Alkitab Mobile SABDA
[VER] : [ARALLE]     [PL]  [PB] 
 <<  1 Yohanes 1 >> 

1Yaling inde di suha' kuuki' didiona To inang ahang di tempona dake' aha lino. Puhang kiita sibaha matangki' anna kihingngi sibaha talingangki' tula'na Yatoo. Puha tung kianti sibaha teyyeki' anna kiitang pembabena. Diantoo Bahtakara ang Mepatuho.

2Puhang dipepaitaing anna kiitang kami'. Ya' kisa'biing anna kipakahebai Yato ang Mepatuho ang la tontong lolo lambi' sapano-panona. To Mepatuho indee inang ahang sibaha Ambeta mengkalao dolu, anna puhamang kami' dipaitai.

3Aka ang puha kiita anna kihingngi dianto kipakahebaiingkoa', anna malaingkea' mesa yaling di kakalebuang. Dia tuke' kami'-kami' tohhomang yaling di Ambeta anna Puang Yesus Kristus Änä'na.

4Kitula'ingkoa' indee, anna malai sundung kakahsiangki'.

5Dianto inde kaheba ang kihingngi di hao mai di Puang Yesus kipakahebaiingkoa': Puang Alataala dianto kamabayaang bahtu' dioatee kamapiaang, anna dai aha kamalillingang bahtu' dioatee kakarakeang yaling di Kalaena.

6Ponna taoatee, "Tohhomingkea' yaling di Puang Alataala," ampo' tuhoingkea' yaling di kamalillingang, ya' losendingkea'te' disanga aka' daingkea' membabe situhu' katahpa'anna Puang Alataala.

7Ampo' ke tuhoingkea' yaling di kamabayaang, noa kamabayaanna Puang Alataala, ya' sangkalebumingkea'too anna ingkänna dosanta nabaseiingkea' haha titollona Puang Yesus, Änä'na.

8Ponna taoatee, "Dai aha dosanta," ya' umpasähsä' lalangngingkea' kalaeta anna dai tapadiinaha katahpa'anna Puang Alataala.

9Ampo' ponna ungngakuiingkea' dosanta dai' di Puang Alataala, la tontonne' umpasulepano pa'dandinna anna membabe situhu' katahpa'anna lambi' la naampungngiingkea' dosanta anna nabaseiingkea' ingkänna pembabe karaketa.

10Ampo' ponna taoatee, "Daingkea' aha madosa," ya' dianto disanga unsangaiingkea' Puang Alataala to pa'loseng-loseng anna dai tapadiinaha yato bahtakaranna, ang unsangai ingkänna tau: 'to madosa.'


  Share Facebook  |  Share Twitter

 <<  1 Yohanes 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel