Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 26 >> 

1Dan raja Agrippa kata sama Paulus, "Angkau ada izin boleh berchakap kerna angkau sndiri." Habis itu, Paulus angkat tangan-nya, dan kasi jawab bgini:

2"Sahya rasa diri sahya beruntong, ya raja Agrippa, yang dpan tuan sahya boleh dapat kasi jawab ini hari, fasal sgala perkara yang orang Yahudi sudah d'awa atas sahya:

3terlbeh skali sbab tuan sudah paham dalam sgala adat-adat dan perbantahan yang ada di antara orang Yahudi: sbab itu sahya minta tuan tolong dngar sahya dngan sabar-hati tuan.

4Deri-hal sahya punya hidopan deri muda, ia'itu mula-mula di antara orang bangsa sahya sndiri, dan di Yerusalim, sgala orang Yahudi sudah tahu:

5kerna deri dhulu smoa-nya sudah knal sama sahya, kalau dia-orang mau bersaksi, bagimana sahya sudah ikut kita punya agama punya kampongan yang kras skali, kerna sahya orang Farisi.

6Dan skarang sahya ada berdiri di sini mau kna bichara sbab harap dalam perjanjian yang Allah sudah janji sama kita punya nenek-moyang,

7dan kita punya dua-blas suku-bangsa siang malam ada smbah Allah dngan rajin, serta dngan harap nanti dapat ini perjanjian. Dan deri sbab ini punya harap, ya tuan-ku, orang Yahudi ada d'awa sama sahya.

8Kalau Allah bangkitkan orang mati, knapa tuan-tuan fikir itu satu perkara yang orang ta'boleh perchaya?

9Sahya sndiri sudah fikir juga yang sahya patut buat banyak perkara mlawan nama Isa orang Nasarat itu.

10Dan ini pula sahya sudah buat di Yerusalim: dan bila sahya sudah dapat kuasa deri-pada kpala-kpala imam, banyak orang suchi sahya sudah tutopkan dalam jel, dan ktika dia-orang kna bunoh sahya pun berknan.

11Dan krap kali di dalam smoa rumah smbahyang sahya seksakan dia-orang, dngan maksud mau paksakan dia-orang mnghujat; dan sbab sangat gila, sahya sudah aniayakan dia-orang sampai lain-lain negri pun.

12Dalam ini hal, ktika sahya ada berjalan pergi Damsek, dngan kuasa dan prentah kpala-kpala imam,

13ada tngah hari bgitu, sambil berjalan sahya sudah tengok, ya raja, satu trang deri langit, yang lbeh chahya-nya deri-pada matahari, berchahya-chahya kliling sahya dan orang yang berjalan sama-sama.

14Dan bila kita smoa sudah jatoh di tanah, sahya dngar satu suara yang kata sama sahya dngan bhasa Ibrani, 'Sa'ul, Sa'ul, knapa angkau aniayakan sahya. Susah juga angkau mau tndang sama barang yang tajam.'

15Dan sahya kata, 'Siapa-kah tuan ini?' Dan Tuhan kata, 'Sahya-lah Isa yang angkau aniayakan.

16Ttapi bangun, dan berdiri: kerna ini-lah sbab sahya sudah nyatakan diri sahya sama angkau, ia'itu mau tntukan angkau buat sahya punya kerja, dan jadi saksi deri-hal sgala perkara yang angkau sudah tengok, dan yang dalam-nya sahya nanti nyatakan diri sahya k-pada angkau,

17serta lpaskan angkau deri-pada ini bangsa, dan deri-pada orang bangsa-asing, yang k-pada-nya sahya skarang hantarkan angkau,

18spaya chlekkan dia-orang punya mata, dan balekkan dia-orang deri-pada glap k-pada trang, dan deri-pada kuasa Setan k-pada Allah, spaya dia-orang boleh trima ampun dosa dan satu psaka antara orang-orang yang sudah di-suchikan sbab perchaya sama sahya.'

19Sbab itu, ya raja Agrippa, sahya t'ada derhaka sama itu pnglihatan yang deri shorga:

20ttapi sahya khabarkan mula-mula k-pada orang dalam Damsek, dan di Yerusalim, dan sluroh tanah Yahudiah, dan k-pada orang bangsa-asing pun, yang dia-orang baik bertobat dan balek k-pada Allah, dan buat klakuan yang padan dngan dia-orang punya tobat.

21Sbab ini-lah orang Yahudi tangkap sama sahya di dalam ka'abah, dan choba bunoh sama sahya.

22Sbab itu, sdang sahya sudah dapat pertolongan yang deri-pada Allah, sampai ini hari sahya boleh berdiri, bersaksi baik k-pada orang kchil baik k-pada orang bsar, dngan t'ada katakan apa-apa chuma yang nabi-nabi dan Musa pun sudah kata nanti jadi;

23ia'itu bagimana Almaseh itu msti kna sngsara, dan sbab berbangkit deri antara orang mati, dia nanti mula-mula khabarkan trang k-pada bangsa kita, dan k-pada bangsa-asing pun."

24Waktu Paulus ada kasi jawab bgini, Festus kata dngan suara bsar, "Hei Paulus, angkau gila: angkau punya banyak-banyak plajaran sudah buat angkau gila."

25Ttapi Paulus kata, "Sahya bukan-nya gila, ya Festus yang sangat mulia, ttapi sahya katakan perkata'an yang bnar dan bijaksana.

26Kerna raja ini pun tahu deri-hal ini smoa, dan k-pada raja-lah sahya ada berchakap dngan bebas: sbab sahya perchaya t'ada satu pun deri-pada ini perkara smoa yang tersmbunyi deri-pada raja; kerna perkara itu bukan sudah jadi dalam chrok.

27Hei raja Agrippa, ada-kah tuan-ku perchaya nabi-nabi itu? sahya tahu tuan-ku perchaya."

28Dan Agrippa kata sama Paulus, "Dngan sikit pujok saja angkau mau jadikan sahya orang Kristen."

29Dan Paulus kata, "Baik dngan sikit atau banyak, sahya minta do'a sama Allah yang bukan saja tuan-ku, ttapi smoa yang ada dngar sama sahya ini hari boleh jadi sama sperti sahya ini, chuma ini pasong saja jangan."

30Itu raja bangun, dan gobernor pun, dan Bernike, dan smoa orang yang dudok sama-sama:

31dan bila dia-orang sudah undur, dia-orang berchakap satu sama lain, dan kata, "Ini orang t'ada buat apa-apa yang patut dia kna mati atau kna pasong."

32Dan Agrippa kata sama Festus, "Kalau dia ini t'ada minta mngadu sama Kaisar, sudah pun dia boleh di-lpaskan."


  Share Facebook  |  Share Twitter

 <<  Kisah Para Rasul 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran