Dual Panel1Dan lima hari kmdian, imam-bsar Hananiah turun dngan brapa orang tua-tua, sama satu loyar bernama Tertullus; dan dia-orang trangkan Paulus punya fasal sama tuan gobernor.
2Dan bila orang sudah panggil Paulus, Tertullus mula'i d'awa dia, serta kata bgini: "Ya tuan Felek yang sangat mulia, oleh tuan-lah kita dapat banyak sjahtra, dan oleh tuan punya budi-bichara smoa perkara bangsa ini sudah di-btulkan.
3Smoa ini kita trima dngan s-gnap shukor, baik bila-bila pun, dan baik di mana-mana pun.
4Ttapi spaya jangan sahya kasi tuan lagi pnat, deri-pada tuan punya murah-hati sahya minta tuan dngar-lah sikit perkata'an deri-pada kita.
5Kerna kita sudah dapat tahu dia ini satu orang chlaka, dan orang yang buat gadoh antara sgala orang Yahudi dalam sluroh dunia, dan kpala dalam kampongan orang Nasarat:
6lagi pun dia sudah choba najiskan ka'abah: ttapi kita sudah tangkap sama dia:
7[KOSONG]
8bila tuan sndiri sudah preksa, tuan nanti dapat tahu deri dia smoa ini perkara yang kita ada d'awa sama dia."
9Dan orang Yahudi pun masok sblah dia, serta kata ini perkara smoa btul ada s-bgitu.
10Dan bila tuan gobernor sudah kasi dia tanda suroh chakap, Paulus jawab bgini: "Sbab sahya tahu yang banyak tahun punya lama tuan sudah jadi hakim atas ini bangsa, bharu sahya suka mngadukan sahya punya hal:
11kerna tuan juga boleh tahu yang t'ada lbeh deri-pada dua-blas hari sahya sudah pergi smbahyang di Yerusalim:
12dan di dalam ka'abah itu t'ada orang jumpa sahya bertngkar sama satu orang pun, atau usutkan orang-banyak, dan di dalam rumah smbahyang pun t'ada, dan di mana-mana tmpat dalam negri pun t'ada juga.
13Dan t'ada dia-orang boleh nyatakan k-pada tuan itu perkara smoa yang dia-orang d'awa sama sahya.
14Dan ini sahya mngaku sama tuan, ia'itu yang sperti itu Jalan yang orang namakan satu kampongan, bgitu-lah sahya smbah Allah nenek-moyang sahya, dan perchaya sgala perkara yang sperti hukum-taurit, dan yang ada tersurat dalam kitab nabi-nabi:
15dan sahya taroh harap dalam Allah, sperti orang-orang ini sndiri ada nantikan, ia'itu smoa orang yang bnar dan orang yang t'ada bnar pun nanti bangkit.
16Dan dalam ini hal, sahya pun usahakan diri sahya spaya slalu sahya punya angan-angan hati t'ada salah, baik k-pada Allah, baik k-pada manusia.
17Sudah brapa tahun kmdian, sahya datang bawa sdkah dan persmbahan k-pada sahya punya bangsa:
18itu ktika, bila sahya sudah di-suchikan, ada orang jumpa sama sahya di dalam ka'abah, bukan-nya dngan satu perhimponan atau dngan gadoh.
19Ttapi ada orang-orang Yahudi deri Asiah, yang patut mnghadap tuan di sini dan mnd'awa, kalau dia-orang ada apa-apa atas sahya.
20Kalau t'ada, biar ini orang sndiri kata apa ksalahan dia-orang sudah dapat bila sahya berdiri dpan majlis bichara itu,
21chuma fasal ini satu suara saja, yang sahya sudah bertriak waktu sahya berdiri di tngah-tngah dia-orang, ia'itu, 'Deri-hal kbangkitan orang mati-lah sahya ini kna d'awa dpan kamu ini hari.'"
22Ttapi Felek, mski pun dia tahu chukop trang deri-hal itu Jalan, dia kasi tanggoh lagi, serta kata, "Bila panglima Lusias turun, sahya nanti slsaikan kamu punya perkara."
23Dan dia suroh itu hulubalang jaga sama Paulus, dan kasi dia bebas, jangan larangkan dia punya sohbat-sohbat mlayankan dia.
24Ttapi ada brapa hari kmdian, Felek datang dngan bini-nya Drusilla, satu prempuan Yahudi, dan suroh panggil Paulus, dan dia dngar dia deri-hal iman dalam Isa Almaseh.
25Dan waktu Paulus berchakap-chakap deri-hal kbnaran, dan mnahan diri, dan hukuman yang mndatang, Felek naik ktakotan, dan jawab, "Ini kali angkau boleh pergi, bila sahya ada snang sahya nanti panggil."
26Dalam ini smoa Felek sudah harap yang dia nanti dapat wang deri-pada Paulus: itu sbab krap kali dia panggil-panggil dan berchakap sama Paulus.
27Ttapi bila sudah gnap dua tahun, Porkius Festus pula gantikan Felek; dan sbab dia mau chari pahala sama orang Yahudi, Felek tinggalkan Paulus dalam jel.