Dual Panel1Sane ji bi nji, ji bi nyanggon, ben sa u anato nin kiket ye yi gum mo sukibit gato án ben ne? Nin kiket ye yi gum daret mo sukibit gato án ben ne nde, we nin kiket án gum ibit mone, ete nin dakai ben sukibit tepsu án ben ne yo, bere tepsu nin dakai kiket nin dakai gum ibit mone dom.
2Men jam do, Yefun Allah kiket yetu ge dik yo gum mo sukibit gato ye ne ben ne sa, suk gato Yefun ki ne sangge.
3Sarewo ji bi nji, ji bi nyanggon, nin kiket ye yi gum mo sukibit gato an ben ne, wo nin dakai ben sukibit tepsu ye ne yo, nin nut do bere Yefun Allah yo kiket nin gum mone nde bado? Bere Yefun kiket nin gum ete syo sukye nai nin mone re go!
4Nin nut do, Yefun Allah dakai jimnotku nin, An yo syo sukye nai nin kekro nde, wo An eswa nin kwet kadit sukibit gato nin ben ne bado? Sangge, Yefun Allah da ben sukndo su nin sane, sarewo nin kamo su Yefun nde. Yefun Allah ben sukndo su nin, subere tik nin mit wa nin kwet kadit sukibit gato nin ben ne, nin dakai jam re.
5Sarewo nin su krat ware, nin dabe go nit teker ware, sane ben sato nin sum sukye mwa wai o wa nin dakai ku mone. Bere nin ku sukye ne su kam gato Yefun Allah ma ndobot men yetu. Bere Yefun Allah ndobot men yetu mwa ne sino sisu ri-roi sor, tepsu suk gato men ben ne. Bere Yefun bi sukmaskwa ne bor mo sukibit gato men yetu ben ne, bere yé mwa ne ku sukye mone or re.
6Bere Yefun Allah syo suk nai yetu gedik-gedik tepsu suk gato yé ne ben ne re.
7Ye gato werwa ben bi suk-i ne ndo, we ye ne kwabom kam mo Yefun Allah do, bere Yefun bes án gum kok mone yo, bere Yefun un án gum mone, bere Yefun kak os wa án kem gesyos mone, bere Yefun Allah kak os wa yé ne kem ndo to kapyo mato kapyo.
8Wo ye gato iwa ben bi suk-i daret ket an í e, ye gato bariwa jammo sukdu gato sangge e, ye gato iwa jammo sukdu gato ibit e ne yo, bere Yefun Allah on sa ket yé gane wai o re.
9Yé mwa ne sino gato iwa ben sukibit bu ne bere ku sukye sor, bere yé mwa ne nderku nggwa mone re. Yé gato sok mo ye Yahudi bi wis-i ku sukye mo bi sukibit ne sor nde, wo yé gato sok mo yewis yi neya sino bere ku sukye mone dom re.
10Wo yé mwa ne sino gato iwa ben bi suk-i ne ndo tepsu Yefun Allah mit yo, bere Yefun Allah bes yé ne gum kok, bere Yefun un yé ne gum, bere Yefun uttok yé ne re. Yé gato sok mo ye Yahudi bi wis-i ku sukndo ne sor nde, wo yé gato sok mo yewis yi neya sino ku sukndo ne dom re,
11we Yefun Allah ben suk su yewis mwa ne sino tepsu yu re.
12Yewis yi gato jam nde ye Yahudi bi sukduno-i ne, yewis bok neya do ben sukibit yo, bere Yefun Allah syo sukye nai án mo sukibit gato án ben ne tó. Ye Yahudi jam bi sukduno-i ne ete ben siri kadit ne yo, bere Yefun Allah syo sukye nai án tepsu suk gato án ben siri kadit sukduno ne.
13Yefun Allah syo sukye nai án, we ye gato jam ye Yahudi bi sukduno-i ne sor, bere yo tep nde, wo ye gato benbot sukduno mwa ne sino sa, bere Yefun Allah nut mo ye ne do, ye ne sa, tep wa sok mo An bi rus-i.
14Yewis yi neya jam nde ye Yahudi bi sukduno-i. Sane kapre sukduno ne yo kem su yewis yi nde, bergan yewis yi ne dakai ben suk tepsu sukduno ne, we án jambot sukjimnut gato Yefun Allah grem kem mo án mit si án onyar ne anato tepsu sukwatum gato kem su án ne. Sukwatum ne tepsu ye Yahudi bi sukduno-i re.
15Sane sukwatum gato kem su án ne kadum do, ye Yahudi bi sukduno-i ne da kem mo án mit it. Sane dom án bi sukjimnut gato ndo mo án mit ne kadum do, ye Yahudi bi sukduno-i mo án mit mó re, we án ben suk siri kadit sukwatum ne yo, án bi sukjimnut mo an mit ne ki nai án do, "Siri anane," wo án ben suk tepsu sukwatum ne yo, án bi sukjimnut mo án mit ne ki nai án do, "Sangge anane."
16Sane bere su kam gato Yefun Allah fro ne, tepsu sukdu gato ji kibot Kristus, bere Yefun Allah bes Yesus Kristus wa ndobot yewis yi tepsu sukwatum mo án mit ne do, yé ben suk tepsu sukwatum ne yo, bere Yefun Allah ben sukndo su yé ne, wo yé ben suk siri kadit sukwatum ne yo, bere Yefun Allah syo sukye nai án mone. Bere Kristus jam men bi sukjimnut mwa kom mo men mit gato ye yi jam nde, sane bere An nggiwa watbot men sino re.
17Sarewo su ré, nin dakai ben nin bi suk-i sa u ne? Nin ki do, "Men ré ye Yahudi." Nin nut do, "Men ye Yahudi bi sukduno-i ré sa, ndo wa men re." Nin nut o do, "Men sa, jam Yefun Allah it," ete nin bes nin nggwa kok wai kadit ye yi neya mo sukdu gato nin ki ne.
18Nin jam ye Yahudi bi sukduno ne, sane anato nin jam suk gato ndo wa nin benbot, nin jam suk gato Yefun Allah iwa nin benbot ne, nin jam suk gato ndo kadit suk gato ibit ne re.
19Nin ki do, nin sa, nin tepsu yé gato kadum os wa ye gato jam nde Yefun, tepsu ye kadum os wa ye gato gro ndu. Nin ki do, nin sa, nin tepsu sukru wa yé gato kem mo ndendu ne.
20Nin duno ye gato jimgon, nin tepsu yeguru wa ye gato jam nde suk. Nin nut do, mo nin ye Yahudi bi sukduno-i ne sa, nin jam suk mwa, nin bi sukduno-i ne sangge sino re.
21Sane nin do ben suk mwa gane it yo, nin yé gato duno ye yi ne te, nin yo duno nin dakai nde wa suma ne? Nin duno nje do, "Men gitsi suk nde," sarewo suma ben anato nin dakai gitsi suk ne?
22Nin yé gato duno nje, nin ki do, "Men ben siri su yu daret nde," sarewo suma ben anato nin dakai ben siri su nggon ne? Nin bariket sukdaret gato ye bes gum kok tepsu yefun mo nu won, sarewo suma ben anato nin mu gitsi suk mo nu ne?
23Nin bes nin nggwa kok do, "Men bi sukduno-i anato Musa krom ne," sarewo nin ben nin bi suk-i siri kadit sukduno ne, sane anato ye yi ki Yefun Allah gum ibit ket kwayo-kwayo mone.
24Tepsu ye krom mo Yefun Allah bi sukdu sare do, "Nin ye Yahudi ben bi suk-i siri, sane anato yewis yi kiket Yefun Allah gum ibit mone."
25Men ye Yahudi nut do men simo sunat sa, men sok mo Yefun Allah bi rus-i it anane. Siri re, wo men benbot ye Yahudi bi sukduno-i mwa ne sino sa, bere sunat ós men mone tó. Sarewo men ben men bi suk-i siri kadit ye Yahudi bi sukduno-i yo, sunat ne yo ós men sok mo Yefun Allah bi rus-i nde.
26Sane yewis yi gato yo simo sunat nde, sarewo ye ne benbot sukduno mwa ne, bere Yefun Allah nut mo ye ne do, ye ne tepsu ye gato simo sunat it.
27Sane bere yewis yi gato yo simo sunat nde, wo án benbot sukduno mwa ne, bere ye ne ki nin ye Yahudi gum ibit, we sukduno ne da kem su nin, ete nin simo sunat, sarewo nin ben nin bi suk-i siri kadit sukduno ne re.
28Ye gato ben nggwa mo de nden ne tepsu ye Yahudi sor re, ye ne yo tepsu ye Yahudi sangge nde. Sane dom ye simo sunat mo ye kaim de nden ne sor re, ye ne yo simo sunat gato sangge nde.
29Wo sare, ye gato mit dik wa ye Yahudi bi suk-i anato ye Yahudi gato sangge. Sane dom, ye gato simo sunat mo an mit anato simo sunat gato sangge. Yefun Allah Gen bisunat an mo an mit, yetu yo bisunat an tepsu sukdu mo Musa bi buku ne nde. Sane yetu yo un ye gato simo sunat sangge nde, wo Yefun sa, bere un ye ne re.