Dual Panel1Sukdu subot men bi Yekwesu gato men ki ne, i-ke mó, sare do, men bi Yekwesu gato gum kok wai ne mó re. An kem tak Yefun Allah de syim ge mo gu, An si Yefun Allah gato sye wai mo gu ne jom suk mwa neya sino re.
2An ben suk tepsu yegweswai gato gum kok mo Yefun Allah dakai bi gumwak-i, gato fo mo Yefun Allah bi nu mit mo gu. Nu mo gu ne yetu yo nggo nde, wo Yefun Allah dakai sor anato nggo An bi nu-i gato sangge mo gu ne.
3Suga nyim tuya, ye Israel bi yekwesu gato gum kok wai mo Yefun Allah bi nu ne sino, Yefun bes yekwesu ne wa som Yefun Allah su suksom bok yo, ete gu suge wa tot suktot mo sukibit gato yé ben ne wé. Sane Yesus Kristus, men dakai bi Yekwesu gato gum kok wai, An dom tot suktot mo sukibit gato men ben ne wé re.
4An do kem pe mo bur ré yo, bere An yo ben suk tepsu ye Israel bi yekwesu mo Yefun Allah bi nu nde, we yekwesu gato syo suksom nai Yefun tepsu Musa bi sukduno-i ne mó re.
5Yekwesu mwa ne ben suk mo Yefun Allah bi nu-i mo bur ré konembot suk gato Yefun ben mo bi nu-i mo gu. Suk gato yekwesu mwa ne ben yo tepsu suk gato Yefun Allah ben mo bi nu-i mo gu ne sino nde, wo karowa. Musa ós yekwesu mwa ne konembot suk gato Yefun Allah ben mo bi nu-i mo gu, we Musa fro wa nggo Yefun Allah bi nu mo bur ré sa, Yefun Allah ki suknapa wa an sare do, "Nan nggo nu si bi suk mwa ne tepsu sukdu gato Ji ki nai nan mo banbo ne et."
6Sarewo su ré, Yefun Allah bes Yefun Yesus tepsu yegweswai wa men yetu si Yefun Allah. Yefun Yesus ben An bi suk-i tepsu Yekwesu ne ndo wai kadit yekwesu mwa gato nyim neya o re, we os be gato Yefun Yesus gwat ma ne ndo wai kadit os nyim ne. Os be ne ndo wai, we os be ne i-ke mo suk gato Yefun tom su men gato ndo wai kadit suk gato Yefun tom mo os nyim ne o re.
7Os doketke gato Yefun Allah tom su men bi amui ne do tep mone it yo, bere men yo mitmo os be ne nde,
8sarewo Yefun Allah me do, ye Israel ben bi suk-i siri kadit os nyim ne. Sane Yefun Allah ki nai án do, "Bere bi kam gato tep wa os be ne bor, Bere Ji frot Ji bi os gato be ne su yewis ye Israel sisu yewis ye Yehuda ne sino.
9Os be yo tepsu os gato Ji tom su yewis we ne bi amui tomgatu Ji gwat án bi amui syesyar kadit bur Mesir ne nde. Án yo sibot os gato Ji tom su án ne nde, wo án misyar re; Sane anato Ji misyar án re.
10Wo su ré yo, Ji kak os be su yewis ye Israel tepsu suk gato Ji tom ne. Yefun Allah ki do, su kam sari ne ma, Bere Ji bok Ji bi sukduno-i mo án bi sukjimnut, Bere Ji krom Ji bi sukduno-i mo án mit re. Bere Ji, Yefun Allah anato án bi yenggras gato jom án ne, Bere án anato Ji bi rus-i re.
11Ye yo duno án bi yesyim e, án bi nje e ne o nde. Yé yo duno án subere án jam Yefun Allah sisu ndo, sane o nde, we yé mwa ne, kadit pa wokgan sor kom mo yenggras ne sino bere jam Ji it.
12Bere Ji misyar sukibit gato án ben ne wé re, Ji yo nutbot o nde, Ji yo napawa sukibit gato án ben ne o nde."
13Mo sukdu ne Yefun Allah ki do, "Ji frot Ji bi os gato be su yewis ye Israel." Yefun Allah ki do, os ne anato os be. Sane os gato An tom su ye Israel suga nyim tuya ne, Yefun ki do, os gato rok ne yo ndo wa men sibot o nde, bergan os ne yo mó o nde.