Alkitab Mobile SABDA
[VER] : [ABUN]     [PL]  [PB] 
 <<  Yohanes 17 >> 

1Yefun Yesus ki sukdu su An bi pakon subere pakon ne nyuwa suk daret nde or sa, Yefun Yesus sok mu nim mo gu, ete An ki do, "Ji bi Ai, Ji bi kam tep it are. Ji bi Ai, Ji gato Nan bi Gan, Nan bes Ji gum kok sye wai et, subere Ji waii bes Nan gum kok sye wai o re.

2Nan bes Ji gum Yekwesu wa Ji jom yetu mwa ne sino mo bur ré re, subere yé mwa ne sino gato Nan syo nai Ji ne, Ji ós án kem gesyos.

3Án jam Nan, Yefun Allah ka dik gato sangge, ye yo nggi tepsu Nan mo nde. Án jam Ji, gato Nan bi Gan, Yesus Kristus gato Nan syogat ma more anato án kem gesyos.

4Ji ben suk mwa gato Nan kiwa Ji ben ne sino anato yé mwa mo bur ré bes Nan gum kok sye wai o re.

5Ji bi Ai, Nan yo ut bur ré nde tó, Ji si Nan, ete Nan bes Ji gum kok mone re. Sane su ré, Nan bes Ji gum kok sye wai satu o et.

6Ji kadum Nan nai yé mwa gato Nan syo nai Ji mo bur ré, yé mwa ne jam Nan re. Yé mwa ne anato Nan bi rus-i. Nan syo án nai Ji re. Án benbot Nan bi sukdu-i re.

7Su ré án jam do, suk mwa ne sino gato Nan syo nai Ji, suk mwa ne ma kadit Nan.

8Sukdu gato Nan ki nai Ji, Ji waii ki nai án jam re, án iwa sukdu ne. Án jam do, sangge Ji anato ma kadit Nan, Ji bi Ai. Án jam do, sangge, Nan anato syogat Ji ma mo bur ré re.

9Ji ki suk su Nan wa án, yé mwa gato Nan syo nai Ji ne. Ji yo ki suk su Nan wa yetu mo bur ré nde. Wo Ji ki suk su Nan wa yé gato Nan syo nai Ji, we án anato sok mo Nan bi rus-i.

10Nan bi suk mwa ne sino anato Ji bi suk-i dom. Ji bi suk mwa ne sino anato Nan bi suk-i dom. Yé mwa gato Nan syo nai Ji, bere án bes Ji gum kok sye wai o re.

11Ji ma mo Nan it anare, Ji yo kem mo bur ré o nde, sarewo án ye gato Nan syo nai Ji ne kem mo bur ré tó. Ji bi Ai, gato gum kok tara wai kadit yetu, Nan bes Ji gum-i kok tepsu Nan gum-i gato bi suktinggi ne mó. Sane Nan yawa án kadit sukibit su Nan bi suktinggi ne et, subere án sino tepsu dik, tepsu Ji si Nan tepsu dik dom.

12Ji sisu án sa, Nan bes Ji gum-i kok tepsu Nan gum-i anato Ji yawa án kadit sukibit su Nan bi suktinggi gato Nan syo nai Ji re. Ji mewa án sane, dik yo gwet mo nde, mwa ne sino mó. Wo ge dik sor anato ges mo os ibit kadit men subere sukdu gato yé krom nyim mo Yefun bi sukdu ne bor mone it.

13Ji bi Ai, Ji ma mo Nan it anare. Ji mo bur ré tó Ji ki napyo nai án ye gato Nan syo nai Ji ne jam, subere án mit at wa, tepsu Ji dakai mit at wa wai o re.

14Ji frot Nan bi suktaru nai án, eteyo yetu mo bur ré bariket án re, we án si yetu mo bur ré yo bi sukjimnut-i tepsu dik nde. Ji dom, Ji si yetu yo bi sukjimnut-i tepsu dik nde.

15Ji yo ndek mo Nan subere Nan nai án wé kadit bur ré nde. Sarewo Ji ndek mo Nan subere Nan mewa án kadit biris bi yekwesu gato jom nje mo bur ré.

16Án si yetu mo bur ré yo tepsu dik nde. Ji dom, Ji si yetu mo bur ré yo tepsu dik nde.

17Nan bi sukdu anato sangge. Nan bi sukdu ete ben án subere án bi án nggwa wa án ben Nan bi suk-i ne sor.

18Nan syogat Ji ma mo bur ré wa ben Nan bi suk-i, sane Ji waii syogat án mu mo nje mo bur ré wa án ben Nan bi suk-i ne dom.

19Ji bi Ji nggwa wa Ji ben Nan bi suk-i wa án, subere án waii bi án nggwa wa án benbot Nan bi sukdu-i gato sangge petok sor.

20Ji ndek mo Nan wa án sor nde, wo Ji ndek mo Nan wa yé gato bere onyar kem mo Ji mo sukdu gato Ji bi pakon ré ki nai án jam ne.

21Ji bi Ai, Ji ndek mo Nan subere án sino tepsu dik, tepsu Nan si Ji tepsu dik. Án ete si Men tepsu dik dom et, subere yetu mo bur ré jam do, sangge Nan anato syogat Ji ma mo bur ré re.

22Yé gato onyar kem mo Ji ne, Ji bes án gum kok, tepsu Nan bes Ji gum kok, subere án sino tepsu dik, tepsu Ji si Nan tepsu dik dom.

23Ji si án tepsu dik, ete Nan si Ji tepsu dik subere án sino tepsu dik sisu sangge it. Sane bere yé mo bur ré jam do, Nan anato syogat Ji ma more. Sane dom bere yé mo bur ré jam do, Nan bi sukjimnut sye kas subot Ji bi pakon ne tepsu Nan bi sukjimnut sye kas subot Ji re.

24Ji bi Ai, Nan syo Ji bi pakon nai Ji re. Ji iwa án si Ji kem mo nat gato bere Ji kem mone, subere án me do Ji anato gum kok sye wai o re. Nan yo ut bur ré nde tó, Nan bi sukjimnut sye kas subot Ji, Nan bes Ji gum kok sye wé re.

25Ji bi Ai gato ben bi suk-i ndo petok sor, yé mo bur ré yo jam Nan nde, wo Ji sa, Ji jam Nan re. Ji bi pakon ré dom jam do, Nan anato syogat Ji ma mo bur ré.

26Ji anato kadum Nan nai Ji bi pakon re. Bere Ji ki sukdu subot Nan petok sor subere án bi sukjimnut sye kas subot yu petok sor, tepsu Nan bi sukjimnut sye kas subot Ji, subere Ji si án tepsu dik."


  Share Facebook  |  Share Twitter

 <<  Yohanes 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel