Dual Panel1Kerna fasal playanan k-pada orang kudus itu, ta'usah sahya tulis sama kamu:
2kerna sahya tahu kamu punya niat hati, dan sahya mgahkan diri deri-hal kamu fasal itu di dpan orang Makadoniah, ia'itu yang Akhayah sudah bersdia satu tahun dhulu: dan kamu punya rajin sudah galakkan kbanyakan orang punya hati.
3Ttapi sahya sudah hantarkan sudara-sudara itu spaya jangan kita punya kmgahan deri-hal kamu mnjadi sia-sia dalam ini hal; spaya sperti sahya sudah bilang, kamu smoa boleh bersdia:
4spaya kalau orang Makadoniah datang sama-sama sahya dan jumpa kamu blum sdia, jangan kita ini kna malu dalam hal pngharapan itu, apa lagi kamu pula.
5Sbab itu sahya sudah fikir patut sahya minta itu sudara-sudara pergi k-pada kamu lbeh dhulu, mau aturkan dhulu itu kmurahan yang kamu sudah janjikan, spaya itu boleh mnjadi sdia sperti hal kmurahan, bukan sperti hal paksa.
6Ttapi ingat ini perkata'an, "Orang yang mnabur dngan jimat nanti mnuai pun dngan jimat; dan orang yang mnabur dngan kmurahan, nanti mnuai pun dngan kmurahan juga."
7Biar masing-masing orang buat sperti dia sudah berniat dalam hati; jangan dngan susah-hati, atau sbab kna paksa: kerna orang yang kasi dngan suka-hati dia-lah yang Allah kaseh.
8Dan Allah ada kuasa kasi smoa anugrah jadi banyak sama kamu; spaya smoa pkerja'an yang baik boleh jadi banyak dalam kamu, sdang kamu sndiri slalu ada sgala perkara yang berguna dngan s-chukop-nya:
9sperti ada tersurat, "Dia sudah taburkan sana-sini, dia sudah kasi sama orang miskin; Dia punya kbnaran tinggal sampai kkal."
10Dan Tuhan yang bkalkan bneh kerna orang yang mnabur, dan roti buat makanan, nanti bkalkan dan tambahkan kamu pun punya bneh, dan banyakkan kamu punya kbnaran punya buah-buahan;
11sdang kamu di-kayakan dalam sgala perkara, sampaikan mndatangkan s-pnoh-pnoh kmurahan, yang kluarkan shukor k-pada Allah oleh kita ini.
12Kerna fasal jalankan ini playanan, ia'itu bukan saja mau chukopkan orang-orang kudus punya kkurangkan, ttapi mnjadi banyak k-pada Allah oleh banyak-banyak shukor;
13sdang oleh kamu punya klakuan di-uji dngan ini playanan, dia-orang ada muliakan Allah sbab kamu stiawan, sperti kamu sudah mngaku injil Almaseh, dan sbab kmurahan kamu punya pmbrian k-pada diri-nya, dan k-pada smoa orang;
14dan dalam perminta'an-nya kerna kamu, dia-orang pun rindukan kamu deri sbab Allah punya anugrah yang bsar atas kamu.
15Shukor-lah k-pada Allah sbab pmbrian-nya yang ta'boleh terkatakan itu.