Dual Panel1Kerna tiap-tiap kpala-imam yang di-pileh deri antara manusia, sudah di-tntukan kerna manusia dalam perkara-perkara Allah, spaya dia boleh bawa persmbahan dan korban kerna orang punya dosa:
2dan dia boleh sabarkan orang-orang yang bodoh dan ssat sdang dia pun kna klmahan;
3dan deri sbab ini klmahan dia msti bawa persmbahan kerna dosa-dosa, bukan saja kerna orang bangsa itu, ttapi kerna diri-nya sndiri.
4Dan t'ada satu orang ambil itu hormat kerna diri-nya sndiri, ttapi chuma bila Allah panggil sama dia, sperti Harun punya hal.
5Dan bgitu juga Almaseh pun t'ada muliakan diri-nya spaya boleh di-jadikan kpala-imam, ttapi dia itu yang sudah kata sama dia, "Angkau-lah Anak sahya, Ini hari sahya sudah beranakkan angkau:"
6sperti dia ada kata di lain tmpat, "Angkau-lah imam sampai s-lama-lama-nya, Sperti aturan Malki-Sadak."
7Dan waktu dia ada badan manusia, bila dia sudah mnghadapkan do'a dan perminta'an dngan triak yang kuat-kuat dan dngan ayer-mata k-pada dia yang ada kuasa slamatkan dia deri kmatian, dan sudah di-dngarkan deri sbab dia takot Allah,
8sunggoh pun dia satu Anak, dia sudah blajar turut-prentah deri perkara-perkara yang dia mrasa;
9dan bila dia sudah di-smpurnakan, dia mnjadi pohon-slamat yang kkal k-pada smoa orang yang turut dia punya prentah;
10dan Allah sbotkan dia kpala-imam sperti aturan Malki-Sadak.
11Fasal dia, ada banyak juga perkara yang kita mau katakan, dan susah pula mau artikan, sdang kamu punya pnngaran sudah jadi brat.
12Kerna waktu kamu patut sudah jadi guru deri sbab sudah lama tempo-nya, ttapi orang msti ajarkan pula sama kamu perkara-perkara yang asal-usul deri permula'an smoa perkata'an Allah; dan kamu sudah jadi orang yang msti makan susu, bukan makanan yang kras.
13Kerna tiap-tiap orang yang makan susu t'ada biasa sama pngajaran yang deri-hal kbnaran; sbab dia anak kchil.
14Ttapi makanan yang kras itu kerna orang yang sudah chukop umor, orang-orang yang sbab adat-nya bgitu sudah biasakan akal-nya mau bedakan antara baik dngan jahat.