Alkitab Mobile SABDA
[VER] : [BALI]     [PL]  [PB] 
 <<  Mazmur 147 >> 

Puji-

1Pujija Ida Sang Hyang Widi Wasa! Becik pisan iraga makidung muji Widin iragane. Becik tur patut pisan iraga muji Ida.

2Ida Sang Hyang Widi Wasa sampun ngwangun malih kota Yerusaleme, tur Ida sampun ngwaliang malih jadmane sane maselong.

3Ida ngwarasang jadmane sane dekdek renyuh manahnyane, tur medbed tatu-tatunipune.

4Ida sampun ngamastiang gebogan bintang-bintange, tur Ida ngesengin ipun suang-suang manut wastanipune.

5Panembahan iragane punika agung tur mawisesa. Kawicaksanan Idane nenten sida antuk nyugjugin.

6Ida ningting anake sane nista, nanging Ida nyekjek anake dursila ring tanahe.

7Kidungangja kidung pamuji katur ring Ida Sang Hyang Widi Wasa. Suarayangja rebabe katur ring Widin iragane.

8Ida mrarakang gulem ring akasane, tur Ida nyawisang sabeh pabuat pretiwine, mawinan padange mentik ring bukit-bukite.

9Ida maicain buron-burone tetedan tur ngicen neda panak-panak guake, rikalaning ipun jerit-jerit.

10Sane arsayang Ida boyaja kuda sane siteng-siteng, wiadin prajurit-prajurit sane sura dira,

11nanging Ida ledang ring anake sane ngluihang Ida, inggih punika ring anake sane pracaya ring sih pasuecan Idane sane nenten rered-rered.

12Ih Yerusalem, pujija Ida Sang Panembahan! Ih Sion, pujija Widin ragane!

13Ida nekekang kancing jelanan gapuran ragane, tur Ida ngamertanin rakyat ragane.

14Ida ngamanggehang wates wewidangan ragane mangda sutrepti, tur murnayang idep ragane antuk gandum sane pinih becik.

15Ida mapaica pituduh ring pretiwine, tur sakancan sane sabdayang Ida punika digelis kasidan.

16Ida ngeberang salju waluya sakadi ngeberang saput miwah nyambehang damuh es waluya sakadi nyambehang abu.

17Ida ngrauhang sabeh es, sakadi anake nyambehang krikil. Nenten wenten anak sane mrasidayang naanang dingin sane tedunang Ida punika.

18Sasampune punika Ida tumuli masabda, mawinan ese punika raris enceh. Ida raris nedunang angin, tur toyane tumuli membah.

19Ida maicayang sabdan Idane ring kaulan Idane. Ida maicayang titah miwah pidabdab Idane ring wong Israele.

20Ida nenten maicayang sabdane punika ring bangsa-bangsa sane lianan. Ipun nenten uning ring pidabdab Idane. Pujija Ida Sang Hyang Widi Wasa!


  Share Facebook  |  Share Twitter

 <<  Mazmur 147 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel