Alkitab Mobile SABDA
[VER] : [ABUN]     [PL]  [PB] 
 <<  Markus 2 >> 

1Kam bok yo o, Yefun Yesus satu ma mo kota Kapernaum sa, yé mone jam do, Yefun Yesus satu ma mo An bi nu-i o it anane.

2Sane yé mwa ne ma sum mo nu mit ne. Yé mwa mo nu mit ne buk mo yu teker ware, nat yo dor mo nde. Mo nu de nden dom, pe yo mo nde. Yefun Yesus ki subot Yefun Allah bi sukdu nai yé mwa mone.

3Yefun Yesus ki subot sukdu mo nu mit ne sa, yetu ge at ma. Án ge at ne gwat yetu ge dik yo gato gwes út ma mo Yefun Yesus.

4Sarewo án ge at yo bi os wa án gwat ye gato gwes út ne ma mo Yefun Yesus nde, we yé mwa buk mo yu teker ware. Sane yetu ge at ne it mo nu yu, ete án ge at ne krop wan mo nu yu ne wak, orete án ge at ne sa ye gato út ne su an bi kwat gato an sem mone is mu mo bur.

5Yefun Yesus me suk gato yetu ge at ne ben anato An jam do, yetu ge at ne onyar kem mo An. Sane Yefun Yesus ki nai ye gato gwes út ne do, "Pa nji, sukibit mwa gato nan ben ne or kadit nan it anare. Ji yo nutbot sukibit mwa gato nan ben ne o nde."

6Mo nu mit ne ye Yahudi bi yeguru agama ge bok yo si nje mone dom. Án jam Yefun Yesus bi sukdu ete án nut mo án mit do,

7"Ye ré ki sane wa suma ne? Ye gare dakai bes An nggwa kok, ete An ki suk tepsu Yefun Allah ko ré go! Je u anato nggiwa an ki do, sukibit gato men yetu ben ne or kadit men ne? Yefun Allah ka dik sor, wo Ye ré bes An nggwa kok tepsu Yefun Allah!"

8Yeguru agama bok ne do nutbot suk sane mo án mit saresa, Yefun Yesus jam yeguru bi sukjimnut subot An re. Sane Yefun Yesus ki nai án do, "Suma ben anato nin bi sukjimnut waiyu mo nin mit subot suk gato Ji ki ré ne?

9Sato Ji ki nai yebris ré do, 'Sukibit mwa gato nan ben ne or kadit nan it anare.' Nin nut do, Ji yo nggiwa Ji ki suk ne nde bado? Sato Ji ki do, 'Nan sun, nan pam nan bi sun, nan mu se!' Te, nin nut do, Ji yo nggiwa ben suk ne dom nde e? Sane nde, bere nin jam do, Ji nggiwa benbot sukdu kwa we ne sino.

10Sangge, bere Ji ben ye ré ge. Ji ben ye ré ge subere nin jam do, Ji anato nggiwa Ji ki do, sukibit gato yé mwa ne ben or kadit yé mwa ne dom. Ji ben ye ré ge anato nin jam do, Yefun Allah anato bes Yetu bi Pa to Ji ré." Sane Yefun Yesus ki nai ye gato út ne do,

11"Ji ki sare do, nan sun, nan pam nan bi sun. Nan satu mu mo nan bi nu sor."

12Ye gato út ne ge, orete an sun, an pam an bi sun, ete an syesyar bot yé mwa ne gwem. Sane yé mwa ne sino yeket ndo nde, ete án un Yefun Allah. Án ki do, "Suk ga sare men yo me su men gro mo nde."

13Wam dik yo o, Yefun Yesus mu mo Em Galilea de. Yé mwa ma mo An, ete An duno yé mwa mone.

14Yefun Yesus mu wai ket os mone saresa, An me Alfeus bi gan gato gum do Lewi kem mone. Lewi ne, an ye gato nai sugum kadit nje wa pemerintah, sane an kem mo nat gato yé syo sugum nai an ne. Yefun Yesus ki nai Lewi do, "Nan ma simo Ji et!" Sane Lewi ti, ete an simo Yefun Yesus.

15Yefun Yesus mu git sugit mo Lewi bi nu saresa, ye gato nai sugum kadit nje wa pemerintah si yetu ge bok yo gato ye ki án gum ibit ne ma sisu Yefun Yesus si bi pakon sum mone wa git sugit sino, we sugane yé mwa gane simo Yefun Yesus dom.

16Yeguru agama gato sok mo ye Farisi bi det-i, án me Yefun Yesus si ye gato nai sugum kadit nje wa pemerintah si ye gato ye ki án gum ibit ne git sugit sino sa, yeguru ne ndo mo Yefun Yesus bi pakon do, "Suma ben anato nin bi yeguru si ye gato nai sugum kadit nje wa pemerintah si ye gato gum ibit ré git sugit sino sare ne?"

17Yefun Yesus jam yeguru bi sukdu ne sa, An ki nai yeguru ne do, "Ye gato yo i nde, bere an yo meret dokter nde, wo ye gato i sa, bere an meret dokter. Ji yo ma mo bur ré wa Ji kendo ye gato nut do, an sa, ye gato ben sukndo ne nde. Ji yo ma wa ye ga sane nde, wo Ji ma mo bur ré wa Ji kendo ye gato ben sukibit, yé ne tepsu ye gato i, subere yé ne brek kadit os ibit ne, ete jammo Ji."

18Kam dik yo Yohanes gato ras nje mo syur bi pakon si ye Farisi ge bok ne, án mewa án nggwa kadit sugit yei, we án iwa án ki suk su Yefun Allah. Sugane yé deyo ma mo Yefun Yesus, ete án ndo mo Yefun Yesus do, "Yohanes gato ras nje mo syur bi pakon-i si ye Farisi bi pakon-i mewa án nggwa kadit sugit yei, we án iwa án ki suk su Yefun Allah, wo Yenggras, Nan bi pakon-i ré yo mewa án nggwa kadit sugit nde wa suma ne?"

19Yefun Yesus ki do, "Ye konwa yebris si bi nggon kra yu ne te, bere yebris ne bi yesyim bok ne án mewa án nggwa kadit sugit mone bado? Sane nde! Yebris gato kra ne, si bi yesyim konwa sukra ne tó yo, bere án sino git sugit sor.

20Sarewo bere yé kar yebris gato kra ne wé kadit án orete yo, bere su kam gane án mewa án nggwa kadit sugit."

21Yefun ki do, "Men yo nai san det be, ete men bitwa san rok gato syik nde, we men do mus san ne yo, bere san det be nit, yo tepsu san rok nde, sane san be tik san rok ne syik sye o re. Sane bere san det rok ibit wai o re.

22Sane dom, men yo sye nau anggur be mo sukbo gato rok nde, we i-su tut mo mit, ete bere sukbo ne pet anato ben sukbo ibit, orete nau ne sye kadit re. Sane bere suk we ne, gato nau si sukbo ne ibit sino re. Men ben sane nde, wo men sye nau anggur be mo sukbo be, subere nau si bi sukbo ne sino kem ndo."

23Kam Sabat, ye Yahudi bi kam sye, ete Yefun Yesus si An bi pakon muket nggwe gandum mit. An bi pakon muket nggwe ne saresa, pakon ne do gandum gro mone.

24Orete ye Farisi ndo mo Yefun Yesus do, "Suma ben anato Nan bi pakon ben suk su kam sye gato siri kadit men ye Yahudi bi sukduno-i ne?"

25Yefun Yesus ki do, "Suk gato yeraja Daud si ye gato sisu Daud ben sugato án sino on de ne te, nin baca mó bado, nde e?

26Daud sok mo Yefun Allah bi nu, ete an si ye gato sisu an git roti gato yé grem kwop wa som Yefun Allah mone. Sugane Abiatar gum yekwesu gato gum kok wai mo Yefun Allah bi nu ne. Daud sok mo Yefun Allah bi nu, ete an git roti gato yé grem kwop wa som Yefun Allah mone. Daud git roti ne, sarewo suk gato an ben ne siri kadit men ye Yahudi bi sukduno-i, we men bi sukduno ki do, yesu gato ben suk mo Yefun Allah bi nu ne sor ete git roti ne. Roti ne Daud syo napyo nai ye gato simo an ne git dom. "

27Orete Yefun Yesus ki nai ye Farisi bok ne o do, "Yefun Allah fro kam Sabat, kam sye ne wa ós men yetu, wo Yefun Allah yo fro kam sye ne wa ben sukye nai men yetu nde.

28Sane Yetu bi Pa to Ji ré gum Yekwesu wa kam Sabat, sane suk gato Ji ki ndo wa yetu ben su kam sye, kam Sabat ne, kem mone it."


  Share Facebook  |  Share Twitter

 <<  Markus 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran