Dual Panel1Sabarja semeton, tur pirengang malih akidik, indik sane jaga aturang tiang ring semeton, sajeroning parab Ida Sang Hyang Widi Wasa.
2(36:1)
3Pangweruhan tiange dalem pisan. Tiang jaga nguningayang paindikan sane uningin tiang, buat nyinahang mungguing Ida Sang Hyang Widi Wasa punika sane ngardi tiang punika adil.
4Saananing sane uningayang tiang ring semeton puniki tan wenten sane bobab. Semeton nyingak ring ajeng semetone anak sane wiakti wicaksana.
5Ambate kukuh bakuhne Ida Sang Hyang Widi Wasa. Ida nenten nganistayang sapasira jua. Tan wenten paindikan sane tan karesep antuk Ida.
6Ida nenten nglugrain jadmane madosa muponin urip, tur Ida setata adil ring jadmane tiwas-tiwas.
7Ida nyayubin jadmane sane patut. Ida nglugrain ipun mrentah waluya sakadi sang prabu tur manggayang ipun kaluihang ngantos salami-laminipun.
8Nanging yening anake kategul antuk ante tur nandang sangsara punika malantaran indik sane sampun laksanayang ipun,
9Ida Sang Hyang Widi Wasa nyinahang dosa-dosanipune miwah kasumbunganipune.
10Ida ngawinang ipun nyak miragiang pakeling Idane buat mawali saking paindikan-paindikan sane dursila.
11Yening ipun satinut ring Ida Sang Hyang Widi Wasa, tur astiti bakti ring Ida, ipun prasida nutugang tuuh tur prasida muponin sutrepti miwah kawibuhan.
12Nanging yening ipun nenten sairing, ipun jaga padem sajeroning kanambetanipune, tur jaga nglintangin tukad ngungsi ka jagat anake sane padem.
13Jadmane sane tan pawidi ipun tan mari ngadut pedih, samaliha yening ipun kasisipang, ipun nenten jaga nunas tulung.
14Ipun jaga padem sakantun ipun bajang, tur ipun tan mari pacang nandang kimud.
15Nanging Ida Sang Hyang Widi Wasa nguruk manusane majalaran kasangsaran, tur kamewehan punika anggen Ida ngedatang matanipune.
16Ida Sang Hyang Widi Wasa makta semeton medal saking kamewehan, tur nglugrain semeton muponin kerta raharja. Mejan semetone kadugdugin antuk ajeng-ajengan kantos tegeh.
17Nanging mangkin semeton kasisipang kadi patutipun. Waspadaja semeton.
18Sampunangja icena tukang suape jaga nguluk-uluk semeton wiadin jadmane sane sugih-sugih jaga nuntun semeton kantos paling.
19Indike punika ngawinang semeton nenten wenten gunanipun jaga jerit-jerit nunas tulung. Sane mangkin saananing kakuatan semetone jaga nenten mrasidayang nulungin semeton.
20Sampunangja semeton ngedotang mangda wengine rauh, inggih punika rikala masan bangsane jaga pada padem.
21Waspadaja, sampunang semeton mawali ring paindikane sane dursila. Kasangsaran semetone sampun ngawinang semeton medal saking irika.
22Elingangja, ambate agung kawisesan Ida Sang Hyang Widi Wasa. Ida punika maraga guru sane pinih agung.
23Tan wenten anak sane mrasidayang nguningayang ring Ida Sang Hyang Widi Wasa, punapi sane patut laksanayang Ida, wiadin nalih Ida ngamargiang paindikan sane dursila.
24Ida tansah kapuji malantaran paindikan sane sampun kardi Ida. Semeton taler patut muji Ida.
25Sakancan anake sane sampun padem manggihin paindikan sane sampun kardi Ida, nanging tan wenten anak sane ngresep ring paindikane punika.
26Iraga nenten mrasidayang uning ring kagungan Idane makasami, wiadin ngitung akeh yusan Idane.
27Ida Sang Hyang Widi Wasa sane ngambil toyane saking jagate saha ngwaliang toya punika ulung dados sabeh.
28Ida nglugrain sabehe punika masriok saking guleme, buat nyiram sakancan manusane.
29Tan wenten anak sane uning sapunapi guleme punika mamargi, wiadin kadi sapunapi kerug krebeke ring akasane ring genah Ida Sang Hyang Widi Wasa malinggih.
30Ida nurunang kilap ring akasane makaileh, nanging dasar segarane kantun taler peteng.
31Kadi asapunika Ida mapaica pangan kinum ring manusane, saha nyawisang pangan kinum kantos maliah-liah.
32Ida ngambil kilape punika antuk tangan Idane, tur mrentahang ipun nyander segarane.
33Kerug krebeke ngwarah-warahang indik angin ribut sane jaga gelis rauh, tur bantenge pada uning ring indik rauh angin ribute punika.