Dual Panel1Ingkämmua' solasohongku, daa mai'dii di alla'mua' pemala mendahi tuangkuhu, aka' ungnginsammia' ungngoatee kami' ang mampakuhu la masuhsa puha durungangki' di hao di olona pampahehsaanna Puang Alataala ke dako'i!
2Aka' mai'di kaha-kaha taongei umbabe kasalaang. Ampo' menna-menna nabela lolo undakai lilana andana satula'-tula'nai, tau yatoo sundung kamapiaanna, aka' la nabelang ungkuasai kalaena.
3Hapanganna mesa ngangnga', moinnakato saohko', ke tapatamai di suana arahang mala umpahe' yato arahang, lambi' mala takuasai asang kalaena.
4Taala pohapangang toe' mesa kahpala', moi umba noa käyyänna ke nasaui pepahi käyyäng mala nakoling pebosena, moinnakato saohko', situhu' pa'elo'na tau ang mampalao.
5Noa tuntone' lila, mesa pangkahka' saohko' yaling di kalaeta, ampo' mala umpakende' kaha-kaha käyyäng. Taita toe' pano di api, moinnakato anna saohko'i ampo' mala toe' ungngämpu'i pangngala' malohäng.
6Lilana tau sihapang api, pembanuaanna kakarakeang ma'ongeang yaling di kalaeta anna paleleang pano di ingkänna aka ang aha yaling di kalaeta. Lila ma'nala-nala lolo noa api la ungngämpu'i lalang katuhoanta napapuhpu pengkähänganna setang.
7Ingkänna olo'-olo' mahaila ang uhpa' bihti'na, sedansiang, olo'-olo' meme' sibaha olo'-olo' yaling di le'bo' mala dipakanähäng anna ahang napakanähäng hupatau.
8Ampo' lila nei', dake' aha mesa tau la ungkuasaii lambi' mala napakanähäng. Lila punno kakarakeang, dai mala dipahe' anna mepatei noa ile balu pekeki'na.
9Lila tapake umpudi Dehata ang tapoambe, anna dia siang tapake untändo paranta hupatau ang natampa Puang Alataala sinnoa hupanna.
10Yaling mai di sua naongei lemba' pa'kuhhu'sumanga'ang anna petändo. Ingkämmua' solasohongku, dai sihatang tapake lilata tapanoa.
11Aka' la aharakae' mesa timbu naongei uhai mapia anna la dia siang naongei uhai karake?
12Ingkämmua' solasohongku, noa tunne' aharakae' poang ara la ungkeboaing boa zaitun, bahtu'raka poang angkoro' la ungkeboaing boa ara? Ya' datoete' la aha timbu uhai karake la umpasohong uhai mapia.
13Ke ahakoa' to keaka' anna to manähäng, pahallu umpatandaang kakeaka'aammu anna kamanähängammu yaling di katuhoammua' ungngolai kero mapia anna kamahempo'ang inaha ang lemba' di hao mai di kakeaka'ang.
14Ampo' ke ahai yaling di kalaemua' inaha pa'kasueheang sitonda ma'sihiate anna umpihki' supu kalaena, ya' daa umbaha kahsiia' yatoo anna ungngangka' kakeaka'ang aka' setonganna yato ang umbabea' dai situhu' katahpa'ang.
15Aka' yato ang unsanga kakeaka'ang dai sule yaho mai di Puang Alataala ampo' yaling mai di lino, di hao mai di nahsunna hupatau anna di hao mai di setang.
16Aka' umba naongei aha inaha pa'kasueheang anna umpihki' supu kalaena, di hao tunto nei' naonge kende' kasiba'diang anna ingkänna pembabe karake.
17Aka' kakeaka'ang ang sule yaho mai di Puang Alataala umpakende' inaha bahahsi, dai ungkärä'i kasiba'diang, marota' pano di solana, tuhu'-tuhu'ang, si ma'kalemu lolo, anna membabe mapia. Dai mampille-pillei anna umba noa yaling di inahanna, noanto napasohong.
18Anna pano di tau ang ungkärä'i kasikapiaiang, la ungngambo' banne kasikapiaiang anna la ungkeboaing kamarohoang.