Alkitab Mobile SABDA
[VER] : [ABUN]     [PL]  [PB] 
 <<  Markus 4 >> 

1Wam dik yo o Yefun Yesus duno nje mo Em Galilea de. Mo em de ne, yé mwa teker sum wairi wa Yefun Yesus ware, sane An it mu kem mo kwem dik yo gato nor mo em de ne. Yefun Yesus kem mo kwem mit ne saresa, yé mwa ne ti mo em de.

2Orete Yefun Yesus duno nje mone su sukamno bok yo. Yefun Yesus duno yé mwa, An ki sare do,

3"Nin jammo sukdu gato Ji ki ré et! Wam dik yo, yetu ge dik yo mu am mbet gro mo bi nggwe.

4An do am mbet gro mo nggwe sa, deyo ges mo os, ete ndam ma git or re.

5An do am mbet gro sa, mbet gro deyo o ges mo bur ka gato jok mwa ya tak bur, wo bur ka ne nifret. Mbet ne nggwar bor kekro, we bur ne nifret.

6Sarewo kam it, orete kam gat mbet nggwar ne ndo nde. I-brot ne yo kom kru nde, sane bergan mbet nggwar ne te re.

7Ye ne am mbet gro deyo ges mo jak miten sa, jak si mbet ne kom sino, orge jak ne ben mbet yo kom ndo nde sor i-bo yo mo nde.

8Sarewo an am mbet gro sa, deyo ges mo bur ka gato ndo, sane mbet ne kom sisu ndo, ete ri ma mbet bo mwa wai o re, deyo bo kom mo bo musyu gri, deyo bo kom mo bo musyu mumat, deyo bo kom mo bo wotin dik."

9Yefun Yesus gwat sukamno ne or sa, Yefun Yesus ki do, "Sane nin brek nin dabe muya-muma kadit nde, wo nin jammo sukdu ne et!"

10Yefun Yesus mu kadit yé mwa ne sa, Yefun Yesus bi pakon ge musyu dik sop we si ye yi gato simo Yefun Yesus ndekwa An ki rer subot sukamno gado ne.

11Sane Yefun Yesus ki nai án do, "Sukdu gato Yefun Allah gurik suga nyim subot os ndo gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit. Sarewo ye gato yo sok mo Yefun Allah bi rus-i nde, Ji duno án su sukamno sor,

12subere 'Yé ne da me petok sor, sarewo án jam nde bi sukjimnut ne ware, Yé ne da syaretwa sukdu petok sor, sarewo án jam nde bi sukjimnut ne rer kom mo mit ware, onde bere, án jam sukdu ne, ete bere án brek ma mo Ji, orete yo, Ji yo maskwa ket án o nde, Ji rus sukibit gato án ben ne or wé kadit án re.' "

13Orge Yefun Yesus ki nai An bi pakon do, "Sukamno gado ne te, nin jam bi sukjimnut bado nde e? Nin jam nde yo, bere nin jam sukamno yi bi sukjimnut-i sa u ne?

14Sukamno gane bi sukjimnut sare do, ye gato am mbet gro ne tepsu ye gato mu ki sukdu subot os ndo gato Yefun Allah fro ne frekbot nje.

15Mbet gro gato ges mo os mit ne anato tepsu yé gato jam sukdu ne, sarewo án yo but nde, wo biris bi yekwesu ma ete nai sukdu ne wé kadit án mit or re.

16Mbet gro gato ges mo bur ka ga jok mwa ya tak bur ne anato tepsu yé gato nai sukdu ne mo án mit. Diksim án iwa,

17sarewo sukdu ne yo kem pe mo án mit nde, tepsu mbet gro ne i-brot yo kom mo jok nde, bergan sor ete án misyar or re. Diksim án jammo sukdu ne, sarewo án do ku sukye mo sukdu ne yo, yé kiket án mone yo, bergan sor ete án misyar sukdu ne kekro re.

18Mbet gro gato ges mo jak mit anato tepsu yé gato but sukdu ne,

19sarewo án jimnotbot suk mwa gato men yetu yémo sato sugit e, san e, sugum e ne. Án iwa ku suk mwa subere án gum pasye. Án bi sukjimnut kasbot suk mwa ne anato sukdu ne yo kom ndo mo án mit o nde, án yo ben suk tepsu sukdu ne nde. Sane án tepsu mbet gro mo jak mit ne, án yo kom ndo nde, i-bo yo mo nde.

20Mbet gro gato ges mo bur ka gato ndo anato tepsu yé gato but sukdu ne ete jammo. Yé ne jamwa sukdu ne pe sane sor án ben suk gato ndo ne, deyo ben sukndo natgan, deyo o ben sukndo mwa gan, deyo o ben sukndo mwa wai, sato mbet gro gato syesyar i-bo, dik yo kom mo musyu gri e, dik yo o kom mo musyu mumat e, dik yo o kom mo wotin dik yo e ne."

21Yefun Yesus ki nai An bi pakon do, "Men gwat kak ma mo nu mit yo, men grem suk yo wa nde. Men gwor bokor wa nde. Men grem mo kwatka desnak dom nde. Wo men grem kak ne mo pe gato kok.

22Sane suk gato ye gurik ne bere Yefun Allah kak bor wa yé mwa me rer. Sane dom sukdu gato Yefun Allah gurik suga nyim tuya, bere Yefun Allah kadum rer wa yé mwa jam re.

23Sane nin brek nin dabe muya-muma kadit nde, wo nin jammo sukdu ré et!"

24Orete Yefun Yesus ki o do, "Nin nutbot suk gato Ji ki ré sisu ndo et. Nin do syaretwa ete nin jammo yo, bere nin jam suk mwa wai o re. Ye gato iwa jam subot Yefun Allah bi sukduno, wo an werwa jam subot sukdu ne mo de nden ne sor re, bere Yefun Allah kak an bi sukjimnut-i ne wokgan sor re. Wo ye gato werwa jam subot Yefun Allah bi sukduno kom mo mit, sane bere Yefun Allah kak ye ne bi sukjimnut-i mwa wai o re.

25Ye to bi sukjimnut kak, bere an jam Yefun Allah bi sukdu mwa wai o re, sane bere an jam sukdu ne kom mo mit re. Sarewo ye to da jam sukdu ne wokgan, ete an misyar, sukwokgan gato an jam ne bere ges or kadit an or re."

26Yefun Yesus ki o do, "Yefun Allah jowa men yetu tepsu men bi Yekwesu yo, bere tepsu sukamno ré. Yetu ge dik yo mu am mbet gro mo an bi nggwe.

27Noru nombrak, an sem yo, an sun yo, mbet gro gato an am ne dakai kom sor. Mbet gro ne dakai kom sye, ye ne jam nde suk gato ben mbet gro ne kom.

28An jan mo bur, ete mbet ne dakai kom. Ketke i-nggwar, or o i-u, or o i-bo kom mone.

29Mbet ne do bo kri it yo, ye ne do mbet bo or, an tik mbet ne wé. An me do i-bo kri it yo, an jam do, i-bo ne tep wa an nai it anane."

30Yefun Yesus ki o do, "Yefun Allah bi rus-i gato An jowa tepsu Yekwesu ne te, bere sa u ne? Sukdu subot Yefun Allah bi rus-i ne te, tepsu sukamno sato suma ne?

31Yefun Allah bi rus-i tepsu kwe nam gro mo sukamno ré. Yetu ge dik yo nai kwe nam gro dik yo. Kwe nam gro ne wok wai kadit sukjan yi gro mwa ne sino mo bur ré.

32Sarewo yé jan mo nggwe sa, kwe nam gro gato wok ne kom tepsu kweke sye wai kadit kweke yi neya. Kweke ne sye sor ndam ma tom mo i-guk, mo pe gato ko."

33Yefun Yesus duno nje mone, An gwat sukamno sane sor re. An gwat sukamno mwa ne sor yé mwa mone bi sukjimnut yo nggi o nde it yo, Yefun Yesus ki An bi sukdu-i tut mone it.

34Yefun Yesus duno yé mwa ne yo, Yefun Yesus duno nje su sukamno sor re. Wo Yefun Yesus si An bi pakon-i wadigan kem yo, An nuk sukamno bi sukjimnut ne sino rer nai An bi pakon jam.

35Yefun Yesus ki An bi sukdu or sa, An kem mo kwem mit ne tó. Kre, ete Yefun Yesus ki nai An bi pakon ne do, "Men mbros kwem mu mo em deta et."

36Yefun Yesus si An bi pakon mu kadit yé mwa ne mo em de. Yefun Yesus kem mo kwem mit ne tó, sane An bi pakon mbros kwem si An mu kadit pe ne. Ye yi mu su án bi kwem-i dom, án sino mu re.

37Yo nam nde ge nofuf sye is ma ben em nap sok mo kwem mit, bergan kwem mit ne ses su em rom, karowa kwem kru it.

38Em nap sok mo kwem mit ne sa, Yefun Yesus sem mo bantal mo kwem mit, tak kwem koi sum. Yefun Yesus bi pakon sun An, ete pakon ne ki do, "Yeguru! Bergan kwem kru su men it anare. Nan dakai misyar sor re bado?"

39Yefun Yesus sun, An syogat nofuf gato kas nggi ne kro, ete An ndantom em nap do, "Nan not se! Em nap, nan kro et!" Yefun Yesus ki sukdu ne, orete nofuf yo kas o nde. Em nap ne dom kro re, ndo satu it anane.

40Yefun Yesus ndo mo An bi pakon do, "Nin nyu wa suma ne? Mban! Nin yo onyar kem ri mo Ji nde tó re!"

41Yefun Yesus bi pakon kwabom kro, ete án brek ma ki nai yu do, "Mban! Je u ana ré ne? An syogat nofuf si em nap, ete nofuf si em nap ne jammo An re."


  Share Facebook  |  Share Twitter

 <<  Markus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel