anane. Men jom Yefun Allah bi sukdu-i, tepsu men jom nyom ot de we anane.

18Men jom suk e, men it suk bok ne, men ki suk su Yefun dom et. Men ki suk tepsu suk gato Yefun Allah Gen kadum nai men sor. Sane men fro men nggwa, men werwa men ki suk su Yefun petok sor, men misyar wokgan yo dom nde. Men ki suk su Yefun Allah wa ye gato onyar kem mo Yefun Yesus ne sino petok sor.

19Nin ki suk su Yefun wa ji dom subere Yefun Allah kak ji bi sukjimnut ete syo sukdu gato An iwa ji ki nai nje. Nin ki suk su Yefun Allah subere sukdu subot os ndo gato Yesus Kristus kak wa men yetu ne, gato nyim An gurik ne, Yefun Allah ben ji nggiwa ji ki rek wa yé mwa jam. Nin ki suk su Yefun subere ji ki sukdu ne yo, ji yo nyu nde.

20Yefun Allah bes ji wa ji mu ki An bi sukdu-i subot os ndo gato Yesus Kristus kak wa men mo bur ré, anato ye rai ji, ete ye sok ji mo sel. Sane nin ki suk su Yefun wa ji subere ji nggiwa ji ki sukdu ne, ete ji yo nyu nde, wo ji ki sukdu ne tepsu pe gato Yefun Allah imo ne.

21Tikhikus gato men jimnotku ne, men si an tepsu yedik mo Yefun bi rus-i. An ben men bi Yekwesu Yesus Kristus bi suk-i ne ri-roi tepsu Kristus mit. An yo brek kadit wokgan yo dom nde, an gum kwerut wa Kristus re. Bere an ba ku nin ete an ki sukdu mwa subot ji nai nin, subere nin jam sukdu subot ji, si suk mwa gato ji ben more re.

22Sane ji syogat an ba ku nin mone subere an ki sukdu subot men more nai nin sino jam, subere ben nin mit ndo wa nin jom Yefun bi sukdu-i nggi wai o.

23Men bi Ai, Yefun Allah si men bi Yekwesu Yesus Kristus, ete uttok men sino gato onyar kem mo Yefun. Yefun ete ben men nggiwa men bi sukjimnut sye kas subot yu ete men onyar kem pe mo Kristus et.

24Nin yé gato bi sukjimnut sye kas subot men bi Yekwesu Yesus Kristus sane sor yo or mo nde yo, Yefun Allah ete mewa nin sino sor. Ndo mo nin sor, kadit Paulus


  Share Facebook  |  Share Twitter

 <<  Efesus 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel