Dual Panel1Ttapi sudah terkluar pula nabi-nabi yang dusta di antara bangsa itu, sama sperti antara kamu nanti ada guru-guru yang dusta, dan ini orang smoa nanti bawa masok dngan smbunyi pngajaran ssat yang binasakan orang, dan dia-orang nanti sangkalkan sama Tuhan yang sudah tbuskan dia-orang skali pun, serta bawa kbinasa'an chpat-chpat atas diri-nya sndiri.
2Dan banyak orang nanti ikut dia punya perchabolan; dan orang nanti chakap jahat fasal jalan kbtulan deri sbab dia-orang.
3Dan sbab tma'a dia-orang nanti chari untong deri-pada kamu dngan perkata'an yang pura-pura: dan deri dhulu-kala t'ada lengah hukuman orang-orang ini, dan dia-orang punya kbinasa'an t'ada mngantok.
4Kerna jikalau Allah t'ada sayangkan mla'ikat-mla'ikat pun bila dia-orang sudah buat dosa, ttapi sudah buangkan masok dalam nraka, dan srahkan dalam lobang-lobang glap tersimpan sampai tempo hukuman;
5dan t'ada juga Allah sayangkan orang isi dunia dhulu kala, chuma Noh saja, yang khabarkan deri-hal kbnaran, dia sudah slamatkan dngan lain tujoh orang, ktika dia turunkan ayer-bah atas orang isi dunia yang t'ada kbaktian.
6Dan dia hukumkan negri Sadom sama negri Amurah dngan kbinasa'an, ia'itu dia hanguskan sampai jadi habu, dan dia buatkan satu larangan kerna orang-orang yang nanti bawa diri dngan t'ada kbaktian;
7dan dia lpaskan Lut orang yang bnar itu, yang rasa seksa sbab orang jahat itu punya klakuan chabol
8(kerna itu orang bnar, s-lagi dia tinggal sama-sama itu orang smoa, sbab dia tengok dan dngar, sudah seksakan jiwa-nya yang bnar s-hari-hari deri sbab perbuatan yang derhaka):
9dan Tuhan tahu lpaskan orang-orang yang ada kbaktian kluar deri pnchoba'an, dan simpankan orang-orang yang ta'bnar dalam kna seksa sampai hari hukuman;
10terlbeh skali orang yang bawa diri turut tabi'at dunia dalam k'inginan yang najis, dan ta'pdulikan prentah. Brani punya orang, kras-kpala, dia-orang t'ada takot umpatkan yang mulia-mulia:
11sdang mla'ikat-mla'ikat, sunggoh pun kuat-kuasa-nya lbeh bsar, t'ada bawa di dpan Allah satu d'awa'an yang umpatkan dia-orang.
12Ttapi ini smoa pula, sperti hidop-hidopan yang t'ada akal, di-beranakkan sperti binatang spaya kna buru dan kna binasa, ini smoa ada umpat-umpat dalam perkara-perkara yang dia ta'tahu, dan nanti kna binasa dalam kbinasa'an-nya sndiri,
13dan kna salah mnjadi upah kerna salah yang dia-orang buat; lazat siang-hari itu pun dia-orang fikir satu ksuka'an, dia-orang jadi chachat dan chla, bila dia-orang berlazat dalam perjamuan-kaseh-nya, tempo dia makan sama-sama kamu;
14dia-orang punya mata pnoh dngan zina, dan ta'boleh brenti dosa; dia-orang umpankan hati orang yang ta'tgoh; dia-orang punya hati sudah biasa dalam tma'a; smoa-nya anak-anak la'anat;
15yang tinggalkan jalan yang lurus dan jadi ssat, ikut jalan Bil'am anak Ba'ur, yang suka kjahatan punya upah;
16ttapi dia sudah kna kalot sbab dia sndiri punya ksalahan: ia'itu satu binatang yang ta'boleh chakap sudah chakap dngan suara manusia, dan sudah tahankan itu nabi punya gila.
17Ini orang smoa mata-ayer yang kring awan-awan yang kna tolak oleh ribot; dan kerna ini orang smoa glap-glita sudah tersimpan.
18Kerna dia pakai sia-sia punya perkata'an yang bsar-bsar, dan orang yang ada bharu lpas deri-pada orang-orang yang buat klakuan ssat, dia-orang umpankan dngan perchabolan-nya dalam tabi'at dunia punya k'inginan;
19dan janji mau kasi kbebasan k-pada ini orang, ttapi dia-orang sndiri mnjadi hamba-hamba kbinasa'an; kerna orang jadi hamba k-pada apa-apa yang kalahkan dia.
20Kerna jikalau orang sudah lpas deri dunia ini punya perkara-perkara yang najis, deri sbab tahu Tuhan dan Juru-slamat kita Isa Almaseh, dan kmdian lagi skali tersangkot dalam ini najis smoa, dan kna kalah pula, dia-orang punya hal pnghabisan jadi lbeh ta'baik deri-pada hal mula-mula.
21Kerna lbeh baik jikalau dia-orang blum tahu jalan kbnaran, deri-pada dia balek deri-pada hukum kudus itu yang sudah di-srahkan k-pada-nya, kmdian deri-pada dia-orang sudah tahu itu jalan.
22Jadi, sudah datang atas dia-orang sperti perumpama'an yang btul itu, "Anjing sudah pulang makan muntah," dan lagi, "Babi yang sudah mandi masok kubang lumpur."