Dual Panel1Apake kita nawang ipidanke kambing alasane ento lekad? Apake kita taen nlektekang manjangane ngelah panak?
2Apake kita nawang makapidan makelonne ia ngadut panakne ento? Apake kita nawang masanne ia lekad?
3Apake kita nawang, buin pidanke masanne ia lakar nengkulang awakne, tur nglekadang panakne?
4Di alase panakne ento sayan ngedenang tur nyitengang, laut magedi tur tusing buin malipetan.
5Nyenke ane nglumbar keledae alasane ento? Nyenke ane nglusin talinne tur maang ia ngumbara?
6Ulun maicayang tegal melakange makadadi tongosne, muah nglugrain ia idup di tegalane ane tanahne uyahan.
7Ia joh uli kota-kotane ane rame tur tusing ada anak ngebohang ia tur nganggon ia magarapan.
8Gunung-gununge dadi pategalan tongosne ngalih amah, tongosne ngalih sawatek ane magoba gadang ane lakar amaha.
9Apake sampi alasane dadi anggon kita magarapan? Apake ia nyak nginep di kandang kitane?
10Nyidayangke kita negul ia aji tali laut nganggon ia nenggala, wiadin nganggon ia ngedeng lampit di tegalan kitane?
11Banike kita nyagerang kasitengannyane tur nunden ia apanga ngarap gegaen kitane ane berat?
12Apake kita cager, mungguing ia lakar ngaba mulih pamupon kitane, tur munduhang gandum uli tongos kitane nigtig gandum.
13Amunapake becatne kampid kedis kasuarine kepat-kepat? Nanging tusing ada kedis kasuari ane nyidayang makeber buka kedis cangake.
14Kedis kasuarine ngejang taluhne di tanahe, sawireh panese ane uli tanahe lakar ngranayang taluhne ento anget.
15Ia tusing nawang mungguing ada batis ane lakar ngenyagang taluhne di tanahe ento, wiadin sato alas ane lakar melahang taluhne ento.
16Ia mapi-mapi mungguing taluhne ento mirib tusing ia ane ngelah, tur ia tusing lingu mungguing pakibehne ento tan papuara.
17Ulun ene ane ngawanang ia belog tur tusing mapaica kawicaksanan teken ia.
18Nanging ia ngawitin malaib, ia nyidayang ngedekin sawatek jarane muah anake ane negakin.
19Ih Ayub, kitake ane ngawanang jarane buka keto sitengne muah maang ia gembal ane tebel?
20Kitake ane ngranayang ia bisa makecog buka balange tur matakut anak aji gregehane?
21Ia demen pesan ngekeh tanah di tegalane. Ia macuet malaib ngonyang bayunne ka pasiatan.
22Ia tusing nawang takut tur tusing ada pedang ane nyidayang nglipetang ia.
23Sanjata ane abana baan anake ane negakin ngrincing tur kelem-kelem kena sinar matan ai.
24Ia ngejer ulihan girangne, tur jarane pada malomba malaib ngarepang. Dikalan trompete kupin ia tusing nyidayang buin ngoyong.
25Sabilang trompete mamunyi ia ngregeh. Ia nyidayang ngendus bon siate, satondene ia teked di pasiatan, tur ia ningeh jeritan munyin komandane.
26Apake kedis sikepe mlajah sig kitane kenken caranne makeber, dikalane ia ngebatang kampidne makeber ngelodang?
27Apake kedis garudane ngantiang pituduh kitane buat ngae sebun di gununge tegeh?
28Ia ngae sebun di gunung batune ane paling tegeha, tur muncuk gununge ane lanying anggona bentengne.
29Uli ditu ia medasang tongos ane paek muah joh buat ngalih ane dadi matiang muah amaha.
30Bangke-bangkene itera baan kedis garudane, tur ditu panak garudane nyorot getih.