Dual Panel1Katämpä'anna, ingkämmua' solasohongki', puhamokoa' kipakaenga' anna kipaitai pohapangang umba dipanoa tuho anna malai umpamasannang inahanna Puang Alataala. Moinnakato anna inang si umpanoangnga', ampo' dinoa kipalau buke' mating anna kipaturukoa' sibaha sanganna Dehatantaa' Puang Yesus la tuhtuang umpamatama loloke' kaha-kaha yatoo.
2Aka' ungnginsammia' ingkänna yato pepaturu ang puha kitula'ingkoa' yaling di sanganna Dehatantaa' Puang Yesus.
3Situhu' pa'elo'na Puang Alataala la tuho maserokoa'. Dakoa' membabe tasampa'.
4Pahallukoa' la ungkuasai kalaemu, londonang dioa' muane ke mohapumokoa' pahallukoa' tuho masero sibaha sangkolummu anna pahallu umpakeangka'.
5Dakoa' mala untuhu'i pampemala karakemu, sinnoa ang si nababe to tamampetahpa' dai' di Puang Alataala,
6andana umbabekoa' tadia babe anna umbulitu' santomampetahpa'mu. Aka' pano di ingkänna ang umbabe katasampa'ang, la nahoa kakeaha'anna Dehata, noa yato ang puha kitula' anna kipakaenga'ingkoa'.
7Aka' daingkea' natambai Puang Alataala la umbabe katasampa'ang, ampo' la tuhoingkea' yaling di kamaseroang.
8Dahi menna-menna ang dai untahimbo inde pepaturungki', tadia hupatau ang dai natahimbo, ampo' Puang Alataalaetee' ang mambeaingkea' Inaha Maserona.
9Dang mangki' kipayaling inde di suha'ki' umba la umpanoaa' ungkalemui ingkänna solasohommu to mampetahpa', aka' puhamokoa' napaturu Puang Alataala didiona yatoo.
10Ya' inang si ungkalemuikoa' ingkänna solamu to mampetahpa' yaling di ingkänna Poropensi Makedonia. Ampo' moinnakato noa, kipaturu boukoa', ingkämmua' solasohongki', anna tuhtuang umpamatamake'a' pa'kalemummu.
11Peängngia' lalang umba la umpanoa anna malakoa' malino yaling di katuhoammu. Daa umpentamai kaha-kahanna solamu, ampo' diare' la untanangkoa' sikummu mengkähäng umpeäng katuhoammu, sinnoa yato ang puha kipaturuingkoa'.
12Aka' ponna umbelaa' umpanoa, ya' la tandaangkoa' meada' naita to taumpetahpa' Puang Yesus, anna damokoa' la si unghannuang lolo kähänna solamu.
13Anna mane ahai ingkämmua' solasohongki', dai mapia ke daia' ungnginsang manahpa didiona laoanna to mampetahpa' pano di Kristus ang puhang mate, andana masuhsaia' inahammu sinnoa tau senga' ang dai aha panghannuanna.
14Tapetahpa'a' taoatee puhang mate Puang Yesus anna dinoa tuho sumule. Dianto anna tapetahpa' toia' nei' taoatee, ponna ke suleng dako' Puang Yesus, ya' la napasibaha-bahang sule Puang Alataala yato ingkänna to mampetahpa' ang puhang mate napasilambi' Puang Yesus.
15Didiona kaha-kaha yatoo, situhu' kara Dehata kitula'ingkoa' dinoa kioatee: ingkäntaa' ang tuho loloke' yaling di lino lambi' sule Puang Yesus, inang daringkea'te' la umpendolui tau ang puhang mate umpellambi'i Puang Yesus.
16Aka' tahpana kahingngiang pahenta sitonda kamaha käyyäng di hao mai di kapalana malaeka' anna ke moning terompe'na Puang Alataala, ya' Kalaena Puang Yesus la tuhung yaho mai di suruka. Ingkänna to mate ang mampetahpa' dai' di Kristus dia dolu la napatuho.
17Puhaitoo mane kita'i ang tuho loloke' yaling di lino la tiängkä' sibaha-baha yato to mate dai' di salehu' anna silambi'ingkea' Puang Yesus yaho di nähäng. La noamingkea'too sibaha-baha lolomingkea' Puang Yesus lambi' sapano-panona.
18Dahi dianto inde tula' ang la umpakea' sipakahanga-hanga.