Dual Panel1Ye Farisi si ye Saduki ge bok yo ma ku Yefun Yesus. Án werwa meret os wa Yefun Yesus, sane án ki nai Yefun Yesus do, "Nan ben suk yo gato ben men yeket et, subere Nan kadum Yefun Allah bi suktinggi ne bor wa men me et."
2Sarewo Yefun Yesus ki do, ["Kam bok, gu er yo, nin ki do, 'Bere nogi nde.'
3Wo su nyotkwo sim nin ki do, 'Gu er ete ndu, sane bere nogi.' Nin watbot gu nim ne, ete nin jam suk gato bere bor, sarewo suma ben anato nin watbot suk gato Ji ben ré, ete nin jam nde suk gato bere bor ne?"]
4"Mban! Nin yé gato ben nin bi suk-i ibit wai, nin gato kem mo bur su ré te, nin werwa Ji ben suk yo wa ben Yefun Allah bi suktinggi bor e? Ji yo ben suk sane mo nin gwem nde. Sarewo tepsu Yefun Allah ben An bi suktinggi bor wa yenabi Yunus, bere An waii ben sane o wa nin me et." Sane Yefun Yesus mu kadit án re.
5Yefun Yesus si bi pakon mu mo em deta sa, án mbrinket án gwat roti.
6Yefun Yesus ki nai bi pakon do, "Nin mewa nin nggwa kadit ye Farisi si ye Saduki bi bibit roti."
7Pakon ne nutbot suk gato Yefun Yesus ki ne, ete pakon ne ki nai yu do, "Yefun Yesus ki sukdu subot ye Farisi si ye Saduki bi bibit roti-i, we men yo gwat roti nde bayok."
8Yefun Yesus jam suk gato An bi pakon kibot ne, sane An ndobot pa ne do, "Nin kibot roti gato nin yo gwat nde wa suma ne? Nin yo onyar kem ri mo Ji nde tó bado?
9Nin jam nde tó, bado? Nin napawa sugato Ji syat roti koi mumek, ete nin syo nai yebris ge ribu mumek ne git bado? Sugane nin sum roti napta tepsu yu ot ses ne?
10Sane dom, sugato Ji syat roti koi mufit, ete nin syo nai yebris ge ribu at ne te, nin sum roti napta kom mo yu ot ses ne?
11Ji yo ki sukdu subot roti nde. Nin jam nde wa suma ne? Wo Ji bi sukdu do, nin mewa nin nggwa kadit ye Farisi si ye Saduki bi bibit roti ne et."
12Sugane pakon ne jam do, Yefun Yesus yo kibot bibit roti gato ye kon roti su ne nde, wo An syogat bi pakon mewa án nggwa kadit ye Farisi si ye Saduki bi sukduno-i.
13Yefun Yesus ma kom mo bur gato karowa kota Kaisarea Filipi sa, An ndobot An bi pakon do, "Yé mwa neya kibot Yetu bi Pa to Ji ré te, yé kibot Ji sa u ne?"
14Pakon ki do, "Yé bok yo ki do, Nan anato Yohanes gato ras nje mo syur. Yé bok yo o ki do, Nan anato yenabi nyim gato gum do Elia. Yé bok yo o ki do, Nan anato yenabi Yermia, ondeyo yenabi ge dik yo o e ne."
15Sane Yefun Yesus ndo mo An bi pakon do, "Wo nin dakai, nin nutbot Ji sa u ne?"
16Simon Petrus ki do, "Nan anato Yekwesu gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men. Nan anato Yefun Allah gato gesyos ne bi Gan."
17Yefun Yesus ki do, "Simon, gato Yona bi gan, yetu yo kadum sukjimnut ne nai nan jam nde, wo Ji bi Ai mo gu ben sukndo su nan anato An kadum sukjimnut ne nai nan jam re.
18Sane, Ji ki sare do, nan gum do Petrus, gato bi sukjimnut do, jok gato nggi. Sane saga yé nggo nu mo jok gato ye kendo do pondasi, bere Ji nggo Ji bi nu wa Ji bi rus-i kem mone mo nan si nan bi sukdu-i. Yé mwa ku os wa sok mo Ji bi rus-i mo sukdu gato nan ki subot Ji ne. Ji bi rus-i mo nu ne, bere nggi wai kadit os sukkwop o re.
19Bere Ji bes nan tepsu yekwesu mo Ji bi rus-i sagato yeraja syo bi kunci mwa ne nai an bi yekwesu wa kak suk mwa mo bi nat-i ne. Sane suk gato nan duyawa yé ben mo bur ré, Yefun Allah mo gu duyawa dom. Sane o, suk gato nan iwa yé ben mo bur ré, bere Yefun Allah mo gu iwa yé ben dom."
20Sane pakon ne jam do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men ne sa, Yefun Yesus duyawa An bi pakon frot nai yé yi jam.
21Kadit kam ne Yefun Yesus ki rer nai bi pakon ne do, "Ji mu mo kota Yerusalem et. Mone ye Yahudi bi yepasye e, yekwesú mo Yefun Allah bi nu si ye Yahudi bi yeguru agama bere ben sukye nai Ji ket kwayo-kwayo. Bere yé gu Ji kwop, sarewo kom mo kam we rek, bere Yefun Allah sun Ji kadit sukkwop o re."
22Petrus syimtok Yefun Yesus wadigan mu mo nden, ete Petrus ndantom An sare do, "Yenggras o, bere Yefun Allah yo misyar yé ben sukye nai Nan nde. Mara! Bere yé yo ben suk sane nai Nan nde."
23Yefun Yesus brek ete ki nai Petrus do, "Nan ki sukdu yawa os wa Ji nde, biris bi yekwesu bi sukjimnut-i kone! Nan bi sukjimnut-i ne ben sukye wa os wa Ji. Nan gwat sukjimnut ne mu ko kadit Ji se! Nan bi sukjimnut-i yo ma kadit Yefun Allah nde, wo nan bi sukjimnut-i ma kadit yetu sor re."
24Orete Yefun Yesus ki nai bi pakon ne do, "Ye to iwa simo Ji it yo, ye ne yo iwa ben suk ket an mit-i ne o nde, wo an ben Ji bi suk-i sor, an tepsu ye gato sam an bi kwesukwin, kapre an ku sukye mone, an kwop o, an mbau o, an simo Ji petok sor.
25We sare, ye to bi sukjimnut sye wa an dakai kem ndo mo bur ré yo, bergan an kwop re, wo ye to bi nggwa mo Ji wa an ben Ji bi suk-i yo, bere ye ne kem ndo to kapyo mato kapyo.
26Nin ben suk ket nin mit-i subere nin ku suk mwa mo bur ré, ete nin ges mo os ibit mone, suk mwa gato nin ku ne sato sugum e, san e, nu e ne te, bere ós nin gum sok mo Yefun Allah bi rus-i sa u ne? Yo os nin nde. Bere suk mwa gato nin ku ne, nin syo nai Yefun Allah, ete bere An nai nin gum sok mo An bi rus-i bado? Mo nde,
27We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.
28Suk gato Ji ki ré suksangge anare, yetu ge bok yo gato ti more yo kwop nde tó, bere án kem mo bur ré sane sor án me Yetu bi Pa ma, ete Ji bi suktinggi tepsu Yekwesu gato nggi wai bor mone."