Dual Panel1Ttapi chakap-lah perkara-perkara yang padan dngan pngajaran yang baik:
2ia'itu patut-lah orang tua-tua ada fikiran ttap, snonoh, mnahan diri, ada baik dalam perchaya, dalam kaseh, dan dalam sabar:
3dan bgitu juga patut-lah prempuan tua-tua bawa tengkah-laku yang dngan hormat, jangan umpatkan orang, atau mnjadi hamba k-pada banyak ayer-anggor, orang yang kasi plajaran yang baik;
4spaya dia-orang boleh ajarkan prempuan muda-muda sayang dia-orang punya laki, sayang dia-orang punya anak,
5mnahan diri, suchi, dan kerja di rumah, hati baik, tundok k-pada dia-orang sndiri punya laki, spaya jangan perkata'an Allah kna umpat:
6orang dlaki yang muda-muda pun bgitu juga, baik-lah angkau nasihatkan dia-orang mnahan diri-nya:
7dalam smoa perkara tunjokkan-lah diri angkau mnjadi satu tuladan dalam perbuatan yang baik; dalam angkau punya pngajaran tunjokkan-lah tulus, dan snonoh,
8dan perkata'an yang baik yang orang ta'boleh salahkan, spaya orang yang mlawan kita boleh jadi malu sbab t'ada dapat apa-apa jahat mau chakap fasal kita.
9Hamba-hamba orang patut tundok k-pada dia-orang sndiri punya tuan-tuan, mnjadi berknan dalam smoa perkara; dngan t'ada lawan kata;
10dan dngan t'ada churi, ttapi tunjokkan s-chukop stiawan; spaya dalam smoa perkara dia-orang boleh riaskan pngajaran Juru-slamat kita Allah.
11Kerna sudah-lah ternampak anugrah Allah yang datangkan slamat k-pada smoa manusia,
12dan yang ajarkan kita spaya kita boleh sangkalkan hal t'ada kbaktian dan k'inginan dunia, dan bawa diri kita dalam jman skarang dngan mnahan diri, dan dngan kbnaran, dan kbaktian;
13sambil mnantikan itu harap yang berkat, dan knyata'an kmulia'an Allah dan Juru-slamat kita yang bsar itu;
14yang sudah srahhan diri-nya kerna kita, spaya tbuskan kita deri-pada smoa kjahatan, dan spaya suchikan kerna diri-nya satu bangsa yang mnjadi dia sndiri punya, dan rajin buat baik.
15Ini smoa baik-lah angkau chakapkan, dan nasihatkan, dan kalotkan dngan s-chukop kuasa. Jangan satu orang pun tengok angkau ta'mata.