Dual Panel1Ji sokme saresa, Domba Gan ne kak lilin gum gato ye ut buku krat su ne. An kak lilin gum dik yo wé. Orete ji jam suge at ge dik yo saiye. Suge dik ne saiye tepsu nogu pu sare do, "Nan ma se!"
2Ji sokme sa, ji me kuda kwo ge dik yo ma. Ye gato it mo kuda ne jom syu im si bi kunus. An ku yekwesu bi topi wa an bom mo an su. An mu tepsu ye gato nggi wai kadit suk mwa neya. An futmu wa gu yekwesu yi neya kwop wé, eteyo an jowa yekwesu ne bi yetuge-i.
3Domba Gan kak lilin gum dowe ne wé sa, ji jam suge at kedowe ne ki do, "Nan ma se!"
4Sugane kuda ge dik yo o syesyar. Kuda ne er tepsu bot ru. Ye gato it mo kuda ne ku suktinggi wa ben yetu mo bur ré maskwa yu, subere yé gu yu kwop. Ye gato it mo kuda ne ku nyom sye gato ot de we wa an gwat.
5Domba Gan kak lilin gum dogri ne wé sa, ji jam suge at kedogri ne ki do, "Nan ma se!" Ji sokme sa, kuda te ge dik yo ma. Ye gato it mo kuda ne jom timbangan.
6Sugane ji jam sukdu sato yetu ki bi sukdu-i syesyar kadit suge at ne miten sare do, "Gaji gato ye ku mo suk gato ye ben mo kam dik ne tepsu ye so gandum gato ndo tepsu kilo dik sor re. Sane dom, kam dik bi gaji tepsu ye so gandum wis yi tepsu kilo gri sor re. Gandum wis bok ne sugum sye re, sarewo nan mewa kwe zaitun si nggwe anggur subere ibit nde."
7Domba Gan kak lilin gum doat ne wé sa, ji jam suge at doat ne ki do, "Nan ma se!"
8Ji sokme sa, kuda er kwosak ge dik yo ma. Ye gato it mo kuda ne gum do, Sukkwop. Ye gato gum do Gwinggri Syo boribot karowa Sukkwop. Ye we ne ku suktinggi wa gu yetu napyo kwop wé kadit bur ré. Ye we ré gwat os bok yo wa gu nje kwop su suk sato: yé gu yu e, sukonde sye gu nje kwop e, suki wis bok yo gu nje e, suge krok gu nje e ne.
9Domba Gan kak lilin gum domek ne wé sa, ji sokme yetu da gesyos ge bok yo mo meja gato ye gre suge wa som Yefun Allah su mone. Yé bok ne kem mo meja desnak mo bur. Suga nyim yé bok ne mbau mo bur ré tó, án kibot Yefun Allah bi sukdu. Án kibot sukndo gato Yefun ben su án nai ye yi jam gat pe sor anato yé gu án kwop wé mone.
10Yetu da gesyos ge bok ne saiye nggi do, "Yenggras ga gum sye wai o re, Nan sa, Yekwesu gato ben Nan bi suk-i ndo petok, Nan ben Nan bi suk-i ri-roi sor. Kam ot ete Nan ndobot yetu mo bur ete syo sukye nai yé gato gu men ré ne? Nan eswa suma o ne?"
11Yé bok ne ku san gato kwo ndo wa án it. Yefun syogat án kem not yei sane sor án bi nji, gato si án ben Yefun bi suk-i ne, yé gu kwop sagato yé gu án ne, kom mo pe gato or mó, ete bere Yefun ndobot yetu mo bur ré.
12Ji sokme Domba Gan kak lilin gum domumat ne wé sa, sui juwai bur ré ram ndo nde. Kam su mo gu ne te or re, kam su te tepsu san te re. Aina ne er, tepsu yetu dé re.
13Bí mwa ne mo gu ne ges mo bur, sugato nofuf kas nggi ti mo kwe ne, kwekwa ram eteyo kwe bo ges or.
14Gu ne fres wé re, tepsu ye pam sun, ete ye gwat mu re. Banbo mwa si ef mwa ne sino mu kem mo nat yi kadit bi nat-i ne o re.
15Sugane yeraja mo bur ré e, yekwesu e, yesukmise bi yesu e, yemambot e, yepasye e, yé mwa ne sino, ye gato gum pakwerut si ye gato dakai ti mo an dakai ne sino titi mu gurik nggwa mo jokwak si jok sye ndet mo banbo re.
16Án sino saiye nai banbo si jok sye mwa mone do, "Nin krut ma gurik men et. Nin gurik men subere Yefun gato kem mo An bi kursi ne yo sokme men nde. Nin gurik men subere Domba Gan ne yo ku os wa ben sukye nai men nde.
17Sangge, kam sye ne ma it. Yefun Allah si Domba Gan ne ma wa syo sukye nai yé mo sukibit gato nje ben ne. Kam sye ne ma it, ye yo nggiwa ku os wa syesyar kadit sukye ne mo nde."