1Biar-lah tiap-tiap orang tundok k-pada sgala kuasa yang di atas dia: kerna tidak ada kuasa chuma deri-pada Allah; dan sgala kuasa yang ada itu pun sudah di-tntukan oleh Allah.
2Sbab itu orang yang mlawan kuasa itu, dia itu mlanggar Allah punya aturan: dan sgala orang yang mlanggar nanti datangkan hukuman atas diri-nya.
3Kerna orang-orang yang pegang prentah bukan-nya bawa takot k-pada yang baik punya pkerja'an, ttapi k-pada yang jahat punya. Ya-kah angkau ta'mau jadi takot sama kuasa itu? buat-lah apa yang baik, dan angkau nanti dapat puji deri-pada kuasa itu:
4kerna dia satu hamba Allah spaya buat baik k-pada angkau. Ttapi jikalau angkau buat jahat, jadi-lah takot: kerna kuasa itu bawa pdang bukan dngan perchuma: kerna dia satu hamba Allah yang balaskan marah-nya atas orang yang buat jahat.
5Sbab itu patut-lah angkau tundokkan diri, bukan saja deri sbab Allah punya marah, ttapi deri sbab angan-angan hati pun.
6Kerna deri sbab ini-lah kamu bayer chukai pula; kerna smoa-nya Allah punya pgawai yang ttap buat ini kerja juga.
7Bayer-lah smoa orang apa-apa yang terhutang sama dia: ia'itu hasil k-pada orang yang patut trima hasil; chukai k-pada orang yang patut trima chukai; takot k-pada orang yang patut trima takot; dan hormat k-pada orang yang patut trima hormat.
8Jangan berhutang apa-apa sama satu orang pun, chuma hutang kaseh satu sama lain: kerna orang yang kasehkan lain orang, dia-lah sudah chukop ikut hukum-taurit.
9Sbab ini perkata'an, ia'itu, "Jangan buat zina," "Jangan bunoh," "Jangan churi," "Jangan tma'a," dan apa-apa lain hukum, smoa-nya terkumpol dalam ini satu perkata'an, ia'itu, "Kasehkan-lah orang sblah-mnyblah sama sperti diri angkau sndiri."
10Kaseh itu t'ada buat apa yang jahat sama orang sblah-mnyblah-nya: jadi itu, kaseh itu-lah yang chukopkan hukum-taurit.
11Dan patut buat bgini, sdang kamu tahu ini tempo, ia'itu sudah-lah sampai ktika-nya bila kamu msti bangun deri tidor: kerna skarang-lah kita punya slamat lbeh dkat lagi deri-pada tempo bila kita mula-mula sudah perchaya.
12Sudah-lah jauh malam, dan sudah dkat siang hari: sbab itu biar-lah kita buangkan pkerja'an glap, dan pakai snjata trang.
13Biar-lah kita berjalan dngan snonoh, sperti adat siang hari; jangan dngan lazat dan mabok, jangan dngan persundalan dan perchabolan, dan jangan dngan perklahian dan chmburu.
14Ttapi biar-lah Tuhan kita Isa Almaseh jadi kamu punya pakaian, dan jangan-lah kamu ingat fasal tabi'at dunia mau puaskan k'inginan-nya.