Alkitab Mobile SABDA
[VER] : [ABUN]     [PL]  [PB] 
 <<  Markus 15 >> 

1Nosoro gan, ye Yahudi bi yepasye si yekwesu gato sum sino wa kibot sukdu si yekwesú mo Yefun Allah bi nu ge bok yo, si yeguru agama sino kibot sukdu or, ete án nai sukjimnut dik wa ye gu Yefun Yesus kwop wé. Án rai Yefun Yesus krat, ete án gwat Yefun Yesus mu ku Pilatus.

2Pilatus ndo mo Yefun Yesus do, "Nan anato ye Yahudi bi Yekwesu, bado?" Yefun Yesus ki do, "Suk gato nan ki ne sangge."

3Yekwesú mo Yefun Allah bi nu ne ndak Yefun Yesus ket kwayo-kwayo.

4Sane Pilatus ndo mo Yefun Yesus o do, "Nan jam suk bok gato yé ndak Nan su ne bado, nde, e? Nan bariwa ki sukdu satu bado?"

5Sarewo Yefun Yesus yo ki suk yo o nde, An not sor. Sane Pilatus yeket mone.

6Su Kam Sye Waiket, sagana Pilatus sombok yetu ge dik yo wé kadit sel tepsu yé mwa ne imo.

7Sugane yekweke bok yo gato ben sukndi ete gu ye yo kwop ne kem mo sel mit. Yekweke bok ne werwa syun ye Roma wé kadit ye Yahudi bi bur det-i. Yetu ge dik yo gato gum do Barabas simo yekweke gu ye deyo kwop.

8Yé mwa sum mone, ete án ndek mo Pilatus do, "Nan sombok yetu ge dik yo wé kadit sel tepsu sagana su kam sye ré nan ben wa men et."

9Pilatus ndo mo yé mwa ne do, "Nin iwa ji sombok ye Yahudi bi yeraja ré wa nin bado?"

10Pilatus kiwa an sombok Yefun Yesus wé sane, we an jam do, yekwesú mo Yefun Allah bi nu ne syo Yefun Yesus mo an syim, we yekwesú ne on sa mo gato yé mwa ne iwa Yefun Yesus wai kadit án ne, bergan yekwesú bi sukdu-i yo git o nde.

11Sarewo yekwesú mo Yefun Allah bi nu ne wergat yé mwa ne, subere yé mwa ne ndekwa Pilatus sombok Barabas wa án.

12Sane Pilatus ki nai yé mwa ne o do, "Sane bere ji ben suma su Ye gato nin kendo do, nin ye Yahudi bi yeraja ré ne?"

13Yé mwa ne saiye do, "Nan mban Ye ne mo kwesukwin sor!"

14Pilatus ndo o do, "Wa suma ne? An ben sukibit sato suma ne?" Sarewo yé mwa ne bariwa jammo Pilatus bi sukdu-i ne. Yé mwa ne saiye nggi o do, "Nan mban Ye ne mo kwesukwin wé sor!"

15Pilatus iwa ben yé mwa ne mit dek, sane Pilatus sombok Barabas wé tepsu yé mwa kiwa ne, ete Pilatus syogat an bi yesukmise kwam Yefun Yesus, ete gwat An mu mban mo kwesukwin.

16Yesukmise ge bok ne gwat Yefun Yesus mu sok mo Pilatus bi nu sye mit ne, ete án kendo yesukmise mwa ne sino gato ben suk mo nu ne ma sum wairi wa Yefun Yesus.

17Yesukmise ne siker Yefun Yesus sare do, Yefun Yesus yeraja. Sane yesukmise ne it san er mo Yefun Yesus, . Orete yesukmise nai kweran gato jak mó, ete án far kweran bot yu tepsu bumam, ete án bom mo Yefun Yesus su.

18Orete yesukmise ne siker Yefun Yesus mone. Yesukmise ne ki do, "Ye ré ye Yahudi bi yeraja anare. Men bes An gum kok et!"

19Yesukmise ne nai kwepu ma, ete án gwa Yefun Yesus su sú kwepu ne wam bok yo. Án sukut tom Yefun Yesus. Án siker Yefun Yesus do, Yefun Yesus tepsu yeraja, sane án tu umsu mo Yefun Yesus gwem, tepsu án kamo su Yefun Yesus do, án som Yefun Yesus.

20Yesukmise ne kamo su Yefun Yesus, or án jogru san er ne kadit, ete án it Yefun Yesus bi sansun ne satu mo Yefun Yesus. Orete án gwat Yefun Yesus mu nden wa án mban mo kwesukwin.

21Yesukmise bok ne gwat Yefun Yesus mu kom mo os mit saresa, án ku yetu ge dik yo gato ma kadit bur Kirene. Ye ne gum do Simon, an bi gan we gum do Aleksander si Rufus. Simon ré, an ma kadit nden mu mo kota. Simon muket os ne saresa, yesukmise ne syaugat Simon sam Yefun Yesus bi kwesukwin ne.

22Án gwat Yefun Yesus mu kom mo nat gato gum do Golgota, gato bi sukjimnut do, "Nat ne ka sa yekri subris."

23Mone án nai nau anggur gato án fros su suk gato ndó, ete án syo nai Yefun Yesus da, subere ós Yefun kaim yo yó teker eta nde. Sarewo Yefun Yesus bariwa da nau anggur ne re.

24Sane yesukmise ne mban Yefun Yesus mo kwesukwin. Orete án tik bit wa án wat Yefun Yesus bi san su yu, subere kadik-kadik ku.

25Nyotkwo, kam it kok gan ete yé mban Yefun Yesus mo kwesukwin.

26Mo kwesukwin napnim ne, ye mban kwedet dik yo su sukdu gato yé ndak Yefun Yesus su ne, yé krom do, "Ye Yahudi bi Yekwesu anare."

27Mone dom yé mban yetu ka we gato syimsi suk, dik yo mo Yefun Yesus de syim ge, dik yo mo Yefun Yesus de syim jam.

28[Sane sukdu gato yenabi Yesaya krom nyim mo Yefun bi sukdu bor mone do, "Yetu nutbot An tepsu ye gato ben sukibit."]

29Yé gato mu waiket nat ne án kabor Yefun Yesus, án bagriket Yefun Yesus ete án juwai án su, ete án siker Yefun Yesus do, "Nan gato ki do, Nan tarak Yefun Allah bi nu, ete Nan nggo or satu su kam gri rek,

30sane yo, Nan is kadit kwesukwin ne et! Nan dakai sombok Nan nggwa wé kadit sukye gato Nan ku ré et!"

31Orete yekwesú mo Yefun Allah bi nu si yeguru agama siker Yefun Yesus su sukdu sane dom. Án ki nai yu do, "An sombok ye yi kadit sukye gato ye yi ku ne, wo An yo nggiwa An sombok An dakai nde.

32An ye Israel bi Yekwesu gato Kristus, gato Yefun Allah syogat ma mo bur ré wa nai men yetu kadit sukye su sangge it yo, An is kadit kwesukwin ne et, sane bere men jammo An." Ye we gato yé mban mo Yefun Yesus de ne, an we kabor Yefun Yesus ket kwayo-kwayo dom sane.

33Yé mban Yefun Yesus mo kwesukwin mone sa, ndendu kewa pe ne sino kadit kam ti ri sor kom mo kam dek.

34Kam dek, jam gri ete Yefun Yesus saiye su a Ibrani do, "Eli, Eli, lama sabakhtani!" gato bi sukjimnut do, "Ji bi Ai, Yefun Allah, Ji bi Ai, Yefun Allah, Nan misyar Ji wa suma ne?"

35Yé mwa mone jam suk gato Yefun Yesus ki ne sa, án ki nai yu do, "Nin jam et! An kendo Elia ma wa ós An anane."

36Sugane yetu ge dik yo kas mu nai suk gato yé tik syur su tepsu san det. An ras mo nau anggur gato muk, ete an du mo kwekoi naprut, eteyo an syo su mu nim mo Yefun Yesus mip nap, wa Yefun da subere ós Yefun nggi wokgan yo o. Ye ne syo san det mu nim saresa, an ki do, "Men ben suk yo su An nde tó yei, men me mó et. Te, Elia ma sombok An wé kadit kwesukwin bado?"

37Yefun Yesus saiye nggi sa, An mas bok it.

38Yefun Yesus kwop sa, san det gato yé kok mo Yefun Allah bi nu mit gato kewa Yefun Allah bi gumwak fo ne, san det ne brer kadit nim mu kom mo bur.

39Ye Roma bi yesukmise bi yesu gato ti mewa Yefun Yesus mo kwesukwin de gwem ne, an jam Yefun Yesus saiye nggi, an me Yefun Yesus kwop saresa, an ki do, "Sangge, Ye ré anato Yefun Allah bi Gan."

40Mone nggon ge bok yo kem os syu kadit, nggon ne ndarwa suk mwa gato bor mone dom. Nggon bok gane deyo gum do, Maria gato bi nat mo Magdala, si Maria gato Yakobus dowok si Yoses ne bi im, si Salome.

41Mo bur Galilea ne, nggon bok gare simo Yefun Yesus mone ete ben suk wa ós An. Nggon ge bok yo o sisu Yefun Yesus ma kadit Galilea ma mo Yerusalem. Sane nggon mwa ne ti mone dom.

42Kam gato yé mban Yefun Yesus mo kwesukwin ne, sugane kam Jumat. Su kam Jumat ne ye Yahudi fro suk wa bi ik, kam sye kam Sabat ne. Sane karowa ndendu it,

43Yusuf gato ontu mo Arimatea, Yusuf ré mu ku Pilatus. Yusuf ré an gum sok mo ye Yahudi bi yepasye gato sum wa kibot sukdu, an gum kas mo nje mwa, an ben sukndo. An eswa kam gato Yefun Allah ma jowa yetu tepsu yetu mwa ne sino bi Yekwesu. Sane Yusuf mu ku Pilatus, an yo nyuwa Pilatus nde. Yusuf ndek mo Pilatus do, an nai Yefun Yesus mukri kadit kwesukwin wa an bi mo makwe, we bi ik anato kam sye kam Sabat, kam gato ye Yahudi yo ben suk nde.

44Pilatus jam sukdu gato yé ki do, Yefun Yesus kwop kekro it, anato Pilatus yeket. Sane Pilatus syogat ye mu kar yesukmise bi yesu ne ma mo Pilatus, ete Pilatus ndo mo yesukmise ne do, "Te, Yesus kwop it bado?"

45Pilatus jam sukdu kadit yesukmise bi yesu ne do, Yefun Yesus kwop re, sane Pilatus imo Yusuf bi sukdu-i. Pilatus ki do, Yusuf mu sombok Yefun Yesus mukri kadit kwesukwin sor.

46Sane Yusuf mu, Yusuf so san det gato kwo wa nggwot Yefun Yesus mukri su. Yusuf sombok Yefun Yesus mukri kadit kwesukwin ne, ete Yusuf nggwot su san ne, ete gwat mu mo makwe. Mone an grem Yefun Yesus mukri mo jokwak dik yo gato yé fro mo bobuk jok ne mit. Yusuf grem Yefun Yesus mukri mo jokwak mit or, an wop jok sye dik yo ma an grem kewa jokwak syo.

47Sugane Maria gato ma kadit Magdala si Maria gato Yakobus si Yoses bi im ne, an we sokme nat gato Yusuf grem Yefun Yesus mukri mone.


  Share Facebook  |  Share Twitter

 <<  Markus 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel