Dual Panel1Ji gum anato sok mo Kristus bi rus-i it, sane suk gato ji ki ré sangge, ji yo kidar nde. Sane dom, Yefun Allah Gen jom ji bi sukjimnut mo ji mit, sane suk gato ji ki ré sangge, ji jam ware.
2Ji nutbot ji dakai bi yewis-i, ye Israel, ji nutbot ndo nde ware, ji ku sukye mo ji mit, ji yo ndo o nde, we ji bi wis-i ko kadit Yesus Kristus tó.
3Ji jimnutbot ji bi wis-i ndo nde anato ji dakai fro ji nggwa wa Yefun Allah dufo mo ji, ete syesyar ji wé kadit Kristus bi nje-i, subere Yefun nai ji bi wis-i sok mone win ji.
4Ji bi wis-i, ye Israel ne, Yefun Allah nai tepsu An dakai bi pá-i ne suga nyim ne it. Yefun Allah kadum An bi suktinggi gato sye wai nai men ye Israel. Yefun Allah tom suk bok yo su men, Yefun Allah grem bi sukduno-i kem su men re. Yefun Allah kadum An bi os-i gato ri-roi nai men wa men som Yefun mo bi nu ne. Yefun Allah tom suk mwa neya su men re.
5Men ye Israel anato bi amui mo yepasye sato Abraham e, Isak si Yakub. Men bi amui ne anato pe Kristus. Kristus anato Yefun gato jom suk mwa ne sino, men sino un An to kapyo mato kapyo. Sangge.
6Suk gato Yefun Allah tom su ye Israel ne, ye Israel deyo ki do, Yefun Allah yo benbot nde, sarewo ji yo bi sukdu-i sane nde re. Yefun Allah benbot suk gato An tom ne, An yo nai ye Israel bi pa-i mwa ne sino tepsu Yefun dakai bi pa-i nde.
7Abraham bi wis-i ne dom, Yefun Allah yo nai pa mwa ne sino tepsu An bi pa-i nde. Tepsu Yefun Allah ki nai Abraham do, "Kadit Isak ré bere nan ku nan bi wis-i ne mwa sagato Ji tom su nan ne."
8Sane pa mwa ne sino mo Abraham bi wis-i, Yefun Allah yo nai tepsu An bi pa-i sino nde re, wo pa gato Yefun Allah tom su Abraham ne anato pa gato ma kadit Isak bi wis-i. Yefun Allah tom do, bere An nai pa gane sor re,
9we Yefun Allah tom su Abraham sare do, "Tepsu kam gato Ji ma o ne, bere Sara pe pa yebris it."
10Sane dom, Ribka kem su pa yebris we, bi ai dik. Pa we ne bi ai anato men bi amui bi yepasye dik yo gato gum do Isak.
11Suga nyim tuya Ribka kem su pa ge we ne nde tó, Yefun Allah fro pa we wok tepsu yeketke mo yewis ye Yahudi ne nyim wé re. Pa we sye si pa we wok yo ben suk gato ndo si suk gato ibit mo nde tó, wo Yefun Allah dakai bes pa we wok nyim wé re, tepsu pe gato Yefun Allah dakai iwa fro ne, we Ribka bi pa yebris ge we ne yo ben suk gato ndo si suk gato ibit mo nde tó.
12Yefun Allah ki nai Ribka nyim do, "Pa dosye ne bere jammo pa dowok."
13Tepsu ye krom mo Yefun Allah bi sukdu do, Yefun Allah ki do, "Ji bi sukjimnut sye kas subot Yakub, wo Ji bariket Esau."
14Sane men ki subot suk gato Yefun ben su pa we ne sa u ne? Yefun Allah yo ben suk-i ri-roi nde bado? Sane nde re,
15we Yefun Allah ki nai Musa do, "Ji dakai ben Ji bi suk-i ndo su ye gato Ji dakai iwa ne sor. Ji dakai jimnotku ye gato Ji dakai iwa ne sor."
16Sane Yefun Allah ben An bi suk-i su nje it yo, An yo me kadit suk gato ye mit iwa ne nde, Yefun Allah yo me kadit suk gato ye werwa ben ne dom nde, wo Yefun Allah dakai jimnotku nje anato An fro suk gato An ben ne,
17we ye krom mo Yefun Allah bi sukdu do, "Yefun Allah ki nai yeraja mo bur Mesir gato Yefun ben sukye bok yo nai ne do, 'Ji bes nan tepsu yeraja subere Ji kadum Ji bi suktinggi bor mone, subere ye ki sukdu subot Ji gum frekbot nje sane sor yé mwa mo bur ré iwedewe sino jam Ji gum re.' "
18Sane, Yefun Allah dakai jimnotku ye gato An dakai iwa ne sor re. Sane dom, Yefun Allah dakai ben nje su krat, sato yeraja mo bur Mesir, tepsu pe gato Yefun Allah dakai iwa ne sor re.
19Bere nin ge dik yo ki nai ji do, "Yefun Allah fro suk mwa ne, sane suma ben anato Yefun Allah ben sukye nai yetu mo sukibit gato ye ben ne? Je u anato nggiwa ben bi suk-i tara kadit pe gato Yefun Allah fro ne?" Bere men yetu yo nggi mo nde.
20Sarewo nin ré tepsu yetu sor re, sane nin yo nggiwa duwer Yefun Allah mo suk gato Yefun fro ne nde. Nin tepsu sukbo gato ye fro wa jan bunga mone sor, sane sukbo bere brek ma ndo mo ye gato ut sukbo ne do, "Nan ut ji ka sare wa suma ne?"
21Ye gato ut sukbo, an nai bur ka gato ut, ete an fro sukbo su, tepsu pe gato an imo fe! An nai bur ka gato ut ne gum dik yo, ete an fro sukbo wis we, sukbo dik yo wa an sye suk gato ndo wai mó, wo sukbo dik yo o wa suk yi neya. An fro bi sukbo we ne tepsu An dakai bi sukjimnut-i sor.
22Yefun Allah ben An bi suk-i tepsu An dakai bi sukjimnut-i ne sor. Yefun Allah da iwa kadum An bi sukmaskwa si An bi suktinggi nai nje syen sukibit gato yé ben ne, sarewo Yefun Allah eswa yei, An yo ben sukye ne nai nje kekro nde. Ye gato bere ku An bi sukmaskwa ne, An yo ben ibit nde yei, wo An ben An bi suk-i tepsu bi kam-i gato An fro wa ne sor.
23Yefun Allah iwa kadum suk gato ndo yé, An iwa kadum nai men yé gato An dakai jimnotku. Yefun Allah fro men wa men ku suk gato ndo yé ne, An fro men suga nyim ne wé re.
24Men ré anato yé gato Yefun Allah fro wa ku suk gato ndo yé ne, men ye Yahudi sor nde, wo yewis yi neya dom re.
25Tepsu Yefun Allah bi sukdu gato ye krom mo yenabi Hosea bi buku ki do, "Ye gato yo tepsu Ji bi rus-i nde, bere Ji ki do, 'Ji bi rus-i anane.' Yewis gato Ji yo mit iwa nde, bere Ji ki do, 'Ré ne, Ji mit iwa wis ne it.' "
26Sane o, "Mo pe gato Yefun ki do, 'Nin tepsu Ji bi rus-i nde,' bere mo pe ne dom, ye ki subot nje mone do, 'Yefun Allah gato gesyos ne bi pa-i it anane.' "
27Yesaya ki nggi subot ye Israel do, "Sangge, nin ye Israel mwa tepsu yen mo sem de, sarewo nin ge bok yo sor ete kem ndo to kapyo mato kapyo,
28we bergan Yefun Allah ma mo bur ré, ete syo sukye nai nje syen sukibit gato ye ben ne o re."
29Yesaya ki o do, "Yefun Allah gato nggi wai o re, An mewa ye Israel napyo kem, ondesor sa, men sino kwop or, tepsu nje mo kota Sodom si kota Gomora kwop or re."
30Sane, men ki men bi sukdu-i sa u subot yewis yi ne? Men bi sukdu-i anare: Yewis yi yo wergat nggwa wa ben suk yo subere Yefun Allah nai án gum sok mo Yefun bi rus-i ne nde. Sarewo án onyar kem mo Yesus Kristus anato Yefun Allah nai án gum sok mo Yefun bi rus-i it.
31Sarewo ye Yahudi wergat nggwa wa benbot ye Yahudi bi sukduno-i subere Yefun nai án gum sok mo Yefun bi rus-i ware, ye Yahudi yo ku os mo suk gato án ben ne nde.
32Suma ben anato ye Yahudi yo ku os mone nde ne? We, ye Yahudi ne ben suk, án yo onyar kem mo Yesus Kristus nde, wo án nut do, án werwa án benbot ye Yahudi bi sukduno-i ne sa, bere Yefun nai án gum sok mo Yefun bi rus-i. Ye Yahudi bi sukjimnut ne siri re, sane án yo jambot Kristus nde, anato án yo sok mo Yefun bi rus-i nde. Án tepsu ye gato mu ete án gwes ti mo jok, ete án ges.
33Yenabi dik yo krom sukdu gato Yefun Allah ki subot Kristus tepsu jok ne sare do, "Nin me more et, Ji grem jok dik yo mo nat gato gum do Sion. Yé gato gwes ti mó jok, bere án ges. Sarewo ye gato kwabom kam mo jok ne yo, bere ye ne damen nde, wo ye ne jam do, suk gato jok ne fro bere bor mone sor."