Dual Panel1Pano di dioa' ang tadia to Yahudi, ang mampetahpa' pano di Puang Yesus Kristus sinnoa kami' to Yahudi. Hao mai di Simon Petrus, sabua'na anna rasulna Puang Yesus Kristus. Kalaena Puang Yesus Kristus, To Pepasalama', Dehata ang tapenombai, ang mampopampetahpa'koa' sinnoaingkea' aka' maroho pembabena anna dai mampasise'la-se'la.
2Ke la malai tuhtuangkoa' untahimbo behe anna kamasahkeang aka' ungnginsammokoa' Puang Alataala sibaha Puang Yesus, Dehatanta.
3Puang Alataala matande anna mapia inahanna. Mengkalao di kamatandeanna anna kamapiaang inahanna natambaiingkea' lambi' aha kasikenteanta sibaha. Anna mengkalao di kakuasaanna ang käyyäng, ya' halimingkea' nabea yato ingkänna aka-aka ang tapahallu yaling di katuhoanta anna yaling untindo' pengkerona.
4Mengkalao di kamatandeanna anna kamapiaang inahanna, nabeaingkea' pebehe ang käyyäng anna kealli si'da-si'da ang puha medandiing. Nasuhung mebeai yato pebehe, anna malakoa' umpensinnoai pengkerona Puang Alataala anna damokoa' la untuhu'i pampemala karakemu. Aka' yato pampemala karake si ungkarakei katuhoanna tau ang dai ungnginsang Puang Alataala.
5Dahi, solasohong, aka' puhamokoa' nakalemui, ya' tuhtuang hängngängngike'a' pengkero mapia pano yato di kapampetahpa'ammu. Anna pano yato di pengkero mapiammu, ya' hängngängngike' kakeaka'ang.
6Tahhi'na, ya' la pahalluke' unghängngängngi pengkero ang noa indee: dianto ungkuasai tau kalae, sa'bara' yaling di kamasuhsaang, tuhu'-tuhu'ang tau dai' di Puang Alataala
7anna ungkalemui tau solata to mampetahpa'. Ampo' dai la solata supu to mampetahpa' dikalemui, ampo' pahallu toe' tau ungkalemui tau senga'.
8Aka' tuhtuang umpanoa, ya' la tuhtuang toe' maleso dioatee kekuna si'da katuhoammu mengkalao di kapainsangammua' didiona Puang Yesus Kristus Dehatanta.
9Ampo' ingkänna tau ang dai noa yatoo pembabena, ya' sinnoa to buta. Aka' sinnoa mesa to buta dai maleso pennenne'na, ya' noa tunne' pano di tau ang noa yatoo: dai maleso pihki'na aka' dai nakalehai naoatee haling dibasei di hao mai di dosanna.
10Dahi, solasohong, pengkabela-belaii untuhu'i Puang Alataala, anna malaia' ungnginsang ungngoatee puhamokoa' napillei sibaha natambai. Ponna ke umpanoai, ya' inang dakoa' la manaho.
11Anna di allo ang la sule la nabuhkeingkoa' baba Puang Alataala ang lutama di suruka; la natahimbokoa' tama di Katomarayaanna Puang Yesus Kristus, dianto To Pepasalama' anna Dehata ang tapenombai. Anna yato Katomarayaanna inang dai aha kapuhaanna.
12Dahia', solasohong, moinnakato anna ungnginsammi ingkänna indee, anna moinnakato matohomokoa' untindo' pepakuhu ang tahpa', ampo' la kupakaleha lolokangkoa'.
13Kuangka' sihatang ke kuuki'ingkoa' suha' pepakaleha didiona ingkänna indee sumbana tuhokä',
14aka' puha napakalesoingkä' Dehatanta Puang Yesus Kristus naoatee dang masae anna la matemä'.
15Dianto anna mengkähäng si'da-si'damä' anna malaia' ungkalehai ingkänna indee ke matemä'.
16Naonge anna kipaturukoa' kioatee ma'kuasa Puang Yesus Kristus anna la sumule bou tama inde di lino, ya' tadiaete' tohodolu kale sinnoa ang napihki' hupatau. Anna nasuhung kiinsang kioate tahpa', aka' matangki' tobou kami' paita unsa'bii kamatandeanna.
17Dolu yahoang di mesa tanete anna kiitai Puang Yesus mesilo napobua' kamatandeang anna kakeangka'ang ang natahimbo yaho mai di Puang Alataala, Ambena. Donetoo kahingngiang kamahanna Puang Alataala To Handang Matande naoatee, "Dianto inde Änä'ku ang kupakamaya, ang umpamasannang inahangku."
18Kalaeki' ang unghingngi inde kamaha yaho mai di suruka naonge sibaha-bahaang yaho yato di tanete masero.
19Dahi, aka' yato ang kisa'bii, lambi' kiinsang kioatee tahpa' yato ang natula' senabiang dolu. Ya' mahasa ke umpehingngiia' yato tula'naii, aka' sihapang ballo ang mesilo yaling di kamalillingang. Dahi pehingngiia' yato tula'na senabiang lambi' sumule sala Puang Yesus tama inde di lino. Kasuleanna la sinnoa lelle'na allo, bahtu' sohonna bintäng pambaha allo.
20Ang handang pahallu ungnginsang, dianto dai aha moi poro la mesa tau ang la mala umpekaleso bahtuanna tula'na nabi yaling di Suha' Masero situhu' pihki'na toboe'.
21Aka' senabiang dolu umpepainsangnging tula'na Puang Alataala, dai situhu' pa'elo'na hupatau, ampo' situhu' petehtena Inaha Masero lambi' mala sika untula' Bahtakaranna Puang Alataala.