Dual PanelKapuj
1Duh Ratu Sang Hyang Widi Wasa, sang prabu rumasa gargita ring kayun, santukan Palungguh IRatu sampun mapaica kakuatan ring ida. Ida kalintang masuka rena, santukan Palungguh IRatu ngawinang ida molih ring rana.
2Palungguh IRatu sampun maicayang ring ida paindikan sane apti ida, Palungguh IRatu sampun nagingin pinunas idane.
3Palungguh IRatu ngrauhin ida, saha kadulurin antuk merta sane ageng ring ida, saha nyalukin prabun idane gelungan mas.
4Ida nunas yusa panjang, tur Palungguh IRatu nagingin pinunas idane saha mapaica urip langgeng ring ida.
5Kaluihan idane kalintang ageng malantaran pitulungan Palungguh IRatu. Palungguh IRatu sampun mapaica kabinawan miwah kagungan ring ida.
6Mertan Palungguh IRatune tan mari rauh ring ida ngantos salami-laminipun miwah teja wedanan Palungguh IRatu ngebekin ida antuk kaliangan.
7Ida sang prabu wantah andel ring Ida Sang Hyang Widi Wasa Sane Maha Wisesa samaliha malantaran sih suecan Ida Sang Hyang Widi Wasa sane nenten rered-rered ida jaga setata muponin sutrepti.
8Ida sang prabu jaga nawan meseh-meseh idane sami. Ida jaga nawan asing-asing anak sane geting ring ida.
9Rikala ida medal, ida jaga nyirnayang meseh-meseh idane, waluya sakadi geni sane ngendih murub. Ida Sang Hyang Widi Wasa jaga nyirnayang ipun antuk pidukan Idane, tur genine jaga ngeseng ipun.
10Katurunannyane tan wenten sane jaga kantun urip. Ida sang prabu jaga ngamademang ipun makasami.
11Ipun pada makarya rencana, tur mapiguman jaga nglawan ida, nanging ipun nenten jaga sida karya.
12Ida jaga nibakang panah idane ring ipun tur ngawinang ipun jerih kapilayu.
13Duh Ratu Sang Hyang Widi Wasa, titiang muji Palungguh IRatu malantaran kawisesan Palungguh IRatu sane kalintang ageng! Titiang jaga makidung tur muji kawisesan Palungguh IRatu.