Dual Panel1Ye gato sok tó ye gato onyar kem mo Yefun Yesus ne mwa gat o. Mo ye Yahudi gato onyar kem mo Yefun Yesus, ge bok yo gato ma kadit bur os syu, án ki a Yunani, wo ye Yahudi gato ma kadit Yerusalem, án ki a Yahudi. Sugane kamdik-kamdik ye wat sugit bot nggonna, sarewo ye Yahudi gato ki a Yunani maskwa ket ye Yahudi gato ki a Yahudi, we án ndak ye gato ki a Yahudi ne do, "Nin wat sugit bot nggonna, sarewo nin misyar nggonna gato ki a Yunani wa suma ne?"
2Sane yerasul ge musyu dik sop we ne sum yé gato onyar kem mo Yefun Yesus ne sino. Yerasul da iwa ós wat sugit bot nje, sarewo an ki nai yé mwa mone do, "Yefun Allah bes men wa men duno nje su Yefun Allah bi sukduno, sane men misyar, ete men wat sugit bot nje sane, bere siri re.
3Sa ndo sa, nin bes ye ka mufit gato Yefun Allah Gen bok nggwa mó ete jam suk. Nin bes ye ka mufit wa wat sugit bot nje,
4wo men dakai, men ki suk su Yefun, men duno nje su Yefun Allah bi sukduno sor re."
5Ye gato onyar kem mo Yefun Yesus ne sino imo suk gato yerasul ki ne. Sane yé bes Stefanus, gato onyar kem pe mo Yefun Yesus. Sane dom, Yefun Allah Gen bok nggwa mo Stefanus. Yé bes ge bok yo o gato gum do, Filipus, Prokhorus, Nikanor, Timon, Parmenas, si Nikolaus. Nikolaus ne ma kadit kota Antiokhia. Nikolaus yewis ye Yahudi nde, wo an yewis yi gato sok mo ye Yahudi bi agama re.
6Yé gwat ye ka mufit ne mu ku yerasul. Kom mone yerasul ak syim mo ye ka mufit ne, yerasul ki suk su Yefun wa ye ka mufit ne, subere Yefun Allah ben ye ka mufit nggiwa ben suk.
7Sane yerasul kibot Yefun Allah bi sukdu subot Yesus Kristus frek mu kom mo peyo-peyo. Yé sok tó ye gato onyar kem mo Yefun Yesus mo Yerusalem mwa gat o. Yesu mwa gato ben suk mo ye Yahudi bi nu ari sok tó ye gato onyar kem mo Yefun Yesus dom.
8Yefun Allah ben sukndo mwa su Stefanus, Yefun Allah syo An bi suktinggi nai Stefanus anato Stefanus ben suk mwa gato ben yé mwa yeket. Yé mwa ne nutbot ware, yé jam kom mo koirut nde.
9Sarewo yetu ge bok yo duwer Stefanus mo suk gato an ben ne. Yé bok ne ye Yahudi kadit bur Kirene si bur Aleksandria. Yé bok ne sok mo ye Yahudi bi nu ari dik yo gato gum do, "Nu ari wa Pakwerut gato sombok wé kadit an bi yenggras." Yé bok ne tó ye Yahudi deyo o kadit bur Kilikia si bur Asia, án sino duwer Stefanus mo suk gato Stefanus ben ne,
10sarewo Stefanus ki bi sukdu-i ndo wai kadit án sino, we Stefanus ku suktinggi kadit Yefun Allah Gen ete ki bi sukdu-i ne tepsu ye gato jam suk mwa.
11Sane yé bok ne dugat yetu ge bok yo o wa ki sukkidar sare do, "Men jam Stefanus kiket Musa gum ibit, men jam Stefanus kiket Yefun Allah gum ibit dom."
12Sane yé bok ne ben ye Yahudi bi yepasye si yeguru agama si yé mwa ne sino maskwa ket Stefanus. Sane yé but Stefanus, yé gwat an mu mo ye Yahudi bi yepasye si yekwesu gato sum sino wa kibot sukdu.
13Yé gwat ye yi gato ki sukkidar subot Stefanus ne ma. Ye gane ki do, "Stefanus ré kiket Yefun Allah bi nu gato men un An mone. Stefanus ki do, nu ne ibit, nu ne ndo wa men o nde. Stefanus ré kiket Yefun Allah bi sukdu gato Yefun tarubot Musa do, sukdu ne ibit, sukdu ne ndo wa men o nde.
14Men jam Stefanus ki do, 'Yesus, ye Nazaret ne, bere tarak Yefun Allah bi nu-i ne wé, bere Yefun Yesus win sukdu gato Musa bi nai men su sukdu be o re.' "
15Yepasye mwa ne sino gato sum wa kibot Stefanus mone sokbot Stefanus sa, Stefanus gro-i tepsu malaikat gro-i.