Alkitab Mobile SABDA
[VER] : [BABA]     [PL]  [PB] 
 <<  Ibrani 11 >> 

1Perchaya ia'itu ktntuan fasal perkara-perkara yang di-harapkan, ktrangan fasal perkara-perkara yang t'ada nampak.

2Kerna dalam hal perchaya-lah ktua-ktua itu sudah di-saksikan.

3Oleh perchaya kita mngerti yang sklian alam sudah di-lngkapkan oleh perkata'an Allah, jadi smoa barang yang kita tengok ini bukan-nya sudah di-jadikan deri-pada apa-apa yang boleh nampak.

4Oleh perchaya, Habil sudah bawa k-pada Allah satu korban yang lbeh mulia deri-pada Kabil punya, dan sbab dia punya perchaya dia sudah di-saksikan yang dia ada bnar, Allah sndiri bersaksi deri-hal dia punya persmbahan: dan sbab dia punya perchaya, dia ada berchakap lagi, sunggoh pun dia sudah mati.

5Oleh perchaya, Hanok sudah di-pindahkan spaya jangan dia jumpa mati; dan orang t'ada dapat sama dia, sbab Allah sudah pindahkan sama dia: kerna s-blum dia di-pindahkan, dia sudah di-saksikan yang dia ada berknan k-pada Allah:

6dan kalau dngan t'ada perchaya, ta'boleh orang jadi berknan k-pada dia: kerna orang yang datang k-pada Allah msti perchaya ada Allah, dan yang Allah kasi pahala sama orang-orang yang chari sama dia.

7Oleh perchaya, Noh pula, bila Allah sudah psan sama dia deri-hal perkara-perkara yang blum nampak lagi, sbab takot Allah, dia sudah bikin satu bahtra mau slamatkan dia punya isi rumah; dan sbab dia punya perchaya dia sudah salahkan dunia ini, dan jadi waris kbnaran yang mnurut sperti perchaya.

8Oleh perchaya, Ibrahim pula, bila dia sudah di-panggil, sudah turut prentah, sampai dia kluar pergi tmpat yang dia nanti trima mnjadi dia punya psaka, dan dia sudah kluar dngan ta'tahu 'ntah di mana-kah dia ada pergi.

9Oleh perchaya, dia mnjadi orang mnumpang dalam tanah perjanjian, sperti di tanah orang, dan tinggal dalam khemah, sama-sama Isahak dan Yakob, yang mnjadi waris itu perjanjian juga sama-sama dia:

10kerna dia mnantikan negri yang ada alasan, yang Allah sudah bikin dan naikkan.

11Oleh perchaya, Sarah skali-pun sudah trima kuat mau mngandong, sunggoh pun dia sudah lalu umor-nya, sdang dia bilangkan dia yang sudah janji itu ada kperchaya'an:

12sbab itu, deri-pada satu orang, dan dia pun sperti mati, sudah terkluar orang yang sperti bintang di langit punya banyak, dan sperti pasir yang di tpi laut ta'boleh terhitong.

13Dalam perchaya-lah smoa ini sudah mati, dngan t'ada trima itu perjanjian smoa, ttapi sudah tengok dan sambot deri jauh, dan sudah mngaku diri-nya orang dagang dan orang yang mnumpang di atas bumi ini.

14Kerna orang yang kata bgitu kasi nyata yang negri sndiri-lah yang dia-orang ada chari.

15Dan kalau dia-orang sudah ingat negri asal-nya, ada juga smpat dia-orang boleh balek.

16Ttapi skarang dia-orang mau satu negri yang lbeh baik, ia'itu yang di shorga; sbab itu Allah t'ada malu sama dia-orang spaya di-sbotkan dia-orang punya Tuhan: kerna dia sudah sdiakan satu negri kerna dia-orang.

17Oleh perchaya, Ibrahim sudah persmbahkan Isahak, waktu dia kna choba: itu orang yang sudah sambot itu perjanjian smoa ada persmbahkan anak dlaki-nya yang tunggal;

18yang k-pada-nya sudah di-kata, "Dalam Isahak angkau punya bneh nanti di-sbotkan:"

19sbab dia punya bichara yang Allah ada kuasa bangkitkan orang deri antara orang mati skali pun: dan upama-nya deri situ juga dia sudah trima dia balek.

20Oleh perchaya, Isahak berkatkan Yakob dan Isu mski-pun deri-hal perkara-perkara yang mndatang.

21Oleh perchaya, bila Yakob mau mati, dia berkatkan dua-dua anak Yusof: dan smbahyang, bersandar di kpala tongkat-nya.

22Oleh perchaya, bila Yusof hampir mati, dia sbot fasal kluaran anak-anak Isra'el; dan sudah kasi psanan deri-hal dia punya tulang.

23Oleh perchaya, Musa punya mak-bapa sudah smbunyikan dia bila dia jadi, sampai tiga bulan punya lama, sbab dia-orang tengok yang dia satu anak yang chantek; dan dia-orang t'ada takot raja punya hukum.

24Oleh perchaya, Musa pun, bila dia sudah bsar, ta'mau di-namakan putri Fira'un punya anak:

25lbeh suka dia pileh kna aniaya sama-sama Allah punya bangsa, deri-pada dosa punya ksuka'an yang chuma sikit saja lama-nya;

26sbab dia punya bichara kchla'an Almaseh itu-lah kkaya'an yang lbeh bsar deri-pada sgala kkaya'an Masir: kerna dia pandang sama itu pahala.

27Oleh perchaya, dia sudah tinggalkan Masir, dngan t'ada takot raja punya marah; kerna dia tahan, sperti nampak dia yang orang ta'boleh nampak.

28Oleh perchaya, dia sudah buat Paska, dan adat rnjiskan darah, spaya yang binasakan anak-anak sulong itu jangan kna dia-orang.

29Oleh perchaya, dia-orang sudah sbrang laut Kulzum, sperti jalan darat: orang Masir choba buat bgini, dan sudah kna tngglam.

30Oleh perchaya, negri Yeriko punya tembok sudah ruboh, kmdian deri-pada orang sudah jalan kliling tujoh hari punya lama.

31Oleh perchaya, Rahab, prempuan sundal itu, t'ada binasa sama-sama orang-orang yang derhaka, sdang dia sudah sambot orang pngintai dngan sjahtra.

32Dan apa lagi yang sahya boleh katakan? kerna t'ada chukop waktu-nya mau chritakan fasal Gidion, dan Barak, dan Shimson, dan Yiftah; fasal Da'ud, dan Samu'el, dan itu nabi-nabi:

33oleh perchaya, dia-orang smoa sudah kalahkan bbrapa kraja'an, sudah buat kbnaran, sudah dapat perjanjian, sudah tutopkan mulut singa,

34sudah padamkan api punya kuasa, sudah lpaskan diri-nya deri-pada mata pdang, deri klmahan sudah di-jadikan kuat, sudah mnjadi gagah dalam prang, dan sudah pchahkan smoa bala-tntra orang bangsa yang lain-lain.

35Prempuan-prempuan sudah trima orang-orang-nya yang sudah mati itu balek dngan hidop-nya; ada pula yang kna sngsara, dan ta'mau trima tbusan-nya, spaya dia boleh dapat kbangkitan yang lbeh baik:

36ada orang lain yang kna choba dalam hal dia-orang kna olok-olok dan kna ssah, dan kna pasong dan masok jel:

37dia-orang kna hntam batu, dia-orang kna blah dngan gergaji, dia-orang kna choba, dia-orang kna bunoh dngan pdang, dia-orang berjalan sana-sini dngan pakai kulit domba dan kulit kambing: kna terkurang, kna susah, kna orang aniayakan

38(ini dunia t'ada layak sama itu orang smoa), dia-orang terhanyut di tanah-tanah sunyi, dan di gunong-gunong, dan di goa-goa, dan di lobang-lobang tanah.

39Dan ini smoa sunggoh pun sudah di-saksikan deri sbab dia-orang punya perchaya, t'ada juga dia-orang trima itu perjanjian,

40sdang Allah sudah sdiakan satu perkara yang lbeh baik kerna kita, spaya kalau t'ada dngan kita itu orang smoa jangan di-smpurnakan.


  Share Facebook  |  Share Twitter

 <<  Ibrani 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel