Dual Panel1Dan ktika rasul-rasul berchakap sama orang bangsa itu, imam-imam, dan pnghulu ka'abah, dan orang Saduki datang pada dia-orang,
2dngan banyak sakit-hati sbab dia-orang ajar orang bangsa itu, dan sbab dalam hal Isa dia-orang khabarkan kbangkitan deri antara orang mati.
3Dan dia-orang tangkap rasul-rasul itu, dan kasi dia-orang masok jel sampai besok: kerna sudah malam.
4Ttapi banyak orang juga perchaya yang sudah dngar pngajaran itu; dan bilangan orang dlaki jadi lbeh kurang lima-ribu.
5Besok-nya, dia-orang punya pnghulu-pnghulu, dan orang tua-tua, dan orang pnulis sudah berhimpon di Yerusalim;
6dan imam-bsar Hanna pun ada, dan Kayafa, dan Yahya, dan Iskandar, dan smoa daging-darah imam-bsar.
7Dan dia-orang kasi rasul-rasul itu berdiri di tngah-tngah, serta tanya, "Dngan kuasa yang mana, dan dalam nama yang mana, kamu sudah buat ini perkara?"
8Habis itu, Petrus pnoh-lah dngan Roh Alkudus dan kata sama dia-orang,
9"Hei pnghulu-pnghulu bangsa ini, dan orang tua-tua, jikalau ini hari kita kna bichara deri-hal satu perbuatan yang baik pada satu orang yang sakit, ia'itu bagimana ini orang sudah di-smbohkan,
10biar-lah kamu smoa tahu, dan smoa bangsa Isra'el pun, yang dalam nama Isa Almaseh orang Nasarat, yang kamu sudah salibkan, ttapi yang Allah sudah bangkitkan deri antara orang mati, ya, dalam Dia-lah ini orang berdiri di sini di hadapan kamu dngan baik.
11Dia-lah batu yang kamu tukang-tukang ini sudah tolakkan, dan yang sudah mnjadi batu kpala pnjuru.
12Dan dalam yang lain t'ada-lah ada slamat, kerna t'ada-lah lain nama apa pun di bawah langit yang sudah di-kasi antara manusia yang dalam-nya kita msti dapat slamat."
13Bila dia-orang tengok Petrus dan Yahya punya brani-hati, dan sudah perhatikan yang dia-orang bukan-nya orang plajaran dan bukan orang pandai, dia-orang mnjadi hairan: dan knal sama dia-orang, yang dia-orang sudah ada bserta dngan Isa.
14Dan sbab dia-orang tengok orang yang sudah di-smbohkan itu berdiri sama-sama, dia-orang ta'boleh kata apa-apa.
15Bila dia-orang sudah suroh rasul-rasul itu kluar deri tmpat bichara, dia-orang bichara sama sndiri,
16kata-nya, "Apa kita msti buat sama ini orang? kerna sudah nyata sama smoa orang yang tinggal di Yerusalim yang dia-orang sudah buat satu tanda yang mashhur, dan kita t'ada boleh sangkalkan itu.
17Ttapi spaya jangan ini hal mingkin lama mingkin lbeh mashhur antara orang bangsa ini, biar kita gertakkan dia-orang, spaya deri ini waktu dia-orang jangan berchakap lagi sama satu orang pun dalam ini nama."
18Dan dia-orang panggil rasul-rasul, dan psan dia-orang jangan skali-kali berchakap atau ajar dalam nama Isa.
19Ttapi Petrus dan Yahya jawab, "Patut-kah di hadapan Allah kita dngar kamu lbeh deri-pada Allah? biar-lah kamu timbang:
20kerna ta'boleh tidak kita chakapkan perkara-perkara yang kita sudah tengok dan dngar."
21Dan bila dia-orang sudah lagi gertakkan rasul-rasul itu, dia-orang lpaskan dia, kerna t'ada dapat satu jalan bagimana dia-orang boleh seksakan dia, sbab orang bangsa itu; kerna smoa orang muliakan Allah deri-hal perkara yang sudah jadi.
22Kerna itu orang yang sudah kna ini tanda k-smbohan, umor dia sudah ampat-puloh lbeh.
23Dan bila sudah lpas, dia-orang pergi pada dia-orang punya kawan-kawan, dan khabarkan smoa yang kpala-kpala imam dan orang tua-tua sudah kata sama dia-orang.
24Dan bila dia-orang dngar itu, dngan satu hati dia-orang angkat suara pada Allah, serta kata, "Ya Tuhan, Tuhan yang mnjadikan langit dan bumi dan lautan dngan smoa yang ada dalam-nya:
25yang sudah kata oleh Roh Alkudus dngan mulut nenek-moyang kita Da'ud, ia'itu hamba Tuhan, bgini, 'Knapa-kah bangsa-asing itu gmpar, Dan sgala bangsa ingat perkara yang sia-sia?
26Raja-raja dunia ini bersiap, Dan pnghulu-pnghulu berhimpon sama-sama, Mau mlawan Tuhan dan mlawan Almaseh-nya:'
27btul-lah dalam ini negri juga spaya mlawan Isa, Tuhan punya Hamba yang kudus, yang Tuhan sudah minyaki itu, Herodis dan Pontius Pilatus dngan orang bangsa-asing dan orang bangsa Isra'el pun sudah berhimpon,
28mau buat sama dia barang-apa yang Tuhan punya tangan dan bichara sudah tntukan msti jadi.
29Skarang, ya Tuhan, tengok-lah dia-orang punya gertak: dan bri-lah hamba-hamba Tuhan khabarkan perkata'an Tuhan dngan sangat brani-hati,
30sambil Tuhan hulorkan Tuhan punya tangan mau smbohkan orang; dan spaya tanda-tanda dan perkara yang hairan boleh di-buat oleh nama Isa, Tuhan punya Hamba yang kudus itu."
31Bila dia-orang sudah minta do'a, itu tmpat di mana dia-orang berhimpon sudah tergonchang; dan smoa-nya pnoh-lah dngan Roh Alkudus, dan dia-orang katakan perkata'an Allah dngan brani-hati.
32Sgala orang yang sudah perchaya smoa-nya satu hati dan satu jiwa: dan t'ada satu orang pun yang kata herta-nya dia sndiri punya; ttapi apa-apa yang ada pada-nya jadi perskutuan punya.
33Dan dngan kuasa yang bsar rasul-rasul itu bersaksi deri-hal kbangkitan Tuhan Isa: dan anugrah yang bsar ada atas smoa-nya.
34Antara-nya satu orang pun t'ada yang kurang apa-apa: kerna smoa yang ada tanah atau rumah jualkan itu, dan bawa herga barang-apa yang sudah jual,
35dan ltakkan di kaki rasul-rasul: dan orang bhagikan pada tiap-tiap orang, s-bagimana kkurangan masing-masing.
36Dan Yusof, yang rasul-rasul itu glarkan Bar-nabas (ia'itu, kalau tersalin arti-nya anak pnghiburan), orang Liwi, peranakan Pulau Kuprus,
37dia ada s-kping tanah yang dia jualkan, dan bawa wang-nya dan ltakkan di rasul-rasul punya kaki.