Dual Panel1Pano di kami' ang mendahi to pambahanammu, pahallukoa' unsangaang sabua'na Kristus ang nasuo umpakalesoing kahebana Puang Alataala, yato ang dake' aha nahingngi to lino.
2To disuo pahallu tuhu'-tuhu'ang liu umpembabeing pangngelo'na yato ang mansuo.
3Dahi ponna ke ahai di alla'mu ang pemala unsalla pengkähängangku, ya' dai maaka di kodi'. Moi menna ang mansallaä' dai maaka. Kodi'-kodi', dai si kupihki' mahasaraka pengkähängangku, daraka.
4Yaling di inahangku kusa'ding mapia lambi' kuinsang kuoatee dai aha kubabe ang sala. Ampo' tadia yato inahangku ang mampamarohoä'. Aka' ang la mampahehsaä' anna mambohtu, setonganna Dehataetee'.
5Dahi, solasohong, daa umpahehsa pengkähänganna solamu ungngoatee bahtu' la mahasaraka, daraka. Empeike' kasuleanna Puang Yesus, aka' Dianto ang la umpalanda' asang ingkänna ang tibuni tama di kamalillingang. La umpalanda' ingkänna pahtuyunna inahanna hupatau. Anna ke donentoo mane la napudii Puang Alataala ingkänna yato ang sihatang dipudi.
6Oa' solasohong, inde kaha-kaha ang mane kuuki' nahoaang ta Apolos. Kami' inde kiderua kupohapangang anna malakoa' kupaturu untuhu'i pahenta ang tiuki' andana umpakeangka' arangkoa' to pambahanammu la'bi andana ang sihatang. Pahtuyungku dianto anna dai aha di alla'mu ang la malängkä' inaha lambi' ungngoatee, "Di kodi'na kodi', to pentindo'naä' ta Anu."
7Unsangarakaa' kalaemu londo puha nei' andana tau senga'? Pihki'i, ingkänna ang aha pano di kalaemu, nabea asangkoa' Puang Alataala. Dahi, ponna ke inang napanoai, ya' akana malängkä'ia' inahammu?
8Unsangaa' dang aha ang ungkalala'i? Bahtu' umpihki'rakato ungngoate sihoang kamatoto'anna kapampetahpa'ammu dai' di Dehata? Lambi' umpakeangka'koa' kalaemu sihapang tomaraya ang dai pahallu kidului. Ya' la mahasa si'da ke la pake malai mendahikoa' tomaraya, aka' ponna ke noai, ya' la malamingkea' ma'pahenta sibaha-baha.
9Ampo' daang kami' aha mentomaraya, aka' situhu' pihki'ku, setonganna kami' ang mendahi rasul inang napabeiang Puang Alataala mendihoi'ang liu di olona hupatau. Didahhaang sinnoa to ditahungkung mate ang si napakauho-uho tau mai'di. Mengeang nahele ihsinna lino, moi hupatau, noa tunne' malaeka'.
10Yato tau mai'di si nasangaang to maho aka' kipepainsangnging yato kahebana Kristus, ampo' dioa'-dio si unsangaa' kalaemu keaka' yaling di Kristus! Kami' diangka'ang malamma, ampo' dioa'-dio unsangangnga' kapampetahpa'ammu matoto'mi! Dioa' napakeangka' hupatau, ampo' kami'-kami' napakauho-uhoang.
11Lambi' dinoa dai kanna' andeangki', enu'ki', porehaki'. Si dipohetong loloang. Anna dai aha ongeangki' tohho.
12Si mengkähäng kahha'ang umpake tobouang kami' teyyeki'. Ponna ke ahai ang mantändoang, ya' kibala' kipalauing behe. Anna ponna ke ahai ang mandahhaang, ya' sa'bara' tomande'ang.
13Noa toi ponna ke ahai ang mangkeaha'iang, ya' si kitimba' malunä'. Lambi' dinoa si naindä'-indä'ang to lino, si napasihapangngang supu oyo kalane.
14Oa' solasohong, nasuhung anna kuuki'i noa indee tadia anna malakoa' kupakasili. Ampo' diare' anna malakoa' kukambahoing sihapang änä' ang kupakamaya.
15Aka' moinnakato anna ma'sa'bu-sa'bui tuangkuhummu ang la mala mantehtekoa' mentindo' pano di Kristus, ampo' supung kodi' ang sihatang umpoambe, aka' kodi' ang handang dolu umbahaingkoa' yato Kaheba Mapia lambi' mampetahpa'koa' pano di Kristus Yesus.
16Dianto anna kupalau si'da-si'dai la untindo' manahpa pembabeku.
17Dahi dianto anna kuangka'ing unsuo ta Timotius mating la napellambi'ikoa'. Inde ta Timotius kupasihapang änä' ang kupakamaya, mesa tau ang tuhu'-tuhu'ang yaling di pengkähänganna Dehata. Ponna ke lambi'mi mating, ya' la napakalehakoa' umba kupanoa untindo'i Kristus Yesus, ang situhu' yato ang si kupepakuhuing di umba-umba naongei.
18Kuinsammi aha di alla'mu ang malängkä' inaha lambi' unsangaa' damä' bahani la kupellambi'ikoa'.
19Ampo' inang la baha' matingngä' ke naelo'i Dehata. Doneke'too mane kuitai pole' aka ang la nababe yato tau ang si mayahoang tula'na. La kuita ke inang ma'kuasa si'dai, bahtu' to pa'kara-kara kaleraka.
20Aka' ke tuhoi tau yaling di Kapahentaanna Puang Alataala, ya' dai la tandaang yaling yato supu di tula'na, ampo' la tandaang aka' landa'mi kakuasaanna Puang Alataala yaling di pembabenaii.
21Ponna ke matingngä' anna la tontong loloi pembabemu, ya' la umbahaä' petahungkung anna kara kahha'. Ampo' ke mahasang pembabemu, ya' la malunä'ä' anna ma'kalemu mating. Dahi umba kahang ang ungkärä'i puha?