Dual Panel1Orete ji sokme Domba Gan ti mo banbo Sion. Yetu ge 144.000 si Domba Gan ti mone sino. Ye krom Domba Gan si bi Ai gum mo yé mwa ne git det re.
2Orete ji jam ye yo ki sukdu kadit gu ne ma. Ye ne ki bi sukdu sa, an ba sye tepsu syur gato sye ú mo tú, an ba syo-i sye tepsu nogu pu sye. An ki bi sukdu-i sa, an ba syo-i ndo tepsu ye kamo kecapi.
3Yetu ge 144.000 ti mo Yefun Allah bi kursi ne gwem. Suge at si yenggras ge musyu we sop at ne sino ti mo kursi gwem ne dom. Yetu ge 144.000 ti mone ba sukbadek dobe. Yetu mwa ne sor ete jam ba sukbadek ne, ye yi yo nggiwa jam sukbadek ne nde. Yetu mwa ne anato yetu mo bur ré gato Yesus Kristus tot suktot mo sukibit gato án ben ne wé re ne.
4Yé mwa ne yo sem su nggon yo mo nde. Án mewa án nggwa kadit nggon re. Mo pe mwa ne sino gato Domba Gan mu mone, án si Domba Gan mu sino sor. Yesus Kristus bi nggwa wa tot suktot mo sukibit gato án ben ne wé. Yé mwa ne anato yé gato sok mo Yefun Allah si Domba Gan bi rus-i nyim kadit ye yi. Ben sato án tepsu sugit napyo gato kri nyim, gato yé syo nai Yefun.
51Án yo kidar suk wam dik yo dom nde. Sukibit yo ut mo án wokgan yo dom nde.
6Orete ji sokme malaikat ge dik yo o ok mo gu nim ne. Malaikat ne gwat suktaru subot os ndo gato Yesus Kristus kak wa men yetu gato kem mo bur ré. Suktaru ne kak os ndo wa men subere men ku os wa men kem ndo to kapyo mato kapyo sor. Malaikat gwat suktaru ne wa an ki nai yetu mwa ne sino, yetu mwa mo buryo-buryo e, wisyo-wisyo e, yeyo-yeyo e, ayo-ayo e ne sino.
7Malaikat ne saiye do, "Ré yo, kam tepsu Yefun Allah ndobot men yetu mwa ne sino mo bur ré it, sane nin nyuwa Yefun Allah et! Nin bes An gum kok sye wai et! Nin jammo An gato ut gu nim ne e, bur ré e, sem e, syur e ne sino et!"
8Malaikat kedowe boribot malaikat doketke. Malaikat kedowe ké do, "Kota Babel gato yé bes gum kok ne ibit or re, ye yo kem mo nat ne o nde. Yé mo kota ne gwat os ibit wa yetu mwa mo bur ré iwedewe sino. Yé mo kota ne gwat os ibit sane sor yetu mwa misyar Yefun tepsu yekra misyar bi nggon ne ete mu ben siri su nggon yi yo o re. Yé mo kota ne gwat os ibit. Ben sato ye syo nau nai yé mwa da sane sor yé mwa neya yenau su. Sane Yefun Allah ben kota ne ibit or re."
9Malaikat kedogri waii boribot malaikat ge we ne, ete saiye do, "Yé gato som suge doketke si suk gato ka sa suge ne, ete ye syat ja mo án git det, ondeyo ye syat ja mo án syim rut de nden ne yo,
10bere án ku sukye ndo nde. Bere Yefun Allah maskwa ket án ndo nde, ete syo sukye nai án, tepsu Yefun Allah sye nau gato nggi mo bi mok, ete syo nai án da. Bere án ku sukye ndo nde mo nau ne. Bere bot ru sye basmi kwik su belerang ne kam is án ndo nde, ete án dipa su. Bere án dipa ndo nde mo Yefun Allah dakai bi malaikat si Domba Gan gwem.
11Bot bu it kadit bot gato kam is án. Bot bu ben án dipa ne. Bot bu ne it sane sor to kapyo mato kapyo. Án, yé gato som suge doketke si suk gato ye ut ka sa suge ne ku sukye sor noru nombrak. Sane dom, yé bok gato suge ne syat bi ja mó, bere ku sukye sor noru nombrak."
12Sane men yé gato onyar kem mo Yesus Kristus, gato jammo Yefun Allah bi sukdu-i, men do ku sukye it yo, men misyar Yefun Yesus nde, wo men simo An pe sor.
13Orete ji jam sukdu kadit gu ne sare do, "Nan krom sare do: Kadit kam ré yo, yé gato ben Yesus Kristus bi suk-i, ete kwop mone, yé ne sa, mit at wa, we bere Yefun ben sukndo su án." Yefun Allah Gen ki do, "Sangge, yé ne ku suk mwa gato ndo mo suk gato án ben ne. Sane yé ne yo mitwa ben suk mwa o nde, wo án kem not kadit re."
14Orete ji sokme nyotem kwo dik yo. Ji sokme suk yo ka sa yetu kem mo nyotem ne yu. Ye ne bom yekwesu bi topi emas mo an su. An jom nyom ot syu gato ot.
15Orete malaikat ge dik yo syesyar kadit Yefun Allah bi nu mo gu. Malaikat ne saiye nai ye gato kem mo nyotem ne do, "Nan nai nan bi nyom, nan tot sugit su, we su ré yetu mo bur fro wa nan mu nai án, tepsu sugit gato kri mo nggwe fro wa ye mu tot ete nai ma ne."
16Sane ye gato kem mo nyotem ne tot sugit su an bi nyom mo bur ré. Malaikat ne nai yetu ma tepsu ye tot sugit gato kri mo nggwe, ete nai ma.
17Malaikat ge dik yo o syesyar kadit Yefun Allah bi nu mo gu. Malaikat ré jom nyom gato ot dom.
18Or o malaikat ge dik yo o ma kadit meja gato ye grem suksom mone wa ye som Yefun Allah su mo gu ne. Malaikat ne mewa bot mo meja ne. Malaikat ne ma an saiye nai malaikat gato jom nyom gato ot ne do, "Nan gwat nan bi nyom gato ot ne mu, nan tot anggur bo mo kwe anggur mwa mo bur ré, nan nai bo ne nan gwat ma, we anggur bo ne um it."
19Malaikat ne mu tot anggur bo mwa ne mo bur ré, sum i-bo, ete gwat ma bok mo nat gato sagana yé yakos anggur bo ne subere i-rom syesyar. Nat ne sye we Yefun Allah fro nat ne nyim wé ne. Mo nat ne yé yakos anggur bo sane sor i-rom ne syesyar. Yé yakos anggur bo tepsu Yefun Allah syo sukye nai yé gato bariket Yefun, Yefun bi sukmaskwa bor mone.
20Yé yakos anggur bo mo nat gato mo kota de nden, tepsu ye gu nje ete yetu dé sye kadit jokwak ne. Yetu dé sye sane sor, yetu dé sye kom mo kilometer wotin gri ete yetu dé sye kru karowa meter we.