Dual Panel1Dan lagi skali dia mula'i mngajar orang di tpi tasek. Dan terlalu banyak orang berhimpon datang sama dia, sbab itu dia naik satu prahu, dan dudok di tasek, dan sgala orang-banyak ada di darat di tpi tasek.
2Dan dia ajar dia-orang banyak perkara dngan perumpama'an, dan dalam dia punya pngajaran dia kata sama dia-orang,
3"Dngar-lah: ada satu orang pnabur kluar mau mnabur bneh;
4dan dalam dia mnabur, ada sparoh bneh pula jatoh di tpi jalan, dan burong-burong datang makan sampai habis.
5Dan sparoh pula jatoh di tmpat yang berbatu, di situ t'ada banyak tanah; dan itu juga itu bneh bertumboh, sbab tanah-nya t'ada dalam:
6ttapi bila matahari sudah kluar, dia jadi kring; dan sbab t'ada akar, dia layu.
7Dan sparoh jatoh di tngah-tngah pokok duri, dan pokok itu bertumboh, dan lmaskan itu bneh, jadi dia t'ada kluarkan buah.
8Dan sparoh jatoh di tanah yang baik, dan kluarkan buah, yang bertumboh-tumboh dan bertambah-tambah, dan berbuah berganda-ganda ada yang tiga-puloh, ada yang anam-puloh, dan ada yang s-ratus ganda."
9Dan dia kata pula, "Siapa ada kuping mau dngar, biar-lah dia dngar."
10Dan bila Isa ada s'orang-s'orang saja, orang yang bserta dngan dia sama dua-blas murid-murid pun tanya dia itu perumpama'an.
11Dan dia kata sama dia-orang, "K-pada kamu sudah di-brikan kraja'an shorga punya ruhsia: ttapi k-pada orang yang di luar sgala perkara jadi dngan perumpama'an:
12spaya dia-orang tengok punya tengok, ttapi t'ada juga nampak; dan dngar punya dngar, ttapi t'ada juga mngerti; spaya jangan dia-orang bertobat, atau dapat ampunan.
13Dan Isa kata sama dia-orang, "T'ada-kah kamu tahu ini perumpama'an? bagimana pula kamu nanti tahu sklian perumpama'an?
14Itu orang pnabur mnabur perkata'an itu.
15Dan ini-lah yang di tpi jalan, di mana perkata'an itu sudah di-taburkan: bila dia-orang sudah dngar, itu juga Setan datang ambil itu perkata'an yang sudah di-taburkan dalam-nya.
16Dan bgitu juga ini-lah yang di-tabur di tmpat-tmpat yang berbatu, yang bila dia dngar itu perkata'an, itu juga dia-orang trima dia dngan ksuka'an;
17ttapi dalam diri-nya dia-orang t'ada akar, dan tahan chuma sikit tempo saja; kmdian bila ksusahan datang, atau aniaya deri sbab perkata'an itu, itu juga dia terantok.
18Dan ada lain pula yang sudah di-taburkan di tngah-tngah pokok duri; ini-lah orang yang sudah dngar itu perkata'an,
19ttapi ini dunia punya khuatir pula masok, sama kkaya'an punya tipu, dan inginan atas perkara-perkara yang lain, ini smoa lmaskan itu perkata'an, dan dia mnjadi ta'berbuah.
20Dan ini-lah pula yang sudah di-taburkan di tanah yang baik; ia'itu yang dngar perkata'an itu, dan trima dia, dan berbuah berganda-ganda, ada yang tiga-puloh, ada yang anam-puloh, ada yang s-ratus kali ganda."
21Dan Isa kata sama dia-orang, "Ada-kah orang bawa plita spaya boleh taroh di bawah satu gantang, atau di bawah ranjang? bukan-kah spaya taroh atas kaki-plita?
22Kerna satu pun t'ada tersmbunyi, ttapi spaya di-nyatakan; dan t'ada satu pun dalam ruhsia, ttapi spaya boleh jadi trang.
23Jikalau orang ada kuping mau dngar, biar-lah dia dngar."
24Dan lagi pula dia kata sama dia-orang, "Jaga baik-baik apa yang kamu dngar: kerna dngan sukatan yang kamu sukat itu, orang pula nanti sukatkan sama kamu: dan lbeh lagi nanti di-bri k-pada kamu.
25Kerna orang yang ada apa-apa, k-pada dia nanti di-brikan, ttapi orang yang t'ada apa-apa, barang yang dia ada pun nanti kna ambil."
26Dan dia kata, "Bgini-lah kraja'an Allah, sperti satu orang yang mnabur bneh di tanah;
27dan dia tidor dan bangun siang malam, dan bneh itu pun naik dan bertumboh, dia ta'tahu apa macham itu punya hal.
28Itu bumi kluarkan buah deri-pada diri-nya sndiri; mula-mula daun, kmdian ari, dan kmdian skali trigu yang smpurna dalam ari.
29Ttapi bila buah-nya sudah masak, itu juga dia kluarkan sabit-nya, sbab musim mnuai sudah sampai."
30Dan dia kata, "Bagimana-kah kita boleh samakan kraja'an Allah? atau dngan apa perumpama'an kita boleh nyatakan dia?
31Ia'itu sperti s-biji bneh ssawi, bila di-taburkan di tanah, dia satu bneh yang kchil skali di atas bumi ini.
32Ttapi bila sudah tabur, dia bertumboh dan mnjadi lbeh bsar deri-pada sgala sayur, dan kluarkan dahan-dahan yang bsar; sampaikan burong-burong di udara pun boleh bertdoh di bawah nawong-nya."
33Dan dngan banyak perumpama'an yang bgini punya dia chakapkan itu perkata'an, s-kdar dia-orang boleh dngar:
34dan kalau dngan t'ada perumpama'an dia t'ada chakap sama dia-orang: ttapi bila sndiri saja, dia trangkan smoa perkara sama dia punya murid-murid sndiri.
35Dan itu hari, bila sudah sampai ptang, Isa kata sama dia-orang, "Mari kita pergi sbrang."
36Dan dia-orang tinggalkan orang-banyak, dan bawa dia sama-sama dia-orang s-bagimana dia ada dalam prahu, dan ada lain-lain prahu sama-sama dia.
37Dan satu angin ribot yang bsar turun, dan ombak pun tmpoh-mnmpoh masok dalam prahu, sampaikan itu prahu hampir pnoh ayer.
38Dan Isa sndiri ada di sblah blakang prahu, tertidor di bantal: dan dia-orang bangunkan sama dia, dan kata sama dia, "Guru, t'ada-kah guru pdulikan yang kita binasa?"
39Dan dia bangun, dan tngkingkan itu angin, dan kata sama itu tasek, "Diam, tdoh-lah angkau." Dan angin ribot brenti, dan jadi tdoh skali.
40Dan dia kata sama dia-orang, "Knapa kamu takot? blum-kah kamu perchaya?"
41Dan dia-orang jadi terlalu-lah sangat takot, dan kata satu sama lain, "Siapa pula dia ini? sampaikan angin dan tasek pun turut prentah-nya?"