Dual Panel1Dan di tangan kanan dia itu yang dudok di atas itu takhta, sahya tengok satu kitab yang tersurat luar-dalam-nya, dan tersil dngan tujoh sil.
2Dan sahya tengok satu mla'ikat yang kuat, bertriak dngan suara yang bsar, "Siapa-kah yang layak bukakan itu kitab, dan kopekkan sil-nya smoa?"
3Dan satu orang pun t'ada, baik di shorga, baik di atas bumi, baik di bawah bumi pun, yang ada kuasa bukakan itu kitab, atau tengok itu.
4Dan sahya mnangis banyak-banyak, sbab satu orang pun t'ada dapat yang layak bukakan itu kitab atau tengok itu:
5dan ada satu orang deri antara itu ktua-ktua kata sama sahya, "Ta'usah mnangis: ingat, itu Singa yang deri-pada suku-bangsa Yahuda, ia'itu Akar Da'ud, sudah mnang, sampaikan boleh bukakan itu kitab sama tujoh sil-nya.
6Dan sahya tengok pula di antara itu takhta dngan itu ampat hidop-hidopan, dan di antara itu ktua-ktua, ada satu Anak-domba berdiri, sperti sudah kna smbleh rupa-nya, dngan tujoh tandok dan tujoh mata; dan itu mata ia'itu tujoh Roh Allah itu, yang sudah di-hantarkan k-pada sluroh bumi ini.
7Dan itu Anak-domba datang, dan ambil itu kitab deri-pada tangan dia itu yang dudok di atas itu takhta.
8Dan bila dia sudah ambil itu kitab, itu ampat hidop-hidopan dan itu dua-puloh-ampat ktua-ktua berlutut-lah di dpan itu Anak-domba, masing-masing ada pegang satu kchapi, dan mangkok-mangkok mas yang pnoh dngan bau-bauan, ia'itu sgala orang kudus punya do'a.
9Dan dia-orang nyanyi satu nyanyian yang bharu, bgini, "Layak-lah angkau ambil itu kitab, dan bukakan sil-nya kerna angkau sudah kna smbleh, dan sudah tbuskan orang k-pada Allah dngan darah-mu deri-pada tiap-tiap suku-bangsa, dan bhasa, dan kaum, dan bangsa,
10dan sudah jadikan dia-orang k-pada Allah kita satu kraja'an dan imam-imam pula; dan dia-orang jadi raja atas bumi."
11Dan sahya tengok, dan sahya dngar suara banyak-banyak mla'ikat kliling itu takhta dan itu hidop-hidopan dan itu ktua-ktua; dan bilangan-nya berlaksa-laksa dan berribu-ribu;
12yang kata dngan suara yang bsar, "Layak-lah itu Anak-domba yang sudah kna smbleh mau trima kuasa, dan kkaya'an dan bijaksana dan kkuatan, dan hormat dan kmulia'an dan puji.
13Dan tiap-tiap kjadian yang di shorga, dan di bumi, dan di bawah bumi, dan di lautan, dan sgala perkara yang di dalam-nya sahya dngar ada bilang, "Sgala puji dan hormat dan mulia dan kuasa k-pada dia yang dudok di atas itu takhta, dan k-pada Anak-domba, sampai s-lama-lama-nya.
14Dan itu ampat hidop-hidopan kata, "Amin". Dan itu ktua-ktua berlutut mnymbah.