Alkitab Mobile SABDA
[VER] : [BABA]     [PL]  [PB] 
 <<  Wahyu 9 >> 

1Dan mla'ikat yang nombor lima pun tiop trompet, dan sahya tengok satu bintang sudah gugur deri langit sampai di bumi: dan sudah di-bri k-pada dia lobang yang t'ada terduga punya anak-kunchi.

2Dan dia buka itu lobang yang t'ada terduga: dan kluar satu asap deri itu lobang sperti asap dapur bsar: dan matahari dan udara pun mnjadi glap deri sbab asap lobang itu.

3Dan deri itu asap kluar bilalang turun di bumi; dan kuasa sudah di-bri k-pada-nya, sperti kuasa kala-jngking yang di bumi.

4Dan sudah di-katakan k-pada ini smoa, jangan rosakkan rumput yang di bumi, dan apa-apa yang hijau, dan pokok-pokok pun jangan, ttapi chuma manusia saja, barang-siapa yang t'ada sil Allah di atas dahi-nya.

5Dan ini smoa di-bri kuasa bukan-nya mau bunoh dia-orang, ttapi chuma dia-orang boleh kna seksa lima bulan punya lama: dan seksa-nya sperti seksa bila orang kna sngat kala-jngking.

6Dan itu ktika orang nanti chari kmatian, dan t'ada skali-kali boleh dapat; dan nanti suka mati, ttapi kmatian lari deri-pada dia-orang.

7Dan itu bilalang punya rupa sperti kuda-kuda yang sudah berlngkap mau prang; dan atas kpala-nya ada sperti makota yang s-rupa mas, dan muka-nya sperti manusia punya muka.

8Dan rambut-nya sperti rambut prempuan, dan gigi-nya sperti singa punya.

9Dan dada-nya ada pakai sperti baju-bsi; dan bunyi sayap-nya sperti bunyi kreta-kreta, yang ada banyak kuda berlari-lari mau pergi prang.

10Dan ini bilalang smoa ada buntut sperti kala-jngking, dan ada sngat pun; dan di buntut-nya-lah ada kuasa-nya boleh rosakkan orang lima bulan.

11Dan ini smoa ada itu tmpat yang t'ada terduga punya mla'ikat jadi raja-nya, dan dia punya nama dalam bhasa Ibrani Abaddun, dan dalam bhasa Grik dia punya nama "Apolluon."

12Itu susah yang pertama sudah lpas: ingat, ada datang lagi dua susah kmdian deri-pada ini.

13Dan mla'ikat yang nombor anam pun tiop trompet, dan sahya dngar satu suara kluar deri tandok-tandok tmpat-persmbahan mas itu yang di dpan Allah,

14yang kata sama itu mla'ikat yang nombor anam, yang pegang itu trompet, "Lpaskan itu ampat mla'ikat yang ada kna ikat dkat sungai bsar, ia'itu sungai Frat."

15Dan terlpas-lah itu ampat mla'ikat, yang sudah di-sdiakan kerna itu jam, dan itu hari, dan itu bulan, dan itu tahun, spaya boleh bunoh s-pertiga deri-pada smoa manusia.

16Dan bilangan sgala tntra orang berkuda itu dua laksa laksa: sahya dngar dia-orang punya bilangan.

17Dan sahya sudah tengok bgini-lah itu kuda-kuda dalam pnglihatan itu, dan orang-orang yang tunggang, yang ada baju bsi-nya sperti api dan merah-tua dan werna blerang, dan itu kuda punya kpala sperti kpala singa; dan deri mulut-nya kluar api dan asap dan blerang.

18Dngan ini tiga chlaka s-pertiga deri-pada sgala manusia sudah kna bunoh, ia'itu dngan api dan asap dan blerang yang kluar deri mulut-nya.

19Kerna itu kuda-kuda punya kuasa ada di mulut-nya dan buntut-nya; kerna buntut-nya sperti ular punya, dan ada kpala; dan dngan itu-lah dia rosakkan orang.

20Dan lain-lain manusia yang t'ada kna bunoh oleh ini tiga chlaka, t'ada juga bertobat deri-pada perbuatan tangan-nya, spaya jangan smbah sama jin, dan smoa mas perak, tmbaga, batu dan kayu punya patong; yang t'ada kuasa boleh nampak atau dngar atau berjalan:

21dan t'ada pula dia-orang bertobat deri-pada pmbunohan-nya, atau hobatan-nya, atau perchabolan-nya, atau pnchurian-nya.


  Share Facebook  |  Share Twitter

 <<  Wahyu 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran