Dual Panel1Noa tunne' di hao di Ikonium Paulus sibaha Barnabas le'ba' tama di pa'sambayanganna to Yahudi anna mampakuhui didiona Puang Yesus, lambi' mai'di to Yahudi anna ang tadia to Yahudi mampetahpa'.
2Ampo' to Yahudi ang dai naaku untahimbo tula'na yato to deruai umpakeaha' tau senga' ang tadia to Yahudi anna malai sika ungkahi'di' to mampetahpa'.
3Dianto anna masae-saeke' Paulus sibaha Barnabas tohho di hao anna untula' loloi Bahtakara Dehata napunnoi kabahaniang aka' unghannuang Puang Yesus. Ya' napatandaammi Dehata dianto kaheba ang sika napalambi' didiona mana' pa'kalemunna inang tahpa', aka' nabea kakuasaang anna malai umpapia ma'kahupa-hupa tanda anna mai'di ang mepusa'-pusa'.
4Ampo' ihsinna yato bohto mahoa' siteläng-teläng lambi' ahang ang untuhu'i to Yahudi anna aha untuhu'i yato derua rasul.
5Ya' sipahtuyu-tuyung sangngaka-sangngaka to Yahudi anna ang tadia to Yahudi sibaha pongkahana anna malai undahha yato rasul derua anna nasaleba'i batu.
6Ampo' tahpa nainsang yato to deruai lambi' le'ba' ungngalai kalaena pano di Bohto Listra anna Bohto Derbe anna ongeang senga' yaling di Likaonia.
7Ya' dia bunto inde naongei umpepainsangnging Bahtakara Dehata.
8Di hao di Listra aha mesa muane ang dai mio mellao mengkalao sohong. Inde tau supung si mohko' lolo.
9Ampo' umpehingngii toe' tula'na Paulus. Ya' naitang Paulus yato tau anna tahpa nainsang naoatee, indo tau aha kapampetahpa'anna lambi' la mala dipabono'.
10Dianto anna ma'karang Paulus napekäyyängngi naoatee, "Ke'de'o!" Ya' tahpa ke'de' siarang katibe-tibe anna kalao-lao lelengngi.
11Tahpana naita tau mai'di yato ang puha nababe Paulus, sika kohang ma'basa Likaonia naoatee, "Tuhung si'dang pole' dehata menghupatau tama di lino."
12Lambi' Barnabas disangai dehata Zeus anna Paulus disangaine' dehata Hermes aka' dia ang si ma'tula'.
13Pihsananna suleng di hao di baba bohto mahoa' sändona dehata Zeus di hao mai di pa'sambayanganna ang aha di aneang bohto, umbaha sangngaka-sangngaka saping laki nabelo-beloi la natunu, sibaha tau mai'di aka' pemala menomba pano yato di rasul.
14Ampo' tahpana nahingngi Paulus sibaha Barnabas pahtuyunna yato tau mai'di, ya' unseu'-seu'mi kaya'na tandana dai mahasa ke dipasinnoai dehata anna lumumpa'i tama di alla'-alla'na yato tau lella' mekoha naoatee,
15"Tehterere! Akarea' dio umbabe? Hupatau biasa touang kami'; sinnoa siamingkea'! Ampo' suleang inde la umpepainsangnging Kaheba Mapia tama di alla'-alla'mua' anna malakoa' dai umbabe lolo kaha-kaha takekuna. Ampo' la mengkolingkoa' dai' di Dehata ang tuho. Dianto ang umpadahi langi' sibaha lino anna le'bo' sibaha ingkänna ihsinna.
16Aka' dolu inang napabeba'ke' Puang Alataala hupatau pantang untuhu'i inahanna.
17Ampo' moinnakato noa, dasiang nakalimpängngi umpepaitaing umba noa kamatandeanna. Aka' tontong umbabe ma'kahupa-hupa kamapiaang sinnoanna: umpatuhung lolo kene' yaho mai di langi', umpakeboa manahpa pinamulammua' ke lambi'mi tempona, nabea lolokoa' andeang anna kamasannangang inaha."
18Ampo' moinnakato noa yato tula'na to deruai, sai'di' tala dai nabela ullaba'i yato tau mai'di la untunu penombaang di olona.
19Pihsananna di hao yato di Bohto Listra suleing sangngaka-sangngaka to Yahudi di hao mai di Bohto Antiokhia di Pisidia anna di hao mai di Bohto Ikonium unse'de' yato tau mai'di, lambi' sika natindo'. Lambi' sika unsisaleba'-leba'i batu ta Paulus, mane nahui'i tama di aneang bohto aka' nasanga mateng.
20Ya' suleng sika nalumba to mampetahpa'. Lella' nakapupu', ya' tahpa kalehang sumule Paulus anna le'ba'i tama di bohto mahoa'. Marondonna le'ba'mi pano di Derbe sibaha Barnabas.
21Tahpana di hao di Derbe umpepainsang buming Kaheba Mapia Paulus sibaha Barnabas lambi' mai'di tau mampetahpa'. Puhai, sumuleng pano di Listra mane panoi di Ikonium anna Antiokhia di Pisidia.
22Yaling yato di tallu bohto mahoa' sika umpamatoho bung inahanna ingkänna ang untindo' Puang Yesus anna napepahenta loloing naoatee, "La tontong lolokoa' mampetahpa' dai' di Puang Yesus. Aka' inang ahanaetee' la mai'di kamasuhsaang taolai ke pemalaingkea' tama di Kapahentaanna Puang Alataala."
23Anna pano di si mesa-mesa jumaa' Paulus sibaha Barnabas umpillei tau ang la mendahi pebulle ada'. Puhai sika ma'puasa anna ma'sambayang inde Paulus anna Barnabas, ya' sika nabehong yato ang puha napillei dai' di Puang Alataala ang sika napetahpa'.
24Mane umpatahhi' boi pellaoanna ungngolai Pisidia lambi' pano di Pamfilia.
25Puhai umpepainsangnging Bahtakara Dehata di hao di Perga, ya' le'ba'mi naung di Atalia.
26Di haonto yato naonge Paulus anna Barnabas mengkalao, mokahpala' uhai sumule sau di Antiokhia. Dianto yato bohto mahoa' ang sika naongei uhuna, naonge anna dibehoi dai' di mana' pa'kalemunna Puang Alataala anna malai umbabe kähängang ang dinoa napepuhaing.
27Lambi' sau di Antiokhia untambaing ingkänna to mampetahpa', mane sika natula' asangnging ingkänna yato kaha-kaha ang puha napadahi Puang Alataala ang sika nababe. Natula' toi umba noa nabuhkeiing lalang Puang Alataala lambi' yato ang tadia to Yahudi mala mampetahpa' dai' di Puang Yesus.
28Masaeke' tohho inde ta Paulus anna ta Barnabas sibaha ingkänna to mampetahpa' di hao.