Dual Panel1Orang Farisi sama orang Saduki datang mau choba sama Isa, dan minta dia tunjokkan sama dia-orang satu tanda deri langit.
2Isa jawab kata sama dia-orang, "Bila ptang kamu kata, 'Chuacha baik, kerna langit ada merah.'
3Dan bila pagi pula kamu kata, 'Ini hari mau ribot, kerna langit ada merah dan rdop.' Kamu tahu bagimana mau bedakan langit punya rupa, ttapi tanda-tanda jman ini kamu ta'boleh.
4Orang jman yang jahat dan yang berzina ada chari tanda; ttapi t'ada satu tanda nanti di-brikan k-pada jman ini, chuma tanda nabi Yunus." Kmdian dia tinggalkan dia-orang, dan berjalan pergi.
5Bila murid-murid sampai sbrang, dia-orang sudah lupa bawa roti.
6Isa kata sama dia-orang, "Ingat baik-baik, jauhkan diri kamu deri orang Farisi sama orang Saduki punya ragi."
7Dan dia-orang berrondeng satu sama lain, kata, "Kita t'ada bawa roti."
8Isa tahu ini, dan kata, "Hei kamu yang kurang perchaya, knapa kamu berrondeng satu sama lain sbab kamu t'ada roti?
9Blum-kah kamu mngerti, dan t'ada-kah kamu ingat pun, fasal lima biji roti kerna lima-ribu orang itu, dan brapa banyak bakul kamu sudah pungut?
10Atau fasal tujoh biji roti kerna ampat-ribu orang itu, dan brapa kranjang kamu sudah pungut?
11Bagimana pula kamu t'ada mngerti yang sahya chakap sama kamu bukan fasal roti? Ttapi jauhkan diri kamu deri orang Farisi sama orang Saduki punya ragi."
12Kmdian bharu-lah dia-orang mngerti yang Isa sudah suroh dia-orang jauhkan diri-nya buka deri roti punya ragi, ttapi deri pngajaran orang Farisi sama orang Saduki.
13Bila Isa sudah sampai jajahan Kaisariah-Filipi, dia tanya sama murid-murid-nya, "Orang katakan Anak-manusia ini jadi siapa-kah?"
14Dia-orang jawab, "Ada yang kata Yahya Pmbaptis; ada lain orang kata Ilia; dan ada lain orang pula kata Armia, atau satu deri antara nabi-nabi."
15Isa kata sama dia-orang, "Ttapi kamu pula kata sahya ini siapa?"
16Dan Simon Petrus jawab kata, "Tuhan-lah Almaseh, Anak Allah yang hidop."
17Isa jawab kata sama dia, "Berkat-lah angkau, hei Simon anak Yunus; kerna bukan-nya manusia yang nyatakan ini k-pada angkau; ttapi Bapa sahya yang di shorga.
18Dan sahya juga kata sama angkau, yang angkau ini Petrus, dan atas ini batu-karang sahya nanti naikkan sahya punya eklisia; dan pintu alam maut pun t'ada nanti mnang sama itu.
19Sahya nanti kasi sama angkau anak-anak kunchi kraja'an shorga; dan apa-apa yang angkau ikatkan di atas bumi nanti terikat di dalam shorga; dan apa-apa yang angkau lpaskan di atas bumi nanti terlpas di dalam shorga."
20Habis itu, Isa psan murid-murid-nya jangan dia-orang kata sama satu orang pun yang dia-lah Almaseh.
21Mula'i deri-pada itu tempo, Isa trangkan sama murid-murid-nya bagimana dia msti pergi Yerusalim, dan tanggong banyak sngsara deri-pada ktua-ktua, dan deri-pada kpala-kpala imam, dan deri-pada orang pnulis, dan msti kna bunoh, dan kmdian di-bangkitkan pula hari yang ktiga.
22Jadi Petrus bawa Isa sama dia, dan mula'i tgurkan dia kata, "Ksian-lah sama Tuhan; ini skali-kali ta'nanti jadi sama Tuhan."
23Ttapi Isa berbalek, dan kata sama Petrus, "Pergi blakang sahya, hei Setan; angkau mnjadi satu batu-terantok k-pada sahya; kerna angkau ingat bukan Allah punya fasal, ttapi manusia punya fasal."
24Kmdian Isa kata sama murid-murid-nya, "Jikalau satu orang mau datang ikut sama sahya, biar-lah dia sangkalkan diri-nya, dan pikul salib-nya, dan ikut sama sahya.
25Kerna barang-siapa mau slamatkan nyawa-nya, dia nanti hilang itu nyawa; dan barang-siapa nanti hilang nyawa-nya kerna sahya punya sbab, dia nanti dapat nyawa-nya.
26Kerna apa-kah untong sama satu orang, jikalau dia dapat satu dunia ini jadi dia punya, ttapi rugi nyawa-nya? atau apa-kah orang boleh kasi mau gantikan dia punya nyawa?
27Kerna Anak-manusia nanti datang dngan Bapa-nya punya kmulia'an, sama-sama mla'ikat-nya skali; dan itu waktu dia nanti balas sama tiap-tiap orang sperti orang itu punya perbuatan.
28Dngan sunggoh sahya bilang sama kamu, antara orang yang berdiri di sini ada orang yang t'ada skali-kali nanti mrasa mati s-blum dia orang tengok Anak-manusia datang dalam kraja'an-nya."