Dual PanelDane
1Sasampune punika, rikala Ida Sang Prabu Artahsasta jumeneng ratu ring Persia, wenten anak mapesengan Esra. Dane punika katurunan Dane Harun, Sang Pandita Agung, sakadi ring sor puniki. Dane Esra okan Dane Seraya, okan Dane Asarya, okan Dane Hilkia,
2okan Dane Salum, okan Dane Sadok, okan Dane Ahitub,
3okan Dane Amarya, okan Dane Asarya, okan Dane Merayot,
4okan Dane Serahya, okan Dane Usi, okan Dane Buki,
5okan Dane Abisua, okan Dane Pinehas, okan Dane Eleasar, okan Dane Harun.
6Dane Esra tumuli kesah saking Babel. Dane punika anak sane pradnyan ring daging cakepan suci, wikan ring daging cakepan Torat Dane Musa sane kapaicayang antuk Ida Sang Hyang Widi Wasa, Widin Israele. Sajawining punika sang prabu maicayang ring dane sakancan sane tunas dane, santukan Ida Sang Hyang Widi Wasa, Widin danene setata ngiangin dane.
7Ring taun sane kaping pitu panyeneng Ida Sang Prabu Artahsasta, dane mamargi budal ka Yerusalem kasarengin antuk rombongan sane tiosan luiripun, parapandita, wong Lewi, juru kidung, parapajagaan miwah parapangayahe ring Perhyangan Agung Ida Sang Hyang Widi Wasa.
8Dane Esra tumuli rauh ring Yerusalem ring sasih sane kaping lima, inggih punika ring taun sane kaping pitu panyeneng Ida Sang Prabu Artahsasta.
9Dane kesah saking Babel ring tanggal siki sasih sane kaping pisan, tur ring tanggal asiki sasih sane kaping lima dane rauh ring Yerusalem, santukan Widin danene tansah ngiangin dane.
10Dane Esra sampun nyadia pisan buat nureksain saha ngincepang Torat Ida Sang Hyang Widi Wasa, tur nglaksanayang saha ngurukang sakancan pidabdab miwah tata cara punika ring pantaran wong Israele.
Piaga
11Ida Sang Prabu Artahsasta mapaica piagam ring Dane Esra, sane dados pandita miwah pradnyan ring daging cakepan suci, sane wikan ring titah miwah pidabdab Ida Sang Hyang Widi Wasa, sane dagingipun asapuniki:
12“Piagam uli Ida Sang Prabu Artahsasta, katiba teken Pandita Esra, ane pradnyan teken Pidabdab Ida Sang Hyang Widi Wasa, Widin langite.
13Gelahe suba mrentahang mungguing asing-asing anak Israel di sakuub kaprabon gelahe, parapandita wiadin wong Lewi ane makeneh mulih ka Yerusalem, dadi bareng-bareng teken paman.
14Gelahe muah pangabih gelahe pepitu ento ngutus paman buat nyelehin kota Yerusalem muah gumi Yehudane, saha nureksain, apake Pidabdab Torat Widin pamane, ane kapategenang teken paman suba katinutin, apa tusing.
15Paman patut masih ngaba perak muah mas aturan gelahe muah pangabih gelahe, ane lakar katurang di ajeng Widin Israele, ane malingga di Yerusalem.
16Aketo masih paman patut ngaba perak muah mas ane punduhang paman di sawewidangan gumi Babele muah aturan rakyat Israele muah parapanditannyane ane lakar aturanga buat Perhyangan Agung Ida Sang Hyang Widi Wasa di Yerusalem.
17Sawireh keto, paman patut tangar nganggon pipise ento buat meli sampi muani-muani, biri-biri muani, panak biri-biri, gandum muah anggur. Aturan-aturan ento makejang patut aturang paman di pamorboran aturane di Perhyangan Agung Widin pamane di Yerusalem.
18Unduk mas wiadin perake ane lenan, dadi anggon paman muah nyama-nyamaan pamane buat ngitungang ane lenan, ane satinut teken pakarsan Widin pamane.
19Barang-barange ane kaserahang teken paman buat pangubaktine di Perhyangan Agung Widin pamane, patut aturang paman di ayun Ida Sang Hyang Widi Wasa di Yerusalem.
20Buina apaja buin ane perluang paman buat Perhyangan Agung Widin pamane, paman dadi nunas sig bendahara kaprabon gelahe.
21Gelahe, Sang Prabu Artahsasta masih suba mrentahang parabendaharane ane dauh Tukad Eprate, mungguing apaja ane tagiha teken Pandita Esra, ane pradnyan teken daging Torat Ida Sang Hyang Widi Wasa, Widin langite, patut kalaksanayang makejang.
22Baangja ia perak kantos 3.400 kilogram, gandum 10.000 kilogram, anggur 2.000 liter, lengis saitun 2.000 liter muah uyah amun kaperluannyane.
23Sakancan ane karsayang baan Ida Sang Hyang Widi Wasa, Widin langite, buat kaperluan Perhyangan Agung Widin langite ento, ento patut kalaksanayang apang melah, apang eda kanti Ida bendu teken gelahe muah teken ane ngentinin gelah.
24Gelahe ngorahin paman ajak makejang, tusing pesan dadi nagih pajeg teken parapandita, wong Lewi, juru kidung, pajagaan muah parapangayahe muah anake lenan ane ngayah di Perhyangan Agung Ida Sang Hyang Widi Wasa.
25Sawireh keto paman Esra, paman patut ngadegang pamimpin-pamimpin muah parahakim ane satinut teken sabdan Ida Sang Hyang Widi Wasa, Widin pamane ane sungkemin paman, apanga ia ngenterang rakyate ane nongos dauh Eprate makejang, nah ento anak ane suba nawang pidabdab Widin pamane. Anake ane tonden nawang, patut ia urukang paman.
26Asing-asing anak ane tusing nglaksanayang pidabdab Widin pamane muah pidabdab ida sang prabu, ia patut kukum baan ukuman mati, ukuman maselong, ukuman denda wiadin ukuman mapangkeng.”
Dane
27Dane Esra raris mabaos sapuniki: “Pujija Ida Sang Hyang Widi Wasa, Widin leluur iragane. Ida sampun nutdut pakayunan ida sang prabu, kantos ida ledang ngluihang Perhyangan Agung Ida Sang Hyang Widi Wasa ring Yerusalem.
28Ida sampun ngawinang ida sang prabu miwah parapangabih lan prakanggen idane sami asung lugraha ring titiang. Ida Sang Hyang Widi Wasa, Widin titiange sampun ngukuhang manah titiange, kantos titiang mrasidayang munduhang makudang-kudang pamimpin wong Israele, buat matulak budal sareng-sareng ring titiang.”