Dual Panel1Sane yo, men jam sukdu mwa yé subot yé gato onyar kem mo Yefun Allah ne. Yé gato onyar kem mo Yefun Allah kam nyim ne, yé mwa ne ben sato án wairi wa men, án sokwa suk gato men ben wa Yefun Allah. Sane it yo, men bare suk gato kwawa men ben Yefun Allah bi suk-i wé kadit men et. Men am sukibit gato ut mo men wé kadit men et. Sane suk mwa gato Yefun Allah fro wa men ben ne, men ben sisu men mit dik si men onyar dik et, tepsu ye kas bitanding yu mo perlombaan, ye wergat ye nggwa sisu ye mit dik si ye onyar dik subere ye kas nggi mone sor kom mo pe gato or mó.
2Men ben men bi suk-i yo, men bi sukjimnut kas ri mu kem pe mo Yefun Yesus et, we Yefun Yesus anato kak os wa men onyar kem mo Yefun Allah. Yefun Yesus anato ós men onyar kem pe mo Yefun sane sane sor kom mo pe gato or mó. Yefun Yesus ku sukye mo kwesukwin, sarewo Yefun Yesus simo sor, An yo damen wa kwop mo kwesukwin ne nde. An misyar, we An kok mo kwesukwin sa, An nutbot sukye gato An ku mone nde, wo An nutbot do, kam sari ne ma, bere An mit at ndo nde mo os gato An kak wa men yetu ne o re. Su ré An kem tak Yefun Allah de syim ge, mone An si Yefun jom suk mwa ne sino.
3Men nutbot sukye gato Yefun Yesus ku ne sisu ndo et. Yé bok neya gato ben bi suk-i ibit ben sukye nai Yefun Yesus ndo nde. Sane, ye do ben sukye nai men it yo, men nutbot sukye ne teker eta sor men kaim rere su nde, men kwabom dek bot sukye ne dom nde, wo men simo sor sukye ne or wé kadit men sagato Kristus ben ne.
4Ye da ben sukibit nai nin, ye duwer nin ket kwayo-kwayo mó re, wo nin yo werwa nin ti nggi sor ye gu nin dé sye sor nin kwop mone nde tó.
5Sane dom nin mbrinket sukduno gato Yefun Allah ki subot sukye gato nin ku ne nde. Yefun Allah ki sukdu nai nin si men sino, ye gato tepsu An bi pá-i sare do, "Pa o, Yefun Allah gato gesyos do duno nin mo sukibit gato nin ben ne it yo, nin nutbot sisu ndo et. Yefun do ndantom nin mo sukibit gato nin ben ne it yo, nin nutbot sor nin kaim rere su nde,
6we sare, ye gato Yefun bi sukjimnut sye kas subot ne, bere Yefun duno an mo sukibit gato an ben ne, sane dom, ye gato Yefun nai tepsu Yefun bi pa, bere Yefun kwam mo sukibit gato pa ben ne."
7Sane men fro men nggwa wa men ku sukye tepsu sukduno kadit Yefun Allah et. Men nut do, Yefun Allah tepsu men bi yenggras anato An ben sato kwam men, we sare, yenggras bere kwam an bi pa mo sukibit gato pa ben ne, fe!
8Yenggras mwa ne sino kwam bi pá-i gato ben sukibit, sane Yefun Allah yo kwam men tepsu An dakai bi pá-i nde yo, men gare yo tepsu An bi pá gato sangge nde, wo men tepsu yenggras yi bi pá-i kone.
9Men bi ai gato pe men mo bur ré mó re. Men bi ai ne da kwam men mo sukibit gato men ben ne, ete men bes men bi ai gum kok mone tó. Sane it yo, men bi Ai-i gato mo gu nim ne do kwam men yo, men waii bes An gum kok wai kadit men bi ai-i mo bur ré o et. Men jammo men bi Ai-i mo gu ne subere men kem ndo.
10Men bi ai-i mo bur ré duno men, bergan sor ete yenggras ne duno men tepsu os gato an dakai nut do ndo. Sarewo Yefun Allah duno men tepsu os gato ndo wa men, subere men ben men bi suk-i ndo petok sor, tepsu Yefun Allah ben ne, kwa gato ibit yo mo nde.
11Men bi yenggras duno men, ete kwam men yo, sugane men nut do, yenggras kwam men yo tepsu men mit nde, men kaim yó ete men bi sukjimnut waiyu ndo nde. Sane dom, Yefun Allah syo sukye nai men mo sukibit gato men ben ne yo, men yo iwa nde. Sarewo kom mo rut, men jammo sukduno gato yenggras kwam men mone sa, sukduno ne kak os ndo wa men, anato men ben men bi suk-i ndo tepsu Yefun Allah mit, men kem ndo, men kwabom dek bot suk yo mo nde.
12Yefun Allah kwam men subere ós men muket os gato ndo, sane anato nin nutbot sisu ndo et. Nin ti nggi et. Nin nokwa sukye gato nin ku ne nde.
13Nin werwa nin ben nin bi suk-i ri-roi et, subere nin kak sukibit gato ut mo nin ne wé et. Sukibit ut mo nin yo, nin tepsu ye gato gwes út. Sane nin werwa nin gwes út krat tok o nde, wo nin ge kadit et.
14Sane dom nin werwa nin si yé mwa ne sino kem ndo su yu sor. Nin werwa nin ben nin bi suk-i ndo petok sor, nin ben suk yo gato ibit mo nde. Nin yo werwa ben nin bi suk-i ndo petok sane nde yo, bere nin yo ku Yefun nde.
15Nin mewa yu sawe nin deyo mu brek dari tak Yefun Allah gato ben bi suk-i ne ndo wai su men dakai yi. Nin mewa yu sawe nin deyo gwat os ibit wa nin. Tepsu sukjan gato bi ri mó, ete ri ne waii tok sukjan yi mwa neya, bere te re, nin mewa yu kadit ye gato gwat os ibit gane ma, sawe os ne ben sukye wa nin sino, ete kom mo rut ben nin ibit o re.
16Nin mewa yu subere nin ge dik yo ben siri su nggon daret nde. Nin mewa yu subere nin deyo misyar Yefun bi suk-i sato Esau ben ne nde. Esau yo nutbot Yefun Allah nde anato Esau so sugit mbem dik su an bi sukrok gato bere an ku tepsu pa ketke ne.
17Men jam do, ri ma, Esau mitwa nai an bi sukrok kadit an bi ai, sarewo an bi ai bari re. Kapre Esau wergat su an gro rom, an wo gat an bi ai, subere an bi ai yo nutbot suk gato an ben nyim ne o nde, an bi ai bari re, sane an yo ku os o nde.
18Nin karowa Yefun Allah sa, nin yo ku sukye tepsu kam nyim yewis Israel ku ne nde. Ye Israel ne kom mo banbo Sinai sa, án me banbo ne su án gro, án me bot ru mone, nogi gwa án ndo nde, nowarek, nofuf kas, ndendu yut mone re.
19Mone án jam trompet ba sye, án jam ye yo ba sye wai o re. Ye Israel jam suk gato ba sye ne sa, án bariwa suk ne ba o, án wergat Yefun Allah subere suk ne ba gat án o nde,
20we án bariwa jam sukduno gato ba gat án, án yo nggi o nde it. Án bariwa, we ye ba gat án sare do, "Yetu si bi suksi ge yo do ma yakos banbo ré it yo, yé am su jok sor kwop et."
21Suk bok ne sino gato ye Israel me ne, ben án nyu ndo nde, anato Musa ki do, "Ji nyu ji kaim kro ndo nde go!"
22Nin yo ku sukye tepsu ye Israel ku ne nde, wo ben sato nin mu kom mo banbo Sion it, nin mu kom mo Yefun Allah gato gesyos ne bi kota re. Kota ne anato tepsu Yerusalem be gato Yefun fro mo gu nim. Mone malaikat mwa yé ndo nde sum, malaikat mwa ne wi, malaikat ambre mo sukndo gato Yefun Allah ben ne. Ben sato nin mu kom mo pe gato malaikat mwa kem mone re.
23Ben sato nin mu kom mone, nin si yé mwa gato onyar kem mo Yefun Yesus sum sino, nin si yé mwa ne sino mit at wa. Yefun Allah nai yé mwa ne tepsu An bi pá doketke. Pa doketke ne ku an bi Ai bi sukrok si suk mwa ne sino. Sane Yefun Allah nai nin si yé mwa ne sok mo An bi rus-i. Yefun krom án gum mo gu re. Mone nin ku Yefun Allah gato ndobot men yetu sino. Mone nin ku yé mwa gato ben bi suk-i ri-roi tepsu Yefun mit ne dom. Yé mwa ne kwop suga nyim, orete Yefun Allah ben án ndo wai o re, kwa dik yo gato gwet yo mo nde.
24Mone nin ku Yefun Yesus gato dé sye wa kak os be tepsu yegweswai wa men yetu. Yefun Yesus dé-i ne sa, ben sato ye dar mo nin mo sukibit gato nin ben ne subere tot sukibit ne or wé kadit nin re. Yefun Yesus dé-i gato sye wa kak os gato be ne sa, bi sukdu-i gato Yefun Allah tom su men ndo wai kadit sukdu subot Habel dé-i ne o re. Sane nin yo ku sukye tepsu ye Israel nde, wo ben sato nin ku suk mwa gato ndo mo gu ne it.
25Sane yo, men mewa men nggwa subere men yo bariwa jammo sukdu gato Yefun Allah ki ne nde. Yé gato bariwa jammo Yefun Allah bi sukdu gato ye ki mo banbo Sinai ne sa, yé ne yo ku os wa titi kadit sukye gato Yefun Allah fro ne nde. Sane dom, men ré do bariwa jammo sukdu gato Yefun gato gum kok mo gu ki ne ma it yo, bere sa u ne? Bere men yo ku os nde go!
26Tomgato Yefun Allah ki sukdu mo banbo Sinai sa, sukdu ne ben bur ré rek ram sor re. Sarewo su ré, An tom do, "Wam dik yo o, bere Ji ki sukdu yo, bere sukdu ne ben bur ré rek ram sor nde, wo gu nim ne ram dom et."
27Yefun Allah ki mone do, "wam dik yo o," sane men jam do, suk mwa mo bur ré si gu nim ne sino gato Yefun ut ré bere ram kom mo iwedewe. Suk mwa mo bur ré gato yo kem krat nde yo, bere Yefun nai wé re, subere suk mwa gato kem krat sor ete kem.
28Sane, men ki ndo mo Yefun Allah et, we An nai men gum sok mo nat gato An jom, gato kem krat ne it. Sane men ki ndo mo Yefun Allah, men som An et. Men bes An gum kok, men jammo An, sagato An dakai iwa men ben ne sor,
29we men yo jammo An nde yo, bere Yefun Allah gato jom men ne anato tepsu bot sye gato git men.